Author: News Desk

തിരുവനന്തപുരം: കിഫ്ബിക്കെതിരായ ഇ.ഡിയുടെ നടപടിയെ പരോക്ഷമായി വിമർശിച്ച് മുഖ്യമന്ത്രി പിണറായി വിജയൻ. നുണുക്കുവിദ്യകൊണ്ട് ഒന്നും തടയാനാവില്ല. രാജ്യം വികസിക്കരുതെന്ന് ചിന്തിക്കുന്ന ഒരു കൂട്ടര്‍ വന്നിട്ടുണ്ട്. കിഫ്ബി സംസ്ഥാനത്തിന്‍റെ വികസനത്തിനായി വിവിധ തരത്തിലാണ് പണം ഉപയോഗിക്കുന്നതെന്നും മുഖ്യമന്ത്രി പറഞ്ഞു. ധനുവച്ചപുരം അന്താരാഷ്ട്ര ഐടിഐ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഒരു വശത്ത് മലയോര ഹൈവേയും മറുവശത്ത് തീരദേശ ഹൈവേയും നമ്മുടെ അഭിമാനകരമായ പദ്ധതികളായി വരുന്നു. കിഫ്ബിയാണ് അതിന് പണം നൽകുന്നത്. നാട് നന്നാവരുതെന്ന് കരുതുന്നവർ എങ്ങനെയെങ്കിലും ഇതിനെയെല്ലാം ദുർബലപ്പെടുത്താൻ ശ്രമിക്കും. വികസനത്തെ എതിർക്കുന്നവരുടെ നിലപാട് ചവറ്റുകൊട്ടയിലാണെന്നും അദ്ദേഹം പറഞ്ഞു. കിഫ്ബി മസാല ബോണ്ടുകൾ ഇറക്കിയതിൽ ഫെമ നിയമത്തിന്‍റെ ലംഘനമുണ്ടെന്നാണ് ഇ.ഡി. നിലപാട്. ചോദ്യം ചെയ്യലിന് ഹാജരാകണമെന്ന് ആവശ്യപ്പെട്ട് മുൻ ധനമന്ത്രി തോമസ് ഐസക്കിന് ഇഡി നോട്ടീസ് നൽകിയിരുന്നു.

ന്യൂഡൽഹി: വായ്പകൾ തിരിച്ചുപിടിക്കാൻ ധനകാര്യ സ്ഥാപനങ്ങൾ സ്വീകരിക്കുന്ന തെറ്റായ രീതികൾക്കെതിരെ ആർബിഐ. വായ്പകൾ വീണ്ടെടുക്കുന്ന ഏജന്‍റുമാരെ നിയന്ത്രിക്കുകയാണ് റിസർവ് ബാങ്കിന്‍റെ ലക്ഷ്യം. ഡെലിവറി ഏജന്‍റുമാർക്കെതിരെ വ്യാപകമായ പരാതികൾ ഉയരുന്നതിനിടെയാണ് നടപടി. വായ്പകൾ തിരിച്ചുപിടിക്കാൻ ധനകാര്യ സ്ഥാപനങ്ങളെ സഹായിക്കുന്ന ഏജന്‍റുമാർ ആളുകളെ ഉപദ്രവിക്കുകയോ ഭീഷണിപ്പെടുത്തുകയോ ചെയ്യുന്നില്ലെന്ന് ഉറപ്പാക്കണമെന്ന് റിസർവ് ബാങ്ക് നിർദ്ദേശിച്ചു. വാക്കാലോ ശാരീരികമായോ വായ്പ എടുത്തവർക്ക് ഒരു തരത്തിലുമുള്ള ബുദ്ധിമുട്ടും ഉണ്ടാകാൻ പാടില്ലെന്നും റിസർവ് ബാങ്ക് വ്യക്തമാക്കി. ഏജന്‍റുമാരെ നിയമിക്കുമ്പോൾ പൊതുസ്ഥലങ്ങളിലും കുടുംബാംഗങ്ങളുടെയും സുഹൃത്തുക്കളുടെയും മുന്നിലും വായ്പയെടുത്തവരെ അപമാനിക്കരുതെന്ന് ബാങ്കുകളും ബാങ്കിംഗ് ഇതര ധനകാര്യ സ്ഥാപനങ്ങളും കർശന നിർദ്ദേശം നൽകണം. മൊബൈൽ, സോഷ്യൽ മീഡിയ വഴി അനാവശ്യ സന്ദേശങ്ങൾ അയക്കുന്നതും ഒഴിവാക്കണം.

