തിരുവനന്തപുരം: മദ്യപിച്ച്‌ കാറോടിച്ചയാൾ റോഡരികിൽ നിർത്തിയിട്ട ഇരുചക്രവാഹനം ഇടിച്ച്‌ തെറിപ്പിച്ചു. മ്യൂസിയം നന്ദൻകോട്‌ റോഡിൽ വെള്ളിയാഴ്‌ച രാത്രിയാണ്‌ സംഭവം. കണ്ണൂർ സ്വദേശിയായ അതുലും സഹോദരിയും റോഡരികിൽ എൻഫീൽഡ്‌ ബുള്ളറ്റ്‌ നിർത്തിയിട്ട്‌ സമീപത്തെ കടയിൽനിന്ന്‌ സാധനം വാങ്ങുന്നതിനിടെയാണ്‌ കെ എൽ 19 ബി 9702 നമ്പർ കാർ അമിതവേഗത്തിലെത്തി ബുള്ളറ്റ്‌ ഇടിച്ചിട്ടത്‌. മ്യൂസിയം പൊലീസ്‌ സ്ഥലത്തെത്തി കാറും ഡ്രൈവറേയും കസ്‌റ്റഡിയിലെടുത്തു. ഡ്രൈവർ മദ്യലഹരിയിലായിരുന്നു. ഇരുചക്രവാഹന ഉടമയുടെ പരാതിയിൽ ഡ്രൈവർക്കെതിരെ മ്യൂസിയം പൊലീസ്‌ കേസെടുത്തു.
