ന്യൂഡൽഹി: എല്ലാ വാഹനങ്ങൾക്കും ഏകീകൃത പുക മലിനീകരണ നിയന്ത്രണ സർട്ടിഫിക്കറ്റ് (പിയുസി) കൊണ്ടുവരാൻ ആലോചിക്കുന്നതായി കേന്ദ്ര ഗതാഗത മന്ത്രാലയം. പ്രധാന വിവരങ്ങൾ അടങ്ങിയ ക്യുആർ കോഡും വാഹനങ്ങൾക്കായി രൂപപ്പെടുത്തുമെന്നും സൂചനയുണ്ട്.
മോട്ടോർ വെഹിക്കിൾ നിയമത്തിൽ കാതലായ മാറ്റങ്ങൾ കൊണ്ടുവരാനാണ് കേന്ദ്ര തീരുമാനം. ഇത് സംബന്ധിച്ച് അഭിപ്രായങ്ങളും നിർദേശങ്ങളും അറിയിക്കാമെന്നും കേന്ദ്ര ഗതാഗത മന്ത്രാലയം വ്യക്തമാക്കി. പിയുസി ഡേറ്റ ബേസും ദേശീയ രജിസ്റ്ററും ബന്ധിപ്പിച്ച് വാഹന ഉടമകൾക്ക് എസ്.എം.എസ് വഴി വിവരങ്ങൾ ലഭ്യമാക്കാനുള്ള സംവിധാനവും ആലോചനയിലുണ്ട്.
ഇതിന് പുറമേ ഉടമയ്ക്ക് എന്തെങ്കിലും സംഭവിച്ചാൽ വാഹനം നോമിനിയുടെ പേരിലേക്കു മാറ്റാം. നോമിനി, ഉടമാവകാശം, രേഖകളുടെ അടിസ്ഥാനത്തിൽ നോമിനിയെ നിർദേശിക്കുന്നത് എന്നിവയുമായി ബന്ധപ്പെട്ട മോട്ടർ വാഹന നിയമത്തിലെ 47, 55, 56 വ്യവസ്ഥകളിലാണു ഭേദഗതി വരുത്താനൊരുങ്ങുന്നത്.