കണ്ണൂർ: സംസ്ഥാനത്തെ പല മന്ത്രിമാരും അവരുടെ വകുപ്പുകളും സമ്പൂർണ പരാജയമാണെന്ന് പ്രതിപക്ഷ നേതാവ് വി.ഡി സതീശൻ. സർക്കാരിന്റെ പരാജയം മുമ്പും പ്രതിപക്ഷം തുറന്നുകാട്ടിയിട്ടുണ്ട്. റോഡിലെ കുഴികളെക്കുറിച്ച് സംസാരിച്ചപ്പോഴാണ് പൊതുമരാമത്ത് മന്ത്രിയുടെ അസഹിഷ്ണുത കണ്ടത്. പ്രതിപക്ഷമാണ് മരുന്നുകളുടെ ക്ഷാമം ഉയർത്തിക്കാട്ടിയതെന്നും വി.ഡി സതീശൻ പറഞ്ഞു. പൊലീസ് നിയന്ത്രണം പാർട്ടിക്ക് വിട്ടിരിക്കുകയാണെന്നും അദ്ദേഹം ആരോപിച്ചു. പല മന്ത്രിമാരും നന്നായി പ്രവർത്തിക്കുന്നില്ല. അത് അവരുടെ ശ്രദ്ധയിൽപ്പെടുത്തുമ്പോൾ, അത് നല്ല രീതിയിൽ സ്വീകരിക്കപ്പെടുന്നില്ല. മന്ത്രിമാർക്ക് തീരാത്ത അസഹിഷ്ണുതയാണ്. ചിലരുടെ പരിചയക്കുറവാണ് പ്രശ്നം. മറ്റു ചിലർക്ക് അശ്രദ്ധയാണ്. മറ്റ് ചിലർക്ക് ഇതിലൊന്നും താൽപ്പര്യമില്ലെന്നും സതീശൻ ആരോപിച്ചു.

1995ൽ ഇ.പി ജയരാജനെ ട്രെയിനിൽ വച്ച് വധിക്കാൻ ശ്രമിച്ചെന്ന കേസിൽ കെ.സുധാകരന്റെ ഹർജിയിൽ ഉടൻ വാദം കേൾക്കണമെന്ന് സർക്കാർ ഹൈക്കോടതിയിൽ. അന്തിമവാദം ഈ മാസം 25ന് കേൾക്കാനാണ് ഹൈക്കോടതിയുടെ തീരുമാനം. സുധാകരനെ കുറ്റവിമുക്തനാക്കണമെന്നാണ് ഹർജി. 1995 ഏപ്രിൽ 12ന് ചണ്ഡീഗഡിൽ പാർട്ടി കോൺഗ്രസ് കഴിഞ്ഞ് മടങ്ങവെ രാവിലെ 10.20നാണ് രാജധാനി എക്‌സ്പ്രസിൽ ബപറ്റ്‌ലചിരാല റെയിൽവേ സ്റ്റേഷനുകൾക്കിടയിൽവച്ച് ഇപിയെ വെടിവച്ചത്. കഴുത്തിന് പിന്നിൽ വെടിയേറ്റ ജയരാജൻ ഏറെ നാളത്തെ ചികിത്സയ്ക്ക് ശേഷമാണ് സുഖം പ്രാപിച്ചത്. അക്രമികൾ തൊട്ടുമുന്നിൽ വന്ന് വെടിയുതിർക്കുകയായിരുന്നു. അതുമായി ബന്ധപ്പെട്ട് ഇപ്പോഴും ശ്വാസതടസ്സം ഉണ്ട്. കിടക്കുമ്പോൾ ശ്വസിക്കാൻ ഒരു പ്രത്യേക ശ്വസന സഹായ യന്ത്രം ആവശ്യമാണ്. വെടിയുണ്ടയുടെ ചീള് അപ്പോഴും കഴുത്തിലുണ്ട്. വെടിവെപ്പ് നടന്നയുടൻ ട്രെയിനിൽ നിന്ന് ചാടിരക്ഷപ്പെട്ട പ്രതികളായ ദിനേശ്, ശശി എന്നിവരെ പിന്നീട് അറസ്റ്റ് ചെയ്തു. കെ സുധാകരൻ അയച്ച ഗുണ്ടകളാണ് ജയരാജനെ വെടിവച്ചതെന്നാണ് സിപിഎം ആരോപണം.

