മാനന്തവാടി: വയനാട്ടിൽ വിനോദയാത്രയ്‌ക്കെത്തിയ യുവാക്കൾ സഞ്ചരിച്ച വാഹനം നിയന്ത്രണം തെറ്റി ടോറസ് ലോറിയിലിടിച്ച് രണ്ട് മരണം. മാനന്തവാടി-കൽപ്പറ്റ സംസ്ഥാനപാതയിലെ പച്ചിലക്കാട് ടൗണിലാണ് സംഭവം. മാട്ടൂൽ സ്വദേശികളായ മുനവീർ, അഫ്രീദ് പള്ളിപ്പുര എന്നിവരാണ് മരിച്ചത്. ഇന്ന് രാവിലെ 10.30ഓടെയായിരുന്നു അപകടം.യുവാക്കൾ സഞ്ചരിച്ച ഇന്നോവ കാർ എതിർദിശയിൽ നിയന്ത്രണംവിട്ടെത്തി ലോറിയിൽ ഇടിച്ചുകയറുകയായിരുന്നു. മാനന്തവാടിയിലേക്ക് പോകുകയായിരുന്നു ലോറി.കണ്ണൂരിൽ നിന്നാണ് യുവാക്കൾ എത്തിയത്. വാഹനം ഓടിച്ചയാൾ ഉറങ്ങിപ്പോയതിനെ തുടർന്ന് കാർ നിയന്ത്രണംവിട്ട് പോകുകയായിരുന്നുവെന്നും കാർ തെറ്റായ ദിശയിലായിരുന്നെന്നും ദൃക്‌സാക്ഷികൾ പറഞ്ഞു. മൂന്നാമതൊരു യുവാവിന് കൂടി സാരമായി പരിക്കേറ്റിട്ടുണ്ട്. ഇയാളെ ആശുപത്രിയിലേക്ക് മാറ്റി.