മനാമ: ബഹ്‌റൈനിലെ കടുത്ത വേനലിൽ നിർമ്മാണ മേഖലയിൽ ജോലി ചെയ്യുന്ന തൊഴിലാളികൾക്ക് ആശ്വാസമായി ബഹ്‌റൈൻ മലയാളി ബിസിനസ് ഫോറം സംഘടിപ്പിക്കുന്ന ‘ഹെൽപ്പ് ആൻഡ് ഡ്രിങ്ക്’ പദ്ധതിയുടെ സീസൺ 12ന് തുടക്കമായി. തൂബ്ലിയിലെ രണ്ട് വർക്ക് സൈറ്റുകളിലാണ് ഈ വർഷത്തെ പദ്ധതിക്ക് തുടക്കം കുറിച്ചത്.

ബി.എം.ബി.എഫ് ജനറൽ സെക്രട്ടറി ബഷീർ അമ്പലായിയുടെ അധ്യക്ഷതയിൽ നടന്ന ചടങ്ങ് രക്ഷാധികാരി അനീഷ് കെ.വി ഉദ്ഘാടനം ചെയ്തു. തൂബ്ലിയിലെ സിബാർക്കോ, അൽ റാഷിദ് ഗ്രൂപ്പ് എന്നീ തൊഴിലിടങ്ങളിലായിരുന്നു ആദ്യഘട്ട വിതരണം. തൊഴിലാളികൾക്ക് ദാഹജലം, പഴവർഗങ്ങൾ, ലഘുഭക്ഷണങ്ങൾ, സാൻഡ്‌വിച്ച്, പാൻകേക്ക്, ഐസ്‌ക്രീം എന്നിവ വിതരണം ചെയ്തു. വേനൽക്കാല ആരോഗ്യ ബോധവൽക്കരണ പരിപാടികൾക്കും ഇതോടൊപ്പം തുടക്കമായി.

കഴിഞ്ഞ 12 വർഷമായി ബഹ്‌റൈൻ മലയാളി ബിസിനസ് ഫോറത്തിന്റെ നേതൃത്വത്തിൽ നടപ്പിലാക്കി വരുന്ന ഈ ജീവകാരുണ്യ പദ്ധതി ബഹ്‌റൈനിലെ വിവിധ മന്ത്രാലയങ്ങൾ, ക്യാപിറ്റൽ ഗവർണറേറ്റ്, പാർലമെന്റ് അംഗങ്ങൾ, ലേബർ മന്ത്രാലയം, സ്വദേശികളും വിദേശികളും, വിവിധ സ്ഥാപനങ്ങൾ, സംഘടനകൾ, ക്ലബുകൾ, കൂട്ടായ്മകൾ എന്നിവയുടെ പിന്തുണയോടെ ജനകീയ കാരുണ്യപ്രവർത്തനമായി വളർന്നതായി ബി.എം.ബി.എഫ് ഭാരവാഹികൾ അറിയിച്ചു. 2026ലെ ബി.എം.ബി.എഫ് ‘ഹെൽപ്പ് ആൻഡ് ഡ്രിങ്ക്’ പദ്ധതി സെപ്റ്റംബർ വരെ തുടരും. പരിപാടികൾക്ക് കാസിം പാടത്തകായിൽ, മണിക്കുട്ടൻ, മൊയ്തീൻ പയ്യോളി, മൂസക്കുട്ടി ഹാജി, ഹുസൈൻ വയനാട്, ദിനേശ് പള്ളിയാലിൽ എന്നിവർ നേതൃത്വം നൽകി.

The post ബി.എം.ബി.എഫ് ‘ഹെൽപ്പ് ആൻഡ് ഡ്രിങ്ക്’ സീസൺ 12ന് ഉജ്ജ്വല തുടക്കം appeared first on Starvision News Malayalam.

