ടോക്കിയോ: ജപ്പാനിലെ യക്കുഷിമ ദ്വീപില്‍ യു.എസ്. സൈനികവിമാനം തകര്‍ന്നുവീണു. അപകടത്തില്‍ ഒരു വ്യോമസേന ഉദ്യോഗസ്ഥന്‍ മരിക്കുകയും ഏഴുപേരെ കാണാതാവുകയും ചെയ്തു. ഓസ്‌പ്രേ വിഭാഗത്തില്‍പ്പെട്ട വിമാനം പരീശീലനപ്പറക്കലിനിടെയാണ് കടലില്‍ തകര്‍ന്നുവീണത്. ബുധനാഴ്ചയായിരുന്നു അപകടം. ജപ്പാന്റെ തെക്കേ അറ്റത്തെ പ്രധാന ദ്വീപായ ക്യുഷുവിന്റെ തെക്കുഭാഗത്താണ് യക്കുഷിമ സ്ഥിതിചെയ്യുന്നത്.
അപകടത്തില്‍പ്പെട്ട ഒരു ഉദ്യോഗസ്ഥനെ ആദ്യം കടലില്‍ അബോധാവസ്ഥയില്‍ കണ്ടെത്തുകയായിരുന്നു. പിന്നീട് ഇദ്ദേഹം മരിച്ചതായി സ്ഥിരീകരിച്ചെന്ന് ജപ്പാന്‍ കോസ്റ്റ്ഗാര്‍ഡ് അറിയിച്ചു. എട്ടുപേരങ്ങുന്ന സംഘമാണ് സി.വി 22ബി ഓസ്‌പ്രേ വിമാനത്തില്‍ യൊക്കോത്തയിലെ എയര്‍ ബെയ്‌സില്‍ നിന്ന് പരിശീലന പറക്കല്‍ ആരംഭിച്ചതെന്ന് യു.എസ് വ്യോമസേന ഓപ്പറേഷന്‍സ് തലവന്‍ അറിയിച്ചു. കാണാതായവര്‍ക്കായി തിരച്ചില്‍ പുരോഗമിക്കുകയാണെന്നും അപകടത്തിന്റെ കാരണം വ്യക്തമല്ലെന്നും അദ്ദേഹം പറഞ്ഞു.
അതേസമയം, വിമാനത്തിന്റെ ഇടത് എഞ്ചിന് തീപിടിച്ചിരുന്നതായി പോലീസിന് വിവരം ലഭിച്ചിട്ടുണ്ടെന്ന് കഗോഷിമ മേഖലയിലെ ദുരന്തനിവാരണ ഉദ്യോഗസ്ഥന്‍ അറിയിച്ചു. രണ്ട് വിമാനങ്ങളുടെയും ആറ് കപ്പലുകളുടെയും സഹായത്തോടെയുള്ള തിരച്ചില്‍ ബുധനാഴ്ച രാത്രി മുഴുവന്‍ നടത്തിയതായി ജപ്പാന്‍ കോസ്റ്റ്ഗാര്‍ഡ് വക്താവ് വ്യാഴാഴ്ച അറിയിച്ചു. കടലില്‍ പൊന്തിക്കിടക്കുന്ന ലൈഫ് ജാക്കറ്റുടെയും മറ്റും ചിത്രങ്ങള്‍ കോസ്റ്റ് ഗാര്‍ഡ് പുറത്തുവിട്ടു. പോലീസും പ്രാദേശിക രക്ഷാപ്രവര്‍ത്തകരും ദൗത്യത്തില്‍ പങ്കുചേരുന്നുണ്ട്.
സുരക്ഷ ഉറപ്പാക്കുന്നതുവരെ രാജ്യത്തെ ഓസ്‌പ്രേ വിമാനങ്ങളുടെ പറക്കല്‍ നിര്‍ത്തിവെക്കാന്‍ അമേരിക്കയോട് അഭ്യര്‍ഥിച്ചതായി ജപ്പാന്‍ പ്രതിരോധമന്ത്രി മിനോരു കിഹാര അറിയിച്ചു. എന്നാല്‍, ജപ്പാന്‍ പ്രതിരോധമന്ത്രിയുടെ അഭ്യര്‍ഥനയോട് യു.എസ്. പ്രതികരിച്ചിട്ടില്ല. അതേസമയം, ഓസ്‌പ്രേ വിമാനങ്ങളുടെ ഉപയോഗം ജപ്പാന്‍ സൈന്യം നിര്‍ത്തിവെച്ചതായി സര്‍ക്കാര്‍ വക്താവ് ഹിറോകസു മറ്റ്‌സുനോ വ്യക്തമാക്കി.
നേരത്തെ, ആഗസ്റ്റില്‍ വടക്കന്‍ ആസ്‌ട്രേലിയയില്‍ ഉണ്ടായ അപകടത്തില്‍ മൂന്നും കഴിഞ്ഞ വര്‍ഷം നാറ്റോയുടെ പരിശീലനത്തിനിടെ നോര്‍വേയില്‍ ഓസ്‌പ്രേ എം.വി 22ബി വിമാനം തകര്‍ന്ന് നാലും യു.എസ് നാവികര്‍ മരിച്ചിരുന്നു. 2017-ല്‍ ഓസ്ട്രലിയയുടെ വടക്കന്‍ തീരത്ത് ഓസ്‌പ്രേ വിമാനം തകര്‍ന്ന് മൂന്ന് നാവികര്‍ക്കും ജീവന്‍ നഷ്ടമായി.
