Author: News Desk

അട്ടപ്പാടി മധു വധക്കേസിൽ സാക്ഷികൾ കൂറുമാറിയ പശ്ചാത്തലത്തിൽ മുതിർന്ന കോൺഗ്രസ് നേതാവ് വി.എം സുധീരൻ മുഖ്യമന്ത്രി പിണറായി വിജയന് കത്തയച്ചു. ഭരണസംവിധാനത്തെയും നിയമവ്യവസ്ഥയേയും നോക്കുകുത്തിയാക്കിയും ജനങ്ങളുടെ മുന്നില്‍ പരിഹാസ്യമാക്കിയുമാണ് സാക്ഷികളുടെ കൂറുമാറ്റം. നേരത്തെ നൽകിയ മൊഴികൾക്ക് വിരുദ്ധമായി സാക്ഷികൾ കൂറുമാറിയതിന് പിന്നിൽ കുറ്റവാളികളെ സംരക്ഷിക്കാനുള്ള ഗൂഡാലോചനയാണെന്ന് വ്യക്തമാണെന്നും അദ്ദേഹം കത്തിൽ പറയുന്നു. ആദിവാസികളുടെ ക്ഷേമവും സുരക്ഷയും ഉറപ്പാക്കാൻ ഉത്തരവാദിത്തമുള്ള സംസ്ഥാനം ഇതിനെല്ലാം നിശബ്ദ സാക്ഷിയാവുകയും നിഷ്ക്രിയമായ രീതിയിൽ വെറും കാഴ്ചക്കാരായി മാറുകയും ചെയ്യുന്നത് ജനാധിപത്യ കേരളത്തിന് വലിയ നാണക്കേടാണ്. ഈ കൂട്ട കൂറുമാറ്റത്തിൽ മുഖ്യമന്ത്രി അടിയന്തരമായി ഇടപെടണമെന്നും കൂട്ട കൂറുമാറ്റത്തെക്കുറിച്ച് സമഗ്രമായ അന്വേഷണം നടത്തണമെന്നും,കൂറുമാറ്റത്തിനായി അനാവശ്യ സ്വാധീനവും കടുത്ത സമ്മർദ്ദവും ചെലുത്തിയവർക്കെതിരെ കർശന നിയമനടപടി സ്വീകരിക്കണമെന്നും സുധീരൻ ആവശ്യപ്പെട്ടു.

കോഴിക്കോട്: ബാലഗോകുലം പരിപാടിയില്‍ കോഴിക്കോട് മേയർ ബീന ഫിലിപ്പ് പങ്കെടുത്ത നിലപാട് ശരിയല്ലെന്ന് സിപിഐ(എം) കോഴിക്കോട് ജില്ലാ കമ്മിറ്റി. മേയറുടെ നടപടി സിപിഐ(എം) ഉയർത്തിപ്പിടിക്കുന്ന പ്രഖ്യാപിത നിലപാടിന് വിരുദ്ധമാണെന്നും പ്രസ്താവനയിൽ പറയുന്നു. മേയർ ബീന ഫിലിപ്പ് സംഘപരിവാർ സംഘടനയായ ബാലഗോകുലം കോഴിക്കോട് സംഘടിപ്പിച്ച മാതൃസമ്മേളനം ഉദ്ഘാടനം ചെയ്ത് സംസാരിച്ചത് വിവാദമായിരുന്നു. ഇതിന്‍റെ അടിസ്ഥാനത്തിലാണ് സി.പി.ഐ(എം) കോഴിക്കോട് ജില്ലാ കമ്മിറ്റി ഇപ്പോൾ പ്രസ്താവന ഇറക്കിയിരിക്കുന്നത്.