മനാമ: മൂന്ന് മാസമായി മുടങ്ങി കിടക്കുന്ന പ്രവാസി പെൻഷൻ തുക വിതരണം മുടങ്ങിയത് ഗുരുതരമായ വീഴ്ചയും പ്രതിക്ഷേധാർഹവുമാണ്. പെൻഷനെ ആശ്രയിച്ച് ജീവിക്കുന്ന നിരവധി കുടുംബങ്ങൾക്ക് മാസങ്ങളായി തുക ലഭിക്കാത്തത് സാധാരണക്കാരായ പ്രവാസി കുടുംബങ്ങളിൽ കടുത്ത സാമ്പത്തിക പ്രതിസന്ധിയാണ് സൃഷ്ടിച്ചിരിക്കുന്നത്.ക്ഷേമനിധിയിലേക്ക് വർഷങ്ങളായി വിഹിതം അടച്ച് പദ്ധതിയുടെ ഭാഗമായവരെയാണ് ഈ വിധത്തിൽ ബുദ്ധിമുട്ടിക്കുന്നത്. സർക്കാരിന്റെ പ്രവാസികളോടുള്ള മനോഭാവം ആണ് വെളിവാകുന്നത്.

പ്രവാസികളുടെ ക്ഷേമം സംരക്ഷിക്കുന്നതിൽ സർക്കാർ കൂടുതൽ ഉത്തരവാദിത്വത്തോടെ ഇടപെടണമെന്നും, പ്രവാസികളുടെ ന്യായമായ അവകാശങ്ങൾ ഉറപ്പാക്കാൻ അടിയന്തര നടപടികൾ സ്വീകരിക്കണമെന്ന് അവശ്യപ്പെട്ടുകൊണ്ട് കേരള പ്രവാസി ക്ഷേമനിധി ബോർഡിനും മുഖ്യമന്ത്രിക്കും കത്ത് അയച്ചതായും ബഹ്റൈൻ നവകേരള വാർത്താകുറിപ്പിലൂടെ അറിയിച്ചു.

The post പ്രവാസി പെന്‍ഷന്‍ ഉടന്‍ വിതരണം ചെയ്യണം: ബഹ്‌റൈൻ നവകേരള appeared first on Starvision News Malayalam.

മനാമ: വ്യാജ സാലറി സർട്ടിഫിക്കറ്റുകളും ബാങ്ക് സ്റ്റേറ്റ്മെന്റുകളും ഉപയോഗിച്ച് ലോൺ നേടാൻ ശ്രമിച്ച 24 ഏഷ്യൻ പൗരന്മാരെ ബഹ്റൈൻ അധികൃതർ പിടികൂടി. ഇലക്ട്രോണിക് ധനകാര്യ സ്ഥാപനത്തിൽ നിന്ന് ലോൺ ലഭിക്കുന്നതിനായി വ്യാജ രേഖകൾ സമർപ്പിച്ചതിനെ തുടർന്നാണ് നടപടി.

ബഹ്റൈനകത്തും പുറത്തുമായി പ്രവർത്തിച്ചിരുന്ന ഒരു ശൃംഖലയാണ് തട്ടിപ്പിന് പിന്നിലെന്ന് ആഭ്യന്തര മന്ത്രാലയം വ്യക്തമാക്കി. വ്യാജ ബാങ്ക് സ്റ്റേറ്റ്മെന്റുകൾ, കൃത്രിമമായി തയ്യാറാക്കിയ സാലറി സർട്ടിഫിക്കറ്റുകൾ, വ്യാജ കമ്പനി സീലുകൾ എന്നിവ ഉപയോഗിച്ചാണ് ഇവർ ലോൺ അപേക്ഷകൾ സമർപ്പിച്ചത്.

അപേക്ഷകരുടെ വരുമാനം യഥാർത്ഥത്തേക്കാൾ കൂടുതലായി കാണിച്ച് ധനകാര്യ സ്ഥാപനത്തെ കബളിപ്പിക്കാനായിരുന്നു ശ്രമം. ഇത്തരത്തിൽ വ്യാജ രേഖകൾ ഉപയോഗിച്ച് ലോൺ നേടാനുള്ള ശ്രമമാണ് അന്വേഷണത്തിൽ കണ്ടെത്തിയത്.

ഒരു പരാതിയെ തുടർന്ന് ജനറൽ ഡയറക്ടറേറ്റ് ഓഫ് ആന്റി കറപ്ഷൻ, ഇക്കണോമിക് ആൻഡ് ഇലക്ട്രോണിക് സെക്യൂരിറ്റി നടത്തിയ അന്വേഷണത്തിലാണ് തട്ടിപ്പ് പുറത്തായത്. കേസുമായി ബന്ധപ്പെട്ട് പിടിയിലായവർക്കെതിരെ നിയമനടപടികൾ സ്വീകരിച്ചതായി അധികൃതർ അറിയിച്ചു.

