തിരുവനന്തപുരം: സിപിഐ(എം) ൽ ചേർന്ന എൽജെഡി സംസ്ഥാന ജനറൽ സെക്രട്ടറി ഷെയ്ക്ക് പി ഹാരീസിനൊപ്പം തിരുവനന്തപുരത്തെ എൽജെഡി സംസ്ഥാന -ജില്ലാ -മണ്ഡലം നേതാക്കളും എച്ച് എം എസ് യൂണിയനിലെ തൊഴിലാളികളും സിപിഐ(എം) ൽ ചേർന്ന് പ്രവർത്തിക്കാൻ തീരുമാനിച്ചു. സിപിഐ(എം) ജില്ലാ കമ്മിറ്റി ഓഫീസിൽ നടന്ന യോഗത്തിൽ വച്ച് ഇവരെ സിപിഐ(എം) തിരുവനന്തപുരം ജില്ലാ സെക്രട്ടറി ആനാവൂർ നാഗപ്പൻ സ്വീകരിച്ചു. യോഗത്തിൽ എൽജെഡി ജില്ലാ സെക്രട്ടറി നൗഷാദ് മൗലവി അദ്ധ്യക്ഷനായി. വാമനപുരം എംഎൽഎ യും സിപിഐ(എം) ജില്ലാ സെക്രട്ടറിയേറ്റംഗവുമായ ഡി കെ മുരളി സ്വാഗതം പറഞ്ഞു.
എൽജെഡി സംസ്ഥാന കമ്മിറ്റി അംഗം പൂവച്ചൽ നാസർ, സംസ്ഥാന കൗൺസിൽ അംഗം അജി എസ്, യുവജനതാദൾ ജില്ലാ സെക്രട്ടറി ഷജീർ വെള്ളാഞ്ചിറ, എൽജെഡി ജില്ലാ എക്സിക്യൂട്ടീവ് അംഗങ്ങളായ ജി രാധാകൃഷ്ണപിള്ള, എ മോഹനൻ ഉൾപ്പെടെ 27 പേർക്കാണ് ഇന്ന് സ്വീകരണം നൽകിയത്.
കൂടാതെ പനവൂർ ടൗണിലെ എച്ച് എം എസ് യൂണിയനിലെ മുഴുവൻ ഹെഡ്ലോഡ് തൊഴിലാളികളും അവരുടെ കുടുംബാംഗങ്ങളും സിപിഐ(എം) മായി സഹകരിച്ച് പ്രവർത്തിക്കുമെന്ന് നേതാക്കൾ അറിയിച്ചു. പൂവച്ചൽ നാസർ യോഗത്തിൽ നന്ദി രേഖപ്പെടുത്തി.