ഏറെക്കാലമായി കാത്തിരിക്കുന്ന അതിവേഗ 5ജി സേവനങ്ങൾ ഒരു മാസത്തിനകം ആരംഭിക്കുമെന്ന് പ്രതീക്ഷിക്കുന്നതായി ടെലികോം സഹമന്ത്രി ദേവു സിംഗ് ചൗഹാൻ. ഏഷ്യ, ഓഷ്യാനിയ മേഖലകൾക്കായുള്ള ഇന്‍റർനാഷണൽ ടെലികമ്മ്യൂണിക്കേഷൻ യൂണിയന്‍റെ റീജിയണൽ സ്റ്റാൻഡേർഡൈസേഷൻ ഫോറത്തിന്‍റെ (ആർഎസ്എഫ്) ഉദ്ഘാടനച്ചടങ്ങിൽ സംസാരിക്കവേ, ഈ വർഷം അവസാനത്തോടെ 5 ജി സേവനങ്ങൾക്കായി ഇന്ത്യ തദ്ദേശീയമായി വികസിപ്പിച്ചെടുത്തതും നിർമ്മിച്ചതുമായ 5 ജി ടെലികോം ഗിയറുകൾ വിന്യസിക്കുമെന്ന് ചൗഹാൻ പറഞ്ഞു. “ഏകദേശം ഒരു മാസത്തിനുള്ളിൽ, 5 ജി മൊബൈൽ സേവനങ്ങൾ രാജ്യത്ത് ആരംഭിക്കും, ഇത് എല്ലാ മേഖലകളുടെയും വികസനത്തിൽ ഗുണപരമായ പ്രത്യാഘാതങ്ങൾ സൃഷ്ടിക്കും. തദ്ദേശീയമായ 6 ജി സ്റ്റാക്കിന്‍റെ വികസനത്തിനായി പ്രവർത്തിക്കുന്ന 6ജി ടെക്നോളജി ഇന്നൊവേഷൻസ് ഗ്രൂപ്പും രൂപീകരിച്ചിട്ടുണ്ട്, “ചൗഹാൻ പറഞ്ഞു.

കർണാടക : ബെംഗളൂരുവിലെ ശ്രീരംഗപട്ടണത്തെ രംഗനത്തിട്ടു പക്ഷിസങ്കേതത്തിന് റാംസർ സൈറ്റ് പദവി നൽകി. കേന്ദ്ര പരിസ്ഥിതി മന്ത്രാലയമാണ് ഇക്കാര്യം പ്രഖ്യാപിച്ചത്. കർണ്ണാടകയിൽ ഈ പദവി ലഭിക്കുന്ന ആദ്യ തണ്ണീർത്തടമാണ് രംഗനത്തിട്ടു. ഇതുവരെ രാജ്യത്തെ 64 തണ്ണീർത്തടങ്ങൾക്കാണ് റാംസർ പദവി ലഭിച്ചിട്ടുള്ളത്. 1971 ഫെബ്രുവരി 12 ന് ഇറാനിലെ റാംസർ പട്ടണത്തിൽ 18 രാഷ്ട്രങ്ങളുടെ പ്രതിനിധികൾ ഒപ്പുവച്ച കരാർ പ്രകാരം, പ്രത്യേകമായി സംരക്ഷിക്കപ്പെടേണ്ട പ്രദേശങ്ങളിൽ പരിസ്ഥിതിക്ക് ദോഷം ഉണ്ടാക്കുന്ന പ്രവർത്തനങ്ങൾ നിയന്ത്രിക്കാൻ സർക്കാരുകൾ ബാധ്യസ്ഥരാണ്. കാവേരി നദിക്ക് സമീപം 40 ഏക്കറിലധികം വിസ്തൃതിയിൽ ചിതറിക്കിടക്കുന്ന ആറ് ദ്വീപുകളുടെ സംഗമസ്ഥാനമാണ് കർണാടകയുടെ പക്ഷികാശിയെന്ന് അറിയപ്പെടുന്ന രംഗനത്തിട്ടു. ഇന്ത്യയുടെ പക്ഷിമനുഷ്യനായ ഡോ.സലിം അലിയാണ് ഈ സ്ഥലത്തിന്‍റെ പ്രാധാന്യം ആദ്യമായി തിരിച്ചറിഞ്ഞത്. 1940-ൽ രംഗനത്തിട്ടുവിനെ പക്ഷി സംരക്ഷണ കേന്ദ്രമായി പ്രഖ്യാപിച്ചു. ഓരോ വർഷവും നവംബർ മുതൽ ജൂൺ വരെ 200 ലധികം വ്യത്യസ്ത ദേശാടനപ്പക്ഷികൾ രംഗനത്തിട്ടുവിലേക്കു വരുന്നു. തടാകക്കരയിലെ മരത്തിന്‍റെ മുകളിൽ കൂടുകൂട്ടി മുട്ടയിടുകയും കുഞ്ഞുങ്ങളെ വിരിയിക്കുകയും…