The post ബഹ്റൈനിൽ വ്യാജ രേഖകൾ ഉപയോഗിച്ച് ലോൺ തട്ടിപ്പ്; 24 ഏഷ്യൻ പൗരന്മാർ പിടിയിൽ appeared first on Starvision News Malayalam.

കൊച്ചി: ഗൾഫ് മേഖലയിലെ സംഘർഷാവസ്ഥയെ തുടർന്ന് എയർ ഇന്ത്യ എക്സ്പ്രസിന്റെ രണ്ട് വിമാനങ്ങളുടെ യാത്ര മാറ്റി. ഇന്ന് രാത്രി കൊച്ചിയിൽ നിന്ന് പുറപ്പെടേണ്ടിയിരുന്ന ദോഹ, ബഹ്റൈൻ വിമാനങ്ങളാണ് നാളത്തേക്ക് മാറ്റിയത്.

ഇന്ന് രാത്രി 7 മണിക്ക് കൊച്ചിയിൽ നിന്ന് ദോഹയിലേക്ക് പുറപ്പെടേണ്ട എയർ ഇന്ത്യ എക്സ്പ്രസ് വിമാനം നാളെ പുലർച്ചെ 2.30ന് പുറപ്പെടുമെന്ന് അധികൃതർ അറിയിച്ചു.

രാത്രി 10 മണിക്ക് പുറപ്പെടേണ്ടിയിരുന്ന എയർ ഇന്ത്യ എക്സ്പ്രസിന്റെ ബഹ്റൈൻ വിമാനം നാളെ രാവിലെ 8 മണിക്ക് കൊച്ചിയിൽ നിന്ന് പുറപ്പെടും.

അതേസമയം, രാത്രി 8.30ന് കൊച്ചിയിൽ നിന്ന് പുറപ്പെടേണ്ടിയിരുന്ന എയർ ഇന്ത്യയുടെ ദമാം വിമാനം രാത്രി 10 മണിക്ക് പുറപ്പെടും. ഗൾഫ് മേഖലയിലെ സുരക്ഷാ സാഹചര്യം കണക്കിലെടുത്താണ് വിമാന സർവീസുകളിൽ മാറ്റം വരുത്തിയതെന്നാണ് വിവരം.

The post ഗൾഫ് സംഘർഷം: കൊച്ചിയിൽ നിന്നുള്ള എയർ ഇന്ത്യ എക്സ്പ്രസ് വിമാനങ്ങൾ വൈകും appeared first on Starvision News Malayalam.

മനാമ: സീറോ മലബാർ സഭയുടെ ഔദ്യോഗിക സംഘടനയായ എ.കെ.സി.സി.യുടെ ആഗോള സംഗമം ഒക്ടോബർ 19 മുതൽ 23 വരെ റോമിൽ വച്ച് മാർപാപ്പയുടെ സാന്നിധ്യത്തിൽ സംഘടിപ്പിക്കുന്നു. ആഗോളസംഗമത്തിലേക്കുള്ള പതാക പ്രയാണം വൈദ്യുതി വകുപ്പ് മന്ത്രി സണ്ണി ജോസഫ്, ഉന്നത വിദ്യാഭ്യാസ മന്ത്രി റോജി എം ജോൺ, ജലസേചന വകുപ്പ് മന്ത്രി മോൻസ് ജോസഫ്, ഗവൺമെന്റ് ചീഫ് വിപ്പ് അപു ജോൺ ജോസഫ് എന്നിവരുടെ സാന്നിധ്യത്തിൽ മേജർ ആർച്ച് ബിഷപ്പ്. മാർ റാഫേൽ തട്ടിൽ എ. കെ.സി.സി.ഗ്ലോബൽ പ്രസിഡന്റ് രാജീവ് കൊച്ചുപറമ്പിലിന് നൽകി ഉദ്ഘാടനം ചെയ്തു. ആഗോള കത്തോലിക്കാ സഭയുടെ തലവന്റെ സാന്നിധ്യം( മാർപാപ്പ ) എ.കെ.സി.സി.ക്ക് പുതിയ കരുത്ത് നൽകുമെന്ന് മാർ റാഫേൽ തട്ടിൽ അഭിപ്രായപ്പെട്ടു.