കൊച്ചി: രാജ്യത്തെ ഏറ്റവും പുതിയ വിമാനക്കമ്പനിയായ ആകാശ എയർ കൊച്ചിയിൽ നിന്ന് സർവീസ് ആരംഭിച്ചു. സിയാൽ മാനേജിംഗ് ഡയറക്ടർ എസ് സുഹാസ് കൊച്ചിയിൽനിന്നുള്ള സർവീസ് ഉദ്ഘാടനം ചെയ്തു. വെള്ളിയാഴ്ച ഉച്ചയ്ക്ക് 1.10നാണ് ബെംഗളൂരുവിലേക്കുള്ള ആദ്യ വിമാനം പറന്നുയർന്നത്. ഇതോടെ കൊച്ചിയിൽ നിന്നുള്ള പ്രതിവാര ബെംഗളൂരു സർവീസുകളുടെ എണ്ണം 100 ആയി. ശനിയാഴ്ച മുതൽ ബെംഗളൂരു-കൊച്ചി-ബെംഗളൂരു മേഖലയിൽ ആകാശ എയർ ദിവസവും രണ്ടു വീതം സർവീസുകൾ നടത്തും. രാവിലെ 8.30ന് ബെംഗളൂരുവിൽ നിന്നുമെത്തുന്ന ആദ്യ വിമാനം 9.05നു മടങ്ങും. 12.30ന് എത്തുന്ന രണ്ടാം വിമാനം 1.10നു മടങ്ങിപ്പോവും. കൊച്ചിക്ക് പുറമെ ബെംഗളൂരു, മുംബൈ, അഹമ്മദാബാദ് എന്നിവിടങ്ങളിൽ നിന്ന് മാത്രമാണ് വിമാന സർവീസുകൾ പ്രഖ്യാപിച്ചിരിക്കുന്നത്. ആദ്യഘട്ടത്തിലെ 56 പ്രതിവാര സർവീസുകളിൽ 28 എണ്ണവും കൊച്ചിയിൽ നിന്നാണ്. ഏറെ പ്രതീക്ഷയോടെ കാത്തിരിക്കുന്ന ആകാശ വിമാന സർവീസിന്‍റെ ആദ്യ ഘട്ടത്തിൽ തന്നെ കൊച്ചിയെ ഉൾപ്പെടുത്തുന്നതിൽ സന്തോഷമുണ്ടെന്ന് സിയാൽ മാനേജിംഗ് ഡയറക്ടർ എസ് സുഹാസ് പറഞ്ഞു. യാത്രക്കാർക്ക് മികച്ച…

വിഴിഞ്ഞം: തീരസംരക്ഷണ സേന കപ്പൽ ‘അനഘ്’ വിഴിഞ്ഞം തീരസംരക്ഷണ സേനയുടെ ഭാഗമായി. കേരളത്തിന്‍റെ തീരസുരക്ഷ വർധിപ്പിക്കാനും തിരച്ചിൽ, രക്ഷാപ്രവർത്തനം കാര്യക്ഷമമാക്കാനും കപ്പൽ സഹായിക്കുമെന്ന് അഡീഷണൽ ചീഫ് സെക്രട്ടറി വി.വേണു ഐ.എ.എസ് പറഞ്ഞു. വിഴിഞ്ഞം അന്താരാഷ്ട്ര തുറമുഖം സമീപഭാവിയിൽ മേഖലയിലെ ഏറ്റവും തിരക്കേറിയ ഷിപ്പിംഗ് ഹബ്ബായി മാറുമെന്നതിനാൽ ഇന്ത്യൻ മഹാസമുദ്ര മേഖലയിലെ തന്ത്രപരമായ ആവശ്യം മുൻകൂട്ടി കണ്ടാണ് കപ്പൽ വിഴിഞ്ഞം കോസ്റ്റ് ഗാർഡിന്‍റെ ഭാഗമായതെന്ന് കരസേനയുടെ കേരള-മാഹി മേഖലയിലെ കമാൻഡർ ഡിഐജി എൻ രവി പറഞ്ഞു. ഏത് പ്രതികൂല കാലാവസ്ഥയിലും പ്രവർത്തിക്കാൻ ശേഷിയുള്ള തദ്ദേശീയമായി നിർമ്മിച്ച കപ്പലാണ് ICGS അനഘ്. തുടർച്ചയായി 15 ദിവസം കടലിൽ തങ്ങാൻ ശേഷിയുള്ള കപ്പലിൽ ആയുധങ്ങളും സെർച്ച് ആൻഡ് റെസ്ക്യൂ ഉപകരണങ്ങളും ഉണ്ട്. കമാൻഡന്‍റ് അമിത് ഹൂഡയുടെ നേതൃത്വത്തിലുള്ള കപ്പലിൽ 5 ഉദ്യോഗസ്ഥരും 33 ജീവനക്കാരുമുണ്ട്.