ന്യൂഡല്‍ഹി: വ്യാപകമായ പ്രതിഷേധങ്ങൾക്കിടെ വൈദ്യുതി മേഖലയെ സ്വകാര്യവത്കരിക്കാൻ അവസരമൊരുക്കുന്ന വൈദ്യുതി (ഭേദഗതി) ബിൽ ലോക്സഭയിൽ അവതരിപ്പിച്ചു. കോൺഗ്രസ്, സിപിഎം, തൃണമൂൽ കോൺഗ്രസ്, ആർഎസ്പി എന്നീ പാർട്ടികൾ ബില്ലിനെതിരെ ശക്തമായി രംഗത്തെത്തി. ബിൽ ഭരണഘടനയുടെ ഫെഡറൽ തത്വങ്ങളുടെ ലംഘനമാണെന്നും സംസ്ഥാനങ്ങളുമായി വേണ്ടത്ര കൂടിയാലോചന നടത്താതെയാണ് ബിൽ കൊണ്ടുവരുന്നതെന്നും പാർട്ടികൾ ആരോപിച്ചു. അതേസമയം, ജനങ്ങളെ തെറ്റിദ്ധരിപ്പിക്കുക എന്ന ലക്ഷ്യത്തോടെ പ്രതിപക്ഷ പാർട്ടികൾ ബില്ലിനെതിരെ തെറ്റായ വിവരങ്ങൾ പ്രചരിപ്പിക്കുകയാണെന്ന് കേന്ദ്ര ഊർജ്ജ മന്ത്രി ആർകെ സിംഗ് ആരോപിച്ചു. ബിൽ കൂടുതൽ പരിശോധനയ്ക്കായി സ്റ്റാൻഡിംഗ് കമ്മിറ്റിക്ക് വിടുമെന്ന് സർക്കാർ നേരത്തെ തന്നെ വ്യക്തമാക്കിയിട്ടുണ്ടെന്നും മന്ത്രി പറഞ്ഞു. “ഈ ബിൽ കർഷകർക്ക് നിലവിലുള്ള സബ്സിഡികൾ വെട്ടിക്കുറയ്ക്കുന്നില്ല. കർഷകർക്കുള്ള സൗജന്യ വൈദ്യുതി തുടരും. ഈ ബില്ലിൽ സബ്സിഡി നിർത്തലാക്കാൻ വ്യവസ്ഥയില്ല. ജനങ്ങളെ തെറ്റിദ്ധരിപ്പിക്കാൻ പ്രതിപക്ഷം തെറ്റായ പ്രസ്താവനകൾ നടത്തുകയാണ്. എല്ലാ സംസ്ഥാനങ്ങളോടും പങ്കാളികളോടും കൂടിയാലോചിച്ചിട്ടുണ്ട്. ഇത് ജനങ്ങൾക്കും കർഷകർക്കും അനുകൂലമായ ബില്ലാണെന്നും മന്ത്രി പറഞ്ഞു.

ബിർമിങ്ഹാം: കോമൺവെൽത്ത് ഗെയിംസിലെ അവസാന ദിവസമായ ഇന്ന് ഇന്ത്യൻ ബാഡ്മിന്‍റൺ താരങ്ങൾ കൂടുതൽ സ്വർണ്ണ മെഡലുകൾ ലക്ഷ്യമിട്ടാണ് ഇറങ്ങുന്നത്. ബാഡ്മിന്‍റണിൽ ഇന്ത്യയുടെ ഉറച്ച മെഡൽ പ്രതീക്ഷയായ പിവി സിന്ധു ഇന്ന് പോരാട്ടത്തിന് ഇറങ്ങും . ലക്ഷ്യ സെന്നും ഫൈനൽ മത്സരത്തിനായി ഇന്നിറങ്ങുന്നുണ്ട്. പുരുഷ ഹോക്കി ഫൈനലിൽ ഇന്ത്യ ഓസ്ട്രേലിയയെ നേരിടും. ടേബിൾ ടെന്നീസിൽ അചന്ത ശരത് ഇന്ന് സ്വർണത്തിനായി മത്സരിക്കും.