ആഗോള സംഗമ വേദിയായ റോമിൽ ഉയർത്തേണ്ട പതാക ഇന്ത്യയിലെ എല്ലാ സംസ്ഥാനങ്ങളിലും സഞ്ചരിച്ച്, എ.കെ.സി. സി.യുടെ ശക്തമായ സാന്നിധ്യമുള്ള 40 രാജ്യങ്ങളിലൂടെ യാത്ര ചെയ്ത് ഒക്ടോബർ 18ന് വൈകീട്ട് റോമിൽ എത്തിച്ചേരും. പതാക പ്രയാണ ഉദ്ഘാടന ചടങ്ങിൽ തൃശ്ശൂർ അതിരൂപത സഹായ മെത്രാൻ മാർ ടോണി നീലങ്കാവിൽ, മാർ ബോസ്കോ പുത്തൂർ,ഗ്ലോബൽ ഡയറക്ടർ ഫാ. ഫിലിപ്പ് കവിയിൽ, ജനറൽ സെക്രട്ടറി ജോസുകുട്ടി.ജെ.ഒഴുകയിൽ, മിഡിലീസ്റ്റ് പ്രസിഡണ്ടും, ഗ്ലോബൽ വൈസ് പ്രസിഡണ്ടുമായ ഷെവലിയാർ ഡേവിസ് എടക്കളത്തൂർ, വൈസ് പ്രസിഡണ്ട് മാരായ ബെന്നി ആന്റണി, ട്രീസ ലിസ് സെബാസ്റ്റ്യൻ ഗ്ലോബൽ മീറ്റ് കൺവീനറും ഗ്ലോബൽ വൈസ് പ്രസിഡണ്ടുമായ ബെന്നി പുളിക്കക്കര, ഗ്ലോബൽ മീറ്റ് മിഡിലീസ്റ്റ് കൺവീനറും, ഗ്ലോബൽ സെക്രട്ടറിയും, ബഹ്റൈൻ എ.കെ.സി.സി പ്രസിഡണ്ടുമായ ചാൾസ് ആലുക്ക, എന്നിവർ സംസാരിച്ചു.

ആഗോള സമ്മേളനത്തിന്റെ ഭാഗമായി ദേശീയ പ്രതിനിധി സമ്മേളനം ഓഗസ്റ്റ് 1, 2, തീയതികളിൽ കല്യാൺ രൂപതയുടെ ആസ്ഥാനമായ നവീ- മുംബൈയിൽ സംഘടിപ്പിക്കുന്നുണ്ട്. ഓഗസ്റ്റ്,സെപ്റ്റംബർ മാസങ്ങളിൽ ആഫ്രിക്ക, യു.എസ്. എ. ഓസ്ട്രേലിയ,യൂറോപ്പ്, എന്നിവിടങ്ങളിലെയും പ്രതിനിധി സമ്മേളനങ്ങൾക്ക് ശേഷമാണ് എ.കെ.സി. സി.ആഗോള സംഗമം റോമിൽ സംഘടിപ്പിച്ചിരിക്കുന്നത്. എ.കെ.സി.സി.ആഗോള പ്രതിനിധി സമ്മേളനത്തിൽ ഉയർത്തേണ്ട പതാക ബഹ്റൈനിലും എത്തിച്ചേരുമെന്ന് ഭാരവാഹികൾ അറിയിച്ചു.

The post മാർപാപ്പയുടെ സാന്നിധ്യം കൊണ്ട് എ.കെ.സി.സി. ആഗോള സംഗമം തങ്ക ലിപികളിൽ ആലേഖനം ചെയ്യും: മേജർ ആർച്ച് ബിഷപ്പ് മാർ റാഫേൽ തട്ടിൽ appeared first on Starvision News Malayalam.

ഇന്ന് രാവിലെ താമസ സ്ഥലത്ത് വെച്ചാണ് മരണം സംഭവിച്ചത്. ബഹ്‌റൈനിലെ റിഫയിൽ പ്രവർത്തിക്കുന്ന വെജിറ്റബിൾ ഷോപ്പിൽ ജോലി ചെയ്തു വരികയായിരുന്നു. കഴിഞ്ഞ വർഷം ഡിസംബറിലാണ് തൊഴിൽ ആവശ്യാർത്ഥം ഷംസുദ്ധീൻ ബഹ്‌റൈനിലെത്തിയത്.