തിരുവനന്തപുരം: മാവോയിസ്റ്റ് രൂപേഷിനെതിരായ യു.എ.പി.എ പുനഃസ്ഥാപിക്കണമെന്ന സംസ്ഥാന സർക്കാരിന്റെ ഹർജിയിൽ സുപ്രീം കോടതി നോട്ടീസ് അയച്ചു. നോട്ടീസിന് സെപ്റ്റംബർ 19നകം മറുപടി നൽകണമെന്ന് രൂപേഷിനോട് സുപ്രീം കോടതി നിർദേശിച്ചു. രൂപേഷിനെതിരായ കേസുകൾ റദ്ദാക്കിയ ഹൈക്കോടതി ഉത്തരവ് സ്റ്റേ ചെയ്യണമെന്ന് ആവശ്യപ്പെട്ട് സർക്കാർ സുപ്രീം കോടതിയെ സമീപിച്ചിരുന്നു. വളയം, കുറ്റ്യാടി പൊലീസ് സ്റ്റേഷനുകളിലായി രജിസ്റ്റർ ചെയ്ത മൂന്ന് കേസുകളിൽ രൂപേഷിനെതിരായ യു.എ.പി.എ വകുപ്പുകൾ പുനഃസ്ഥാപിക്കണമെന്ന് ആവശ്യപ്പെട്ടായിരുന്നു സംസ്ഥാന സര്‍ക്കാര്‍ സുപ്രീം കോടതിയെ സമീപിച്ചത്.

കശ്മീർ ഇന്ത്യയുടെ അഭിവാജ്യ ഘടകമാണെന്നത് രാജ്യത്തിൻ്റെ പ്രഖ്യാപിത നയമാണെന്ന് കേന്ദ്രമന്ത്രി വി. മുരളീധരൻ. ‘ആസാദ് കശ്മീർ’ എന്ന വിവാദ പ്രസ്താവന നടത്തിയ കെ.ടി ജലീലിനെതിരെ രാജ്യദ്രോഹക്കുറ്റത്തിന് കേസെടുക്കണമെന്ന് അദ്ദേഹം ആവശ്യപ്പെട്ടു. “വിഘടനവാദികൾ ഉയർത്തിയ മുദ്രാവാക്യം ജലീൽ ആവർത്തിക്കുകയാണ്. രാജ്യദ്രോഹക്കുറ്റത്തിന് കേസെടുക്കാവുന്ന ഒരു പരാമർശമാണിത്. ജലീലിന്‍റെ രാജി സർക്കാർ ആവശ്യപ്പെടണം. രാജ്യദ്രോഹക്കുറ്റം ചെയ്ത ഒരാൾ നിയമസഭയിൽ തുടരുന്നത് രാജ്യത്തിന് അപമാനകരമാണ്.” മുരളീധരൻ വ്യക്തമാക്കി. കശ്മീരുമായി ബന്ധപ്പെട്ട കെ.ടി ജലീലിന്‍റെ ഫേസ്ബുക്ക് പോസ്റ്റ് വിവാദമായിരുന്നു. ജമ്മു കശ്മീരിനെ ആസാദ് കശ്മീർ എന്നും ഇന്ത്യൻ അധീന കശ്മീരെന്നുമാണ് ജലീൽ വിശേഷിപ്പിച്ചത്. വിഷയത്തിൽ ജലീലിനെതിരെ പ്രതിഷേധവുമായി ബിജെപി രംഗത്തെത്തിയിട്ടുണ്ട്.