ഇന്ത്യൻ സൂപ്പർ ലീഗ് ക്ലബ് എഫ്സി ഗോവയുടെ ഇന്ത്യൻ സെന്‍റർ ബാക്ക് ഐബൻ ഡോഹ്ലിങ് ക്ലബിൽ തുടരും എന്ന് റിപ്പോർട്ട്. ഇതോടെ ഗോവ ആരാധകരുടെ ആശങ്ക ഒഴിഞ്ഞു. മേഘാലയ സ്വദേശിയായ ഐബൻ 2019 മുതൽ ഗോവയുടെ ഭാഗമാണ്. കഴിഞ്ഞ സീസണിൽ എല്ലാ ടൂർണമെന്റുകളിൽ നിന്നുമായി 20 മത്സരങ്ങൾ ഗോവ ജേഴ്സിയിൽ 26 കാരനായ താരം കളിച്ചിട്ടുണ്ട്. എന്നാൽ, ഐഎസ്എൽ ക്ലബായ ഈസ്റ്റ് ബംഗാൾ ഇത്തവണ ഐബനെ ഉറ്റുനോക്കുന്നതായി ചില റിപ്പോർട്ടുകൾ ഉണ്ടായിരുന്നു. ഇക്കാര്യത്തിലാണ് വ്യക്തത വന്നിരിക്കുന്നത്. സൂപ്പർ ക്ലബ് ഷില്ലോംഗ് ലജോങ്ങിന്‍റെ അക്കാദമിയിലൂടെയാണ് ഐബൻ വളർന്നത്. പിന്നീട് അദ്ദേഹം ടാറ്റാ ഫുട്ബോൾ അക്കാദമിയിലേക്ക് മാറി. എന്നിരുന്നാലും, 2016 ൽ ഷില്ലോംഗ് ലജോങ്നായി അദ്ദേഹം പ്രൊഫഷണൽ അരങ്ങേറ്റം നടത്തി. മൂന്ന് സീസൺ ഐ ലീഗിൽ കളിച്ച ശേഷമാണ് ഐബൻ ഗോവയിലെത്തുന്നത്.

തിരുവനന്തപുരം: തിങ്കളാഴ്ച കാലാവധി അവസാനിക്കുന്ന ഓർഡിനൻസുകളിൽ ഒപ്പിടില്ലെന്ന് ഗവർണർ ആരിഫ് മുഹമ്മദ് ഖാൻ. ഓർഡിനൻസിന്‍റെ വിശദാംശങ്ങൾ പരിശോധിക്കാൻ തനിക്ക് സമയം വേണമെന്ന് ആരിഫ് മുഹമ്മദ് ഖാൻ ഡൽഹിയിൽ പറഞ്ഞു. ആസാദി കാ അമൃത് മഹോത്സവത്തിന്‍റെ ഭാഗമായുള്ള ഒരു യോഗത്തിൽ പങ്കെടുക്കാനാണ് അദ്ദേഹം ഡൽഹിയിലെത്തിയത്. എന്നാൽ വന്നതിന്‍റെ പിറ്റേന്ന് പതിമൂന്ന്, പതിനാല് ഫയലുകൾ ലഭിച്ചു. നാല് ദിവസത്തിനുള്ളിൽ ഇത്രയധികം ഫയലുകളിൽ പഠിക്കാതെ എങ്ങനെയാണ് ഒപ്പിടാൻ കഴിയുക? ഫയലിൽ എന്താണുള്ളതെന്ന് എനിക്കറിയണം, ഗവർണർ പറഞ്ഞു. നിയമസഭാ സമ്മേളനങ്ങൾ നടന്നപ്പോഴും ഓർഡിനൻസുകൾ നിയമമാക്കിയില്ല. ഓർഡിനൻസ് ഭരണം നല്ലതിനല്ലെന്നും പിന്നെന്തിനാണ് നിയമസഭയെന്നും ഗവർണർ ചോദിച്ചു.