മൃതശരീരം നാട്ടിലേക്ക് അയക്കുന്നതിനുള്ള നടപടികൾ കെഎംസിസി ബഹ്‌റൈൻ മയ്യിത്ത് പരിപാലന വിഭാഗത്തിന്റെ നേതൃത്വത്തിൽ പുരോഗമിക്കുകയാണ്.

The post ബഹ്‌റൈനിൽ കോഴിക്കോട് സ്വദേശി ഹൃദയാഘാതത്തെ തുടർന്ന് മരിച്ചു appeared first on Starvision News Malayalam.

മനാമ: ഒ.ഐ.സി.സി വനിതാ വിഭാഗത്തിന്റെ നേതൃത്വത്തിൽ ‘പ്രിയദർശിനി കുടുംബസംഗമം’ സംഘടിപ്പിച്ചു. പരിപാടിയിൽ നിരവധി അംഗങ്ങളും കുടുംബാംഗങ്ങളും പങ്കെടുത്തു.

കുടുംബസംഗമത്തിന്റെ ഭാഗമായി വിവിധ കലാപരിപാടികളും ജ്വാല മ്യൂസിക് ബാൻഡിന്റെ ഗാനമേളയും അരങ്ങേറി. കുട്ടികളുടെയും മുതിർന്നവരുടെയും വൈവിധ്യമാർന്ന കലാപ്രകടനങ്ങൾ പരിപാടിക്ക് കൂടുതൽ മികവ് നൽകി.

വനിതാ വിഭാഗം പ്രസിഡന്റ് മിനി മാത്യു അധ്യക്ഷത വഹിച്ച ചടങ്ങിൽ ഒ.ഐ.സി.സി വർക്കിംഗ് പ്രസിഡന്റ് ബോബി പാറയിൽ ഉദ്ഘാടനം നിർവഹിച്ചു. ജനറൽ സെക്രട്ടറി സിജി തോമസ് സ്വാഗതം ആശംസിച്ചു.

ഒ.ഐ.സി.സി ഗ്ലോബൽ കമ്മിറ്റി അംഗം ബിനു കുന്നന്താനം, നാഷണൽ കമ്മിറ്റി ഭാരവാഹികളായ ഗിരീഷ് കാളിയത്ത്, സിൻസൺ ചാക്കോ പുലിക്കോട്ടിൽ, നസീം തൊടിയൂർ, ജേക്കബ് തേക്കുതോട്, പ്രദീപ് മേപ്പയൂർ, റിജിത് മൊട്ടപ്പാറ, രഞ്ജൻ കച്ചേരി, ജോണി താമരശേരി തുടങ്ങിയവർ ആശംസകൾ അറിയിച്ചു.

ജില്ലാ ഭാരവാഹികളായ അലക്സ് മഠത്തിൽ, സൽമാൻ ഫാരിസ്, റംഷാദ് അയിലക്കാട്, ശ്രീജിത്ത് പനായി, വില്യം ജോൺ, സിജു പുനവേലി, നിസാർ കുന്നംകുളം, രഞ്ജിത്ത് അനുരാജ്, ബിജു സദൻ എന്നിവരും പരിപാടിയിൽ പങ്കെടുത്തു.

വനിതാ വിഭാഗം ഭാരവാഹികളായ ഷീജ നടരാജൻ, ശോഭാ സജി, ലിൻസി രാജു കല്ലുംപുറം, ആനി അനു, സന്ധ്യ രഞ്ജൻ, സൂര്യ റിജിത്, ഷൈനി ജോണി, രമ്യ പ്രവിൽദാസ്, ഷംന ബിജു, ബിന്ദു റോയ്, നിഷാ ബോബി, മേരി സൈമൺ, ശോഭന ഭവാനി തുടങ്ങിയവർ പരിപാടിക്ക് നേതൃത്വം നൽകി.

ഏകദേശം 150 ഓളം പേർ പങ്കെടുത്ത കുടുംബസംഗമത്തിൽ അഹദ്, സജ്ന നൗഫൽ എന്നിവർ അവതാരകരായി പ്രവർത്തിച്ചു. വനിതാ വിഭാഗം ട്രഷറർ നിഷാ സാമുവേൽ നന്ദി അറിയിച്ചു.

