ന്യൂഡൽഹി: ജമ്മു കശ്മീരിലെ കത്വയിൽ പാകിസ്ഥാൻ വിമാനത്തിന്റെ ആകൃതിയിലുള്ള ബലൂൺ കണ്ടെത്തിയതിനെ തുടർന്ന് പ്രദേശത്ത് തിരച്ചിൽ ആരംഭിച്ചു. പിഐഎയുടെ ലോഗോ എഴുതിയ ഒരു വിമാനാകൃതിയിലുള്ള ബലൂൺ ആണ് കണ്ടെത്തിയത്.
കത്വ ജില്ലയിലെ ഹിരാനഗറിലാണ് ദുരൂഹമായ കറുപ്പും വെളുപ്പും നിറങ്ങളിലുള്ള ബലൂൺ നിലത്ത് കിടക്കുന്നത് കണ്ടെത്തിയത്. സുരക്ഷാ സേന ബലൂൺ പിടിച്ചെടുത്ത് ബലൂൺ എവിടെ നിന്നാണ് വന്നതെന്ന് കണ്ടെത്താൻ പ്രദേശത്ത് തിരച്ചിൽ ആരംഭിച്ചു.
ഈ വർഷം ഫെബ്രുവരിയിൽ, ഷിംലയിലെ ഒരു ആപ്പിൾ തോട്ടത്തിൽ PIA ലോഗോ പതിച്ച വിമാനത്തിന്റെ ആകൃതിയിലുള്ള ഒരു പച്ചയും വെള്ളയും ബലൂൺ കാണപ്പെട്ടിരുന്നു. മെയ് 20 ന് അതിർത്തി രക്ഷാ സേന (ബിഎസ്എഫ്) ഉദ്യോഗസ്ഥർ അമൃത്സറിൽ പാകിസ്ഥാൻ ഡ്രോൺ വെടിവച്ചതായും മയക്കുമരുന്ന് അടങ്ങിയ ബാഗ് പിടിച്ചെടുത്തതായും അറിയിച്ചു. കഴിഞ്ഞ ദിവസം, പഞ്ചാബിലെ അന്താരാഷ്ട്ര അതിർത്തിയിൽ (ഐബി) നാല് പാകിസ്ഥാൻ ഡ്രോണുകൾ ബിഎസ്എഫ് തടയുകയും അവയിൽ മൂന്നെണ്ണം വെടിവച്ചിടുകയും ചെയ്തിരുന്നു.