കന്യാകുമാരി മുതൽ കശ്മീർ വരെയുള്ള രാഹുൽ ഗാന്ധിയുടെ ഭാരത് ജോഡോ യാത്ര സെപ്റ്റംബർ 11ന് കേരളത്തിലെത്തും. സെപ്റ്റംബർ ഏഴിന് കന്യാകുമാരിയിലെ ഗാന്ധി മണ്ഡപത്തിൽ നിന്ന് ആരംഭിക്കുന്ന യാത്ര മൂന്ന് ദിവസത്തിന് ശേഷം സെപ്റ്റംബർ 11ന് രാവിലെ കേരള അതിർത്തിയിലെത്തും. കളിക്കാവിളയില്‍ ഗംഭീര സ്വീകരണം നൽകും. പദയാത്ര രാവിലെ 7 മുതൽ 10 വരെയും തുടർന്ന് വൈകുന്നേരം 4 മുതൽ 7 വരെയും 25 കിലോമീറ്റർ ദൂരമാണ് ദിവസവും സഞ്ചരിക്കുക. തിരുവനന്തപുരത്ത് നിന്ന് തൃശൂരിലേക്ക് ദേശീയപാതയിലൂടെയും തുടർന്ന് സംസ്ഥാന പാതയിലൂടെ തൃശൂരിൽ നിന്ന് നിലമ്പൂരിലേക്കും ജാഥ കടന്നുപോകും. ഇതിന് മുന്നോടിയായി കെ.പി.സി.സി പ്രസിഡന്‍റ് കെ.സുധാകരൻ എം.പിയുടെ അധ്യക്ഷതയിൽ സമ്പൂർണ എക്സിക്യൂട്ടീവ് യോഗം ചേർന്നു. എഐസിസി ജനറൽ സെക്രട്ടറി കെ സി വേണുഗോപാൽ, എ കെ ആന്‍റണി, പ്രതിപക്ഷ നേതാവ് വി ഡി സതീശൻ, മുൻ മുഖ്യമന്ത്രി ഉമ്മൻചാണ്ടി തുടങ്ങിയവർ സന്നിഹിതരായിരുന്നു. കെ.പി.സി.സി വർക്കിംഗ് പ്രസിഡന്‍റ് കൊടിക്കുന്നിൽ സുരേഷ് എം.പി ജോഡോ യാത്രയുടെ വിശദാംശങ്ങൾ…

തമിഴ്നാട്: 92 യാത്രക്കാരുമായി ബെംഗളൂരുവിൽ നിന്ന് മാലിദ്വീപിലേക്ക് പുറപ്പെട്ട ‘ഗോ ഫസ്റ്റ്’ വിമാനം കോയമ്പത്തൂരിൽ അടിയന്തരമായി ലാൻഡ് ചെയ്തു. സ്മോക്ക് അലാറത്തെ തുടർന്നാണ് വിമാനം ലാൻഡ് ചെയ്തത്. തമിഴ്നാടിന് മുകളിലൂടെ പറക്കുന്നതിനിടെയാണ് പൈലറ്റ് സ്മോക്ക് അലർട്ട് ശ്രദ്ധിച്ചത്. ഇത് തെറ്റായ അലാറമാണെന്ന് കോയമ്പത്തൂരിലെ വിമാനത്താവള അധികൃതർ സ്ഥിരീകരിച്ചു. എഞ്ചിനുകൾ അമിതമായി ചൂടായതിനെ തുടർന്ന് അലാറം മുഴങ്ങുകയായിരുന്നു. പരിശോധനയിൽ അലാറത്തിന് തകരാർ ഉണ്ടെന്നും എഞ്ചിനുകൾക്ക് മറ്റ് പ്രശ്നങ്ങൾ ഇല്ലെന്നും കണ്ടെത്തി.