ചെന്നൈ: രണ്ടുകോടി അംഗങ്ങളെ ചേര്ക്കാന് ലക്ഷ്യമിട്ട് നടന് വിജയ്യുടെ നേതൃത്വത്തിലുള്ള പാര്ട്ടിയായ തമിഴക വെട്രി കഴകം. ഇതിനായി സംസ്ഥാനത്തുടനീളം ജില്ലാ-ബൂത്തുതലങ്ങളില് അംഗത്വ കാമ്പയിന് ശക്തമാക്കും. പാര്ട്ടിയിലേക്ക് കൂടുതല് സ്ത്രീകളെ ചേര്ക്കാനായി സ്ത്രീകളുടെ നേതൃത്വത്തിലുള്ള പ്രത്യേക സംഘത്തെ നിയോഗിക്കും. കന്നിവോട്ടുചെയ്യുന്ന സ്ത്രീകള്ക്ക് പാര്ട്ടിയില് സജീവ അംഗത്വം നല്കാനും വിജയ് പ്രത്യേക നിര്ദേശം നല്കിയതായി തിങ്കളാഴ്ചചേര്ന്ന നേതൃയോഗത്തിനുശേഷം പാര്ട്ടി ജനറല്സെക്രട്ടറി ബുസി ആനന്ദ് പറഞ്ഞു. പ്രവര്ത്തനം വ്യാപിപ്പിക്കാന് മൊബൈല് ആപ്പും ഉടന് പുറത്തിറക്കും. പാര്ട്ടിയുടെ നയങ്ങളും പരിപാടികളും തീരുമാനിക്കാന് ഭാരവാഹികളുടെ യോഗം അടുത്തുതന്നെ ചെന്നൈയില് ചേരാനാണ് വിജയ്യുടെ തീരുമാനം. അതിനിടെ പാര്ട്ടിയുടെ ഔദ്യോഗികപ്രതിജ്ഞയും തിങ്കളാഴ്ച പ്രഖ്യാപിച്ചു. ഇന്ത്യന് ഭരണഘടനയിലും മതമൈത്രിയിലും ഉറച്ചു വിശ്വസിക്കുമെന്നും തമിഴ് ഭാഷയ്ക്കായി ജീവത്യാഗംചെയ്തവരുടെ പോരാട്ടം തുടരുമെന്നും ജനാധിപത്യം, സാമൂഹികനീതി, മതേതരത്വം എന്നിവയില് അടിയുറച്ചു പ്രവര്ത്തിക്കുമെന്നുമാണ് ഔദ്യോഗിക പ്രതിജ്ഞ.
കഴിഞ്ഞ ഫെബ്രുവരി രണ്ടിനാണ് വിജയ് രാഷ്ട്രീയപ്പാര്ട്ടി പ്രഖ്യാപിച്ചത്. 2026-ലെ തമിഴ്നാട് നിയമസഭാ തിരഞ്ഞെടുപ്പ് മുന്നില്ക്കണ്ടാണ് പ്രവര്ത്തനം. പാര്ട്ടിയുടെ പേര് സംബന്ധിച്ച് ഏറെ ചര്ച്ചകള് നടന്നിരുന്നു. തമിഴക വെട്രി കഴകം (ടി.വി.കെ.) എന്ന് പേര് നല്കിയതിനെതിരേ തമിഴക വാഴ്വുറിമൈ കക്ഷി (ടി.വി.കെ.) നേതാവ് ടി. വേല്മുരുകന് തിരഞ്ഞെടുപ്പ് കമ്മിഷന് വക്കീല് നോട്ടീസും അയച്ചിരുന്നു.