കണ്ണൂർ : മങ്കിപോക്സ് ലക്ഷണങ്ങൾ കണ്ടതിനെ തുടർന്ന് വിദേശത്ത് നിന്നെത്തിയ കണ്ണൂർ സ്വദേശിനിയായ ഏഴ് വയസുകാരിയെ പരിയാരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇന്നലെ രാത്രി യുകെയിൽ നിന്നെത്തിയ കുട്ടിയെയാണ് രോഗലക്ഷണങ്ങൾ കാണിച്ചതിനെ തുടർന്ന് പരിയാരം മെഡിക്കൽ കോളേജ് ആശുപത്രിയിലെ പ്രത്യേക ഐസൊലേഷൻ മുറിയിൽ പ്രവേശിപ്പിച്ചത്. കുട്ടിയുടെ സ്രവം പരിശോധനയ്ക്കായി അയച്ചു.

കൊച്ചി: മുഖ്യമന്ത്രിക്കെതിരെ വീണ്ടും ഗുരുതര ആരോപണങ്ങളുമായി സ്വർണക്കടത്ത് കേസിലെ പ്രതി സ്വപ്ന സുരേഷ്. നിരോധിത സാറ്റലൈറ്റ് ഫോൺ ഉപയോഗിച്ചതിന് അറസ്റ്റിലായ യു എ ഇ പൗരനെ വിട്ടയക്കാൻ മുഖ്യമന്ത്രി ഇടപെട്ടുവെന്നാണ് സ്വപ്നയുടെ ആരോപണം. കോൺസുൽ ജനറലിന്‍റെ അഭ്യർത്ഥന പ്രകാരം ശിവശങ്കർ മുഖേനയാണ് യു.എ.ഇ പൗരനെ രക്ഷപ്പെടുത്തിയതെന്ന് സ്വപ്ന മാധ്യമങ്ങളോട് പറഞ്ഞു. ഭീകരവാദത്തിന് ഉപയോഗിക്കുന്ന സാറ്റലൈറ്റ് ഫോണാണ് തുറൈയ്യ എന്നും ഇത് ഇന്ത്യയിൽ നിരോധിച്ചതാണെന്നും സ്വപ്ന പറഞ്ഞു. കൊറിയൻ നിർമിത തുറൈയ്യ ഫോൺ കൈവശം വച്ചതിനാണ് യുഎഇ പൗരൻ അറസ്റ്റിലായത്. 2017 ജൂലൈ നാലിന് ഒമാൻ എയർവേയ്സ് വിമാനത്തിൽ കയറാനിരിക്കെ നെടുമ്പാശ്ശേരി വിമാനത്താവളത്തിൽ വെച്ചാണ് ഇയാളെ സി.ഐ.എസ്.എഫ് പിടികൂടിയത്. ഇയാളെ പിന്നീട് നെടുമ്പാശേരി പൊലീസിന് കൈമാറി,” സ്വപ്ന പറഞ്ഞു. ഇതുമായി ബന്ധപ്പെട്ട് യു.എ.ഇ കോൺസുലേറ്റിന് സന്ദേശം ലഭിച്ചിരുന്നു. കോൺസുൽ ജനറൽ ഉടൻ തന്നെ ബന്ധപ്പെടുകയും മുഖ്യമന്ത്രിയെ വിളിക്കാൻ ആവശ്യപ്പെടുകയും ചെയ്തു. ഇത്തരം പ്രശ്നങ്ങൾ ഉണ്ടാകുമ്പോൾ തന്നെ വിളിക്കണമെന്ന് മുഖ്യമന്ത്രി പറഞ്ഞിട്ടുണ്ടെന്നും അദ്ദേഹം പറഞ്ഞു.…