തിരുവനന്തപുരം: സംഘടനാ വിരുദ്ധ പ്രവര്ത്തനം നടത്തിയ സംസ്ഥാന പ്രസിഡന്റ് കെ.എസ് അനിലിനെ ഹോര്ട്ടികോര്പ്പ് എംപ്ലോയിസ് കോണ്ഗ്രസ് (ഐഎന്ടിയുസി) പുറത്താക്കി. കോണ്ഗ്രസില് നിന്ന് രാജിവെച്ച് ഇടതുമുന്നണിയുടെ ഘടകക്ഷിയായ കോണ്ഗ്രസ് -എസില് ചേര്ന്ന് പ്രവര്ത്തിക്കാന് കെ. എസ് അനില് തീരുമാനിച്ച പശ്ചാത്തലത്തിലാണ് നടപടി.
വര്ക്കിങ് പ്രസിഡന്റ് നവാസിന്റെ അധ്യക്ഷതയില് ഇന്നലെ ചേര്ന്ന ഹോര്ട്ടികോര്പ്പ് എംപ്ലോയിസ് കോണ്ഗ്രസ് (ഐഎന്ടിയുസി) ഭാരവാഹികളുടെ യോഗമാണ് കെഎസ് അനിലിനെ പുറത്താക്കാന് ഐക്യകണ്ഠേന തീരുമാനമെടുത്തത്. പാര്ട്ടിയെയും സംഘടനയെയും വഞ്ചിച്ച് ഇടതുപക്ഷത്തേക്ക് ചേക്കേറിയ അദ്ദേഹത്തിന് തുടര്ന്നും സംഘടനയില് നേതൃസ്ഥാനത്ത് തുടരാന് ധാര്മികമായ അവകാശമില്ലെന്ന് യോഗം വിലയിരുത്തി. ഇന്ത്യന് നാഷണല് കോണ്ഗ്രസില് അടിയുറച്ച് വിശ്വസിക്കുന്ന ഹോര്ട്ടികോര്പ്പ് എംപ്ലോയിസ് കോണ്ഗ്രസ് തൊഴിലാളികള് ആത്മാഭിമാനം പണയം വെയ്ക്കില്ലെന്നും പ്രസ്ഥാനത്തെ തള്ളിപ്പറഞ്ഞ് മറ്റൊരു സംഘടനയിലേക്കും ചേക്കേറില്ലെന്നും വര്ക്കിങ് പ്രസിഡന്റ് നവാസ് വ്യക്തമാക്കി.
കെപിസിസി പ്രസിഡന്റ് കെ. സുധാകരന്, പ്രതിപക്ഷ നേതാവ് വി.ഡി സതീശന്, ജില്ലാ കോണ്ഗ്രസ് കമ്മിറ്റി അധ്യക്ഷന് പാലോട് രവിയുടെയും ഐഎന്ടിയുസി ജില്ലാ പ്രസിഡന്റ് വി.ആര് പ്രതാപന്റെയും പിന്തുണയോടെ സംഘടനയെ ശക്തമായി മുന്നോട്ടു കൊണ്ടുപോകാനും യോഗം തീരുമാനിച്ചു.
സെക്രട്ടറിമാരായ ദിനൂപ്, സുരേന്ദ്രന്, അഖില്, അഭീഷ്ട്, ട്രഷറര് സഷ്ണു, ജനറല് കണ്വീനര് അനൂപ്, കണ്വീനര്മാരായ മോഹനന് നായര്, രാേജഷ്, റെജിമോന്, ബിന്ദു എന്നിവര് സംസാരിച്ചു.