The post ഒ.ഐ.സി.സി വനിതാ വിഭാഗത്തിന്റെ നേതൃത്വത്തിൽ ‘പ്രിയദർശിനി കുടുംബസംഗമം’ സംഘടിപ്പിച്ചു appeared first on Starvision News Malayalam.

മനാമ : ബഹ്‌റൈനിലെ കലാ-സാംസ്കാരിക രംഗത്ത് നാല് ദശകത്തിലേറെയായി നവീന സങ്കേതങ്ങളിലൂടെയും മികച്ച സംഘാടനത്തിലൂടെയും ബഹ്‌റൈൻ നാടകലോകത്തിന് പുതിയ അനുഭവങ്ങൾ സമ്മാനിക്കുന്ന പുരോഗമന കലാ-സാംസ്കാരിക-ജീവകാരുണ്യ സംഘടനയായ ബഹ്‌റൈൻ പ്രതിഭ ഏർപ്പെടുത്തുന്ന ‘പ്രതിഭ അന്താരാഷ്ട്ര നാടക പുരസ്കാരം 2026’നുള്ള രചനകൾ ക്ഷണിച്ചു.
ലോകത്തെവിടെയും താമസിക്കുന്ന ഇന്ത്യൻ പൗരന്മാർക്ക് പങ്കെടുക്കാവുന്ന ഈ മത്സരത്തിൽ വിജയി ആകുന്നയാൾക്ക് 25,000 രൂപ ക്യാഷ് അവാർഡ്, പപ്പൻ ചിരന്തന സ്മാരക ഫലകം, കീർത്തിപത്രം എന്നിവ ഉൾപ്പെടുന്ന പുരസ്കാരമാണ് നൽകുന്നത്.. ഇന്ത്യയിലെ നാടകരംഗത്തെ പ്രമുഖ വ്യക്തിത്വങ്ങൾ അടങ്ങുന്ന ജൂറി സമിതിയാണ് രചനകൾ തിരഞ്ഞെടുക്കുക.

പുരസ്കാരത്തിന് പരിഗണിക്കുന്ന രചനകൾ പുരോഗമനാശയങ്ങൾ ഉൾക്കൊള്ളുന്നതും ഒരു മണിക്കൂർ വരെ അവതരണ ദൈർഘ്യമുള്ളവയും
2025 ജനുവരി 1-ന് ശേഷം പ്രസിദ്ധീകരിച്ചതോ അപ്രസിദ്ധീകൃതമോ ആയ മൗലിക രചനകൾ ആയിരിക്കണം. നാടകരചനകൾ 2026 ആഗസ്റ്റ് 31നകം bpdramaawards@gmail.com എന്ന ഇമെയിൽ വിലാസത്തിൽ പി.ഡി. എഫ് ഫോർമാറ്റിൽ ലഭിക്കണം. രചനയിൽ രചയിതാവിന്റെ പേരോ മറ്റ് സൂചനകളോ ഉൾപ്പെടുത്തരുതെന്നും രചയിതാവിന്റെ വ്യക്തിഗത വിവരങ്ങൾ (പേര്, മേൽവിലാസം, മൊബൈൽ നമ്പർ, ഇമെയിൽ) പ്രത്യേക അനുബന്ധമായി അയക്കണമെന്നും ബഹ്‌റൈൻ പ്രതിഭ ജനറൽ സെക്രട്ടറി സുലേഷ്, പ്രസിഡന്റ് മഹേഷ് കെ.വി, നാടകവേദി കൺവീനർ ലിജിത്ത് എന്നിവർ പത്രക്കുറിപ്പിലൂടെ അറിയിച്ചു.

The post “ബഹ്‌റൈൻ പ്രതിഭ അന്താരാഷ്ട്ര നാടക പുരസ്കാരം 2026”: നാടകരചനകൾ ക്ഷണിക്കുന്നു appeared first on Starvision News Malayalam.

