തിരുവനന്തപുരം: ഇ പി ജയരാജനെ എൽഡിഎഫ്‌ കൺവീനറായി സിപിഐ എം സംസ്ഥാന സെക്രട്ടേറിയറ്റ്‌ യോഗം തീരുമാനിച്ചു. പി ശശി മുഖ്യമന്ത്രിയുടെ പൊളിറ്റിക്കൽ സെക്രട്ടറിയാകും. സിപിഐ എം സംസ്ഥാന സെക്രട്ടറി കോടിയേരി ബാലകൃഷ്‌ണനാണ്‌ ചുമതലകൾ വാർത്താസമ്മേളനത്തിൽ അറിയിച്ചത്‌.
പുത്തലത്ത്‌ ദിനേശൻ ദേശാഭിമാനി പത്രാധിപരാകും. ഡോ. ടി എം തോമസ്‌ ഐസക്‌ ചിന്ത വാരിക പത്രാധിപരാകും. ചിന്ത പബ്ലിഷേഴ്‌സിന്റെ ചുമതല എം സ്വരാജിന്‌. പൊളിറ്റ്‌ ബ്യൂറോയിൽനിന്ന്‌ ഒഴിവായ എസ് രാമചന്ദ്രൻ പിള്ള എകെജി സെന്റർ കേന്ദ്രീകരിച്ച്‌ പ്രവർത്തിക്കും. എകെജി പഠന ഗവേഷണ കേന്ദ്രം, ഇഎംഎസ്‌ അക്കാദമി എന്നിവയുടെ ചുമതലകൾ വഹിക്കും.
ഇടതിന് കരുത്തായി ഇ പി
അഞ്ച് പതിറ്റാണ്ടോളം നീണ്ട പൊതുപ്രവർത്തനത്തിന്റെ അനുഭവ സമ്പത്തുമായാണ് ഇ പി ജയരാജൻ ഇടത് മുന്നണിയെ നയിക്കാനെത്തുന്നത്.രാഷ്ടിയ എതിരാളികളുടെ ആക്രമണങ്ങളെ അതിജീവിച്ച ഉൾക്കരുത്തും നേതൃപാടവും സംഘാടന മികവുമാണ് ഇ പി യുടെ കരുത്ത്.
അടിയന്തരാസസ്ഥക്കാലത്തെ തീക്ഷ്ണാനുഭവങ്ങളിൽ ഉരുകി തെളിഞ്ഞതാണ് ഇപി ജയരാജന്റെ രാഷ്ടീയ ജീവിതം.എസ്എഫ്ഐയിലൂടെ പൊതുരംഗത്ത് സജീവമായ ഇ പി 1980‐ൽ ഡിവൈഎഫ്ഐ രൂപംകൊണ്ടപ്പോൾ ആദ്യത്തെ അഖിലേന്ത്യാ പ്രസിഡന്റായി.ദീർഘകാലം സിപിഐ എം കണ്ണൂർ ജില്ലാ സെക്രട്ടറി പ്രവർത്തിച്ചു. ജില്ലാ സെക്രട്ടറിയായിരിക്കെ രണ്ടു തവണ ആർഎസ്എസ് ബോംബാക്രമണത്തിൽനിന്ന് തലനാരിഴയ്ക്കാണ് രക്ഷപ്പെട്ടത്.
1992 ൽ സംസ്ഥാന കമ്മിറ്റിയിലെത്തിയ ഇ പി തുടർന്ന് സംസ്ഥാന സെക്രട്ടറിയറ്റ് അംഗവും കേന്ദ്ര കമ്മിറ്റി അംഗവുമായി. ദേശാഭിമാനി ജനറൽ മാനേജർ, കർഷകസംഘം സംസ്ഥാന പ്രസിഡന്റ്, വ്യാപാരി വ്യവസായി സമിതി സംസ്ഥാന രക്ഷാധികാരി എന്നീ നിലകളിലും പ്രവർത്തിച്ചു.1991‐ൽ അഴീക്കോടുനിന്നാണ് ആദ്യമായി നിയമസഭയിലെത്തി.2011 ലും 2016 ലും മട്ടന്നൂർ മണ്ഡലത്തിൽ നിന്നും ചരിത്ര ഭൂരിപക്ഷത്തിലാണ് വിജയിച്ചത്.
ഒന്നാം പിണറായി സർക്കാറിൽ വ്യവസായ കായിക വകുപ്പ് മന്ത്രിയായ ഇ പി ഭരണരംഗത്തും മികവ് തെളിയിച്ചു.പലവട്ടം മരണത്തെ മുഖാമുഖം കണ്ട് ജീവിതത്തിലേക്ക് തിരിച്ചെത്തിയ നേതാവാണ് ഇ പി. ചണ്ഡീഗഡിൽ നടന്ന 15ാം പാർടി കോൺഗ്രസിൽ പങ്കെടുത്ത് മടങ്ങുമ്പോൾ രാഷ്ട്രീയ എതിരാളികൾ ഏർപ്പെടുത്തിയ വാടക ഗുണ്ടകളുടെ വെടിയേറ്റു.അത്ഭുതകരമായി രക്ഷപെട്ടെങ്കിലും കഴുത്തിൽ തറച്ചു കയറിയ വെടിയുണ്ടകളുടെ അസ്വസ്ഥതകളുമായാണ് ഇപ്പോഴും ഇപിയുടെ ജീവിതം.കണ്ണൂരിലെ കരുത്തനായ നേതാവിന്റെ നേതൃത്വം കേരളത്തിലെ ഇടത് മുന്നണിക്ക് കൂടുതൽ ശക്തി പകരും.
