മനാമ: ഇന്നു മുതല് ഓഗസ്റ്റ് 11 വരെ പാരീസില് നടക്കുന്ന 33ാമത് സമ്മര് ഒളിമ്പിക്സില് ബഹ്റൈന് പ്രതിനിധി സംഘത്തെ നയിക്കാന്
ബൈഹ്റൈന് ഒളിമ്പിക്സ് കമ്മിറ്റി (ബി.ഒസി) വൈസ് പ്രസിഡന്റ് ഷെയ്ഖ് ഈസ ബിന് അലി അല് ഖലീഫയെ, സുപ്രീം കൗണ്സില് ഫോര് യൂത്ത് ആന്ഡ് സ്പോര്ട്സ് (എസ്.സി.വൈ.എസ്) ഫസ്റ്റ് ഡെപ്യൂട്ടി ചെയര്മാനും ജനറല് സ്പോര്ട്സ് അതോറിറ്റി (ജി.എസ്.എ) ചെയര്മാനും ബി.ഒസി പ്രസിഡന്റുമായ ഷെയ്ഖ് ഖാലിദ് ബിന് ഹമദ് അല് ഖലീഫ ചുമതലപ്പെടുത്തി.
മത്സരത്തില് ബഹ്റൈന് പ്രതിനിധി സംഘം വിജയിക്കട്ടെയെന്നും അവരുടെ പരിശ്രമം ബഹ്റൈന് പുതിയ ഒളിമ്പിക് നേട്ടം സമ്മാനിക്കട്ടെ
യെന്നും ഈസ ബിന് അലി അല് ഖലീഫ ആശംസിച്ചു. സംഘത്തിന്റെ നായകന്റെ ചുമതല ഏറ്റെടുത്ത ശേഷം അദ്ദേഹം പാരീസിലെത്തി.
ഒളിമ്പിക് ഗെയിംസില് പതിനൊന്നാം തവണയാണ് ബഹ്റൈന് പങ്കെടുക്കുന്നത്. 1984ലെ ലോസ് ഏഞ്ചല്സ് ഒളിമ്പിക്സിലായിരുന്നു ബഹ്റൈന്റെ ഒളിമ്പികസ് അരങ്ങേറ്റം. തുടര്ന്ന് എല്ലാ തവണയും പങ്കെടുത്തിട്ടുണ്ട്.
കഴിഞ്ഞ ഒളിമ്പിക് ഗെയിംസില് ബഹ്റൈന് ആകെ നാല് മെഡലുകള് നേടി. രണ്ട് സ്വര്ണവും രണ്ട് വെള്ളിയും. ഓട്ടക്കാരി മറിയം ജമാല് 1500 മീറ്റര് ഓട്ടത്തില് സ്വര്ണം നേടി ജി.സി.സി. രാജ്യങ്ങളില് ഒളിമ്പിക് സ്വര്ണമെഡല് നേടുന്ന ആദ്യ ബഹ്റൈനിയും ആദ്യ വനിതയുമായി. 2016ലെ റിയോ ഒളിമ്പിക്സില് 3,000 മീറ്റര് സ്റ്റീപ്പിള് ചേസില് ഓട്ടക്കാരി റൂത്ത് ജെബെറ്റ് സ്വര്ണ്ണമെഡല് നേടി. ഓട്ടക്കാരി യൂനിസ് കിര്വ മാരത്തണില് വെള്ളിമെഡല് നേടി. ഓട്ടക്കാരനായ കല്ക്കിഡന് ഗെസാഹെഗ്നെ 10,000 മീറ്റര് ഓട്ടത്തില് വെള്ളിമെഡല് നേടി.ഇത്തവണ രാജ്യത്തെ പ്രതിനിധീകരിക്കുന്നത് 14 അത്ലറ്റുകളാണ് (8 സ്ത്രീകളും 6 പുരുഷന്മാരും). അത്ലറ്റിക്സ് ടീമില് 8 ഓട്ടക്കാര് ഉള്പ്പെടുന്നു: ബിര്ഹാനു ബലേവ് (5,000, 10,000 മീറ്റര്), സല്വ ഈദ് നാസര് (400 മീറ്റര്), ഒലുവാക്കേമി അഡെകോയ (400 മീറ്റര് ഹര്ഡില്സ്), വിന്ഫ്രെഡ് യാവി (3,000 മീറ്റര് സ്റ്റീപ്പിള് ചേസ്), നെല്ലി ജെപ്കോസ്ഗേ (800 മീറ്റര്), റോസ് ചെലിമോ (മാരത്തണ്), ടിജിസ്റ്റ് ഗാഷോ (മാരത്തണ്). ഭാരോദ്വഹനത്തില് 102 കിലോഗ്രാമിന് മുകളിലുള്ള വിഭാഗത്തില് ഗോര് മിനസ്യനും 102 കിലോഗ്രാമില് താഴെയുള്ള വിഭാഗത്തില് ലെസ്മാന് പരേഡെസ് മൊണ്ടാനോയും പങ്കെടുക്കും.