മനാമ: ഭീകരസംഘടനയിൽ ചേർന്നുവെന്നാരോപിച്ച് 18 പ്രതികൾക്കെതിരെ രജിസ്റ്റർ ചെയ്ത കേസ് ബഹ്‌റൈൻ ഹൈ ക്രിമിനൽ കോടതി പരിഗണിച്ചതായി ടെററിസം ക്രൈംസ് പ്രോസിക്യൂഷൻ മേധാവി അറിയിച്ചു. പ്രതികളിൽ 15 പേർ നിലവിൽ കസ്റ്റഡിയിലാണെന്നും മൂന്ന് പേർ ഒളിവിലാണെന്നും പ്രോസിക്യൂഷൻ വ്യക്തമാക്കി.

ഭരണഘടനയും രാജ്യത്തെ നിയമങ്ങളും പ്രവർത്തനരഹിതമാക്കുക, സർക്കാർ സ്ഥാപനങ്ങളുടെ പ്രവർത്തനം തടസപ്പെടുത്തുക, ദേശീയ ഐക്യം ദുർബലപ്പെടുത്തുക, ബഹ്‌റൈന്റെ ഭരണഘടനാ സംവിധാനത്തിൽ മാറ്റം വരുത്തുക തുടങ്ങിയ ലക്ഷ്യങ്ങളോടെയാണ് സംഘടന പ്രവർത്തിച്ചതെന്നാണ് പ്രോസിക്യൂഷന്റെ ആരോപണം.

‘വിലായത്ത് അൽ ഫഖീഹ്’ ആശയം പ്രചരിപ്പിക്കുകയും ഇറാന്റെ പരമോന്നത നേതാവിനോടുള്ള വിധേയത്വം പ്രോത്സാഹിപ്പിക്കുകയും ഇറാന്റെ രാഷ്ട്രീയ അധികാരത്തിന് കീഴടങ്ങണമെന്ന നിലപാട് പ്രചരിപ്പിക്കുകയും ചെയ്തതായും കുറ്റപത്രത്തിൽ ആരോപിക്കുന്നു.

ആരാധനാലയങ്ങൾ, മാതങ്ങൾ, ഹുസൈനിയകൾ എന്നിവയുടെ നിയന്ത്രണം ഏറ്റെടുത്ത് സംഘടനയുടെ ആശയങ്ങൾ പ്രചരിപ്പിക്കാൻ പ്രതികൾ ശ്രമിച്ചതായും ബഹ്‌റൈന്റെ ഭരണസംവിധാനത്തിനെതിരെ ജനങ്ങളെ പ്രേരിപ്പിച്ചതായും പ്രോസിക്യൂഷൻ പറഞ്ഞു. ഭീകരപ്രവർത്തനങ്ങൾ, കലാപം, അട്ടിമറി എന്നിവയ്ക്ക് പ്രേരണ നൽകിയതായും രാജ്യത്തിന്റെ സ്ഥിരത തകർക്കുന്ന പ്രവർത്തനങ്ങൾക്ക് പിന്തുണ നൽകിയതായും ആരോപണമുണ്ട്.

സംഘടനയുടെ പ്രവർത്തനങ്ങൾക്കായി പണം ശേഖരിക്കുകയും വിനിയോഗിക്കുകയും ചെയ്തതായും അന്വേഷണത്തിൽ കണ്ടെത്തിയെന്നാണ് പ്രോസിക്യൂഷന്റെ നിലപാട്.

നിയമപരമായ നടപടിക്രമങ്ങൾ പാലിച്ചാണ് അന്വേഷണം നടത്തിയതെന്നും കസ്റ്റഡിയിലുള്ള പ്രതികളെ നിയമാനുസൃതമായി ചോദ്യം ചെയ്തതായും അധികൃതർ അറിയിച്ചു. ചിലരെ അഭിഭാഷകരുടെ സാന്നിധ്യത്തിലാണ് ചോദ്യം ചെയ്തത്. കുടുംബങ്ങളുമായി ബന്ധപ്പെടാനും ആരോഗ്യപരിചരണം ലഭിക്കാനും പ്രതികൾക്ക് അവസരം നൽകിയതായും പ്രോസിക്യൂഷൻ വ്യക്തമാക്കി.

The post ബഹ്‌റൈനിൽ 18 പ്രതികൾക്കെതിരായ ഭീകരവാദക്കേസ് ഹൈ ക്രിമിനൽ കോടതി പരിഗണിച്ചു appeared first on Starvision News Malayalam.

മനാമ: കേരള പ്രവാസി ക്ഷേമനിധി ബോർഡിന്റെ പ്രവാസി പെൻഷൻ കഴിഞ്ഞ മൂന്ന് മാസമായി വിതരണം ചെയ്യാത്തത് അത്യന്തം പ്രതിഷേധാർഹവും ആയിരക്കണക്കിന് പ്രവാസി കുടുംബങ്ങളെ ദുരിതത്തിലാഴ്ത്തുന്നതുമായ നടപടിയാണെന്ന് ബഹ്റൈൻ പ്രതിഭ പ്രസ്താവനയിൽ പറഞ്ഞു.

ജീവിതത്തിന്റെ നല്ലകാലം വിദേശത്ത് കഠിനാധ്വാനം ചെയ്ത് കേരളത്തിന്റെ സമ്പദ്‌വ്യവസ്ഥയ്ക്ക് വലിയ സംഭാവന നൽകിയ പ്രവാസികളാണ് ക്ഷേമനിധിയിലേക്ക് വർഷങ്ങളായി വിഹിതം അടച്ച് ഈ പദ്ധതിയുടെ ഭാഗമായത്. വാർധക്യകാലത്ത് ആശ്വാസമാകേണ്ട പെൻഷൻ പോലും കൃത്യസമയത്ത് ലഭിക്കാത്ത സാഹചര്യം ക്ഷേമപദ്ധതികളുടെ വിശ്വാസ്യതയെ തന്നെ ചോദ്യം ചെയ്യുന്നതാണെന്ന്.

പ്രതിമാസം ലഭിക്കുന്ന ഈ പെൻഷനെ ആശ്രയിച്ചാണ് നിരവധി വയോജന പ്രവാസികളും അവരുടെ കുടുംബങ്ങളും ചികിത്സ, മരുന്ന്, ദൈനംദിന ജീവിതച്ചെലവുകൾ എന്നിവ നിർവഹിക്കുന്നത്. മൂന്ന് മാസത്തെ പെൻഷൻ കുടിശ്ശികയായതോടെ നിരവധി കുടുംബങ്ങൾ സാമ്പത്തിക പ്രതിസന്ധിയിലായിരിക്കുകയാണ്. ഇത്തരമൊരു അവസ്ഥ പ്രവാസികളോടുള്ള കടുത്ത അവഗണനയുടെ പ്രതിഫലനമാണെന്നും ബഹ്റൈൻ പ്രതിഭ ചൂണ്ടിക്കാട്ടി.

ക്ഷേമനിധി ബോർഡിന് ആവശ്യമായ സാമ്പത്തിക സഹായം സർക്കാർ അടിയന്തരമായി ലഭ്യമാക്കി, കുടിശ്ശികയായ മുഴുവൻ പെൻഷനും യാതൊരു കാലതാമസവുമില്ലാതെ വിതരണം ചെയ്യണം. ഭാവിയിൽ ഇത്തരം കാലതാമസങ്ങൾ ആവർത്തിക്കാതിരിക്കാനുള്ള സ്ഥിരമായ സാമ്പത്തിക സംവിധാനവും സമയബന്ധിതമായ പെൻഷൻ വിതരണ സംവിധാനവും ഉറപ്പാക്കണമെന്നും ബഹ്റൈൻ പ്രതിഭ ആവശ്യപ്പെട്ടു.

പ്രവാസികളുടെ ക്ഷേമം സംരക്ഷിക്കുന്നതിൽ സർക്കാർ കൂടുതൽ ഉത്തരവാദിത്വത്തോടെ ഇടപെടണമെന്നും, പ്രവാസികളുടെ ന്യായമായ അവകാശങ്ങൾ ഉറപ്പാക്കാൻ അടിയന്തര നടപടികൾ സ്വീകരിക്കണമെന്നും ബഹ്റൈൻ പ്രതിഭ സെക്രട്ടറി വി കെ സുലേഷ് പ്രസിഡന്റ് കെ വി മഹേഷ് എന്നിവർ വാർത്താകുറിപ്പിലൂടെ അറിയിച്ചു.

The post പ്രവാസി പെൻഷൻ വിതരണം പുനരാരംഭിക്കണം: ബഹ്റൈൻ പ്രതിഭ appeared first on Starvision News Malayalam.