റിപ്പോർട്ടർ ചാനലിന്റെ വാർത്താ സംപ്രേഷണം തടസ്സപ്പെടുത്തിയെന്ന ആരോപണം തനിക്ക് അറിയില്ലെന്ന് മുഖ്യമന്ത്രി പറഞ്ഞു. റെയ്ഡ് നടന്ന വിവരം പോലും അതേ ചാനലിലൂടെയാണ് അറിഞ്ഞതെന്നും അദ്ദേഹം കൂട്ടിച്ചേർത്തു.

മെസ്സി തട്ടിപ്പ് കേസിൽ പ്രത്യേക അന്വേഷണ സംഘം (എസ്‌ഐടി) നടത്തുന്ന അന്വേഷണത്തിന്റെ ഭാഗമായാണ് റിപ്പോർട്ടർ ചാനൽ ഓഫീസിൽ പരിശോധന നടന്നതെന്ന് മുഖ്യമന്ത്രി പറഞ്ഞു. മെസ്സിയുടെ പേരിൽ വലിയ സാമ്പത്തിക തട്ടിപ്പാണ് നടന്നിരിക്കുന്നതെന്നും, എവിടെ പരിശോധന നടത്തണമെന്നത് പൊലീസ് തീരുമാനിക്കുന്ന വിഷയമാണെന്നും അതിൽ സർക്കാരിന് യാതൊരു ഇടപെടലുമില്ലെന്നും അദ്ദേഹം വ്യക്തമാക്കി.

മുൻ ഇടത് സർക്കാരിന്റെ കാലത്ത് മാധ്യമ സ്ഥാപനങ്ങൾക്കെതിരെ നിരവധി നടപടികൾ സ്വീകരിച്ചിരുന്നുവെന്നും, ഏഷ്യാനെറ്റ് ന്യൂസിനെതിരായ കേസും റെയ്ഡും അതിന്റെ ഉദാഹരണമാണെന്നും മുഖ്യമന്ത്രി ഓർമ്മിപ്പിച്ചു.

മാസപ്പടി കേസുമായി ബന്ധപ്പെട്ട് വീണയുടെ ഡയറിയിലെ കണക്കുകളെക്കുറിച്ച് മുൻ മുഖ്യമന്ത്രി പിണറായി വിജയനും മന്ത്രി മുഹമ്മദ് റിയാസും പരസ്പരവിരുദ്ധമായ വിശദീകരണങ്ങളാണ് നൽകുന്നതെന്നും അദ്ദേഹം ആരോപിച്ചു. ഇഡി അയച്ച കത്ത് സർക്കാർ പരിശോധിച്ചുവരികയാണെന്നും, ഇക്കാര്യത്തിൽ ഉടൻ തീരുമാനമുണ്ടാകുമെന്നും മുഖ്യമന്ത്രി അറിയിച്ചു.

സംസ്ഥാനത്തെ വൈദ്യുത പ്രതിസന്ധിയെക്കുറിച്ചും അദ്ദേഹം പ്രതികരിച്ചു. പ്രതിസന്ധി പരിഹരിക്കാൻ സർക്കാർ അതിവേഗ നടപടികളാണ് സ്വീകരിച്ചുവരുന്നതെന്നും, ദീർഘകാലവും ഹ്രസ്വകാലവുമായ വൈദ്യുതി വാങ്ങൽ കരാറുകൾക്കാണ് മുൻഗണന നൽകുന്നതെന്നും വ്യക്തമാക്കി. യൂണിറ്റിന് 30 രൂപ നിരക്കിൽ വൈദ്യുതി വാങ്ങാൻ സർക്കാർ തീരുമാനിച്ചിട്ടില്ലെന്നും മുഖ്യമന്ത്രി കൂട്ടിച്ചേർത്തു.

The post മെസ്സി തട്ടിപ്പ് കേസ്: റെയ്ഡ് നിയമപരമായ നടപടി; വാർത്താ സംപ്രേഷണം തടസ്സപ്പെടുത്തിയിട്ടില്ലെന്ന് മുഖ്യമന്ത്രി വി.ഡി. സതീശൻ appeared first on Starvision News Malayalam.

തിരുവനന്തപുരം: മുഖ്യമന്ത്രി വി ഡി സതീശനെ അപമാനിച്ച് ഫേസ്ബുക്കില്‍ പോസ്റ്റിട്ടതിന്‍റെ പേരിൽ സസ്പെൻഷനിലായ സ്‌കൂള്‍ പ്രന്‍സിപ്പലിന് വിരമിക്കൽ ദിവസം ആശ്വാസം. സസ്പെന്‍ഡ് ചെയ്ത നടപടി പിന്‍വലിക്കാന്‍ മുഖ്യമന്ത്രി നൽകിയ നിർദേശം ഒറ്റ ദിവസത്തിൽ നടപ്പിലായതോടെയാണ് വിരമിക്കൽ ദിവസം ആറ്റിങ്ങല്‍ മോഡല്‍ ഹയര്‍ സെക്കന്‍ററി സ്‌കൂള്‍ പ്രിന്‍സിപ്പല്‍ എസ് ജവാദിന് ആശ്വാസമായത്. സസ്പെൻഷൻ പിന്‍വലിക്കാൻ മുഖ്യമന്ത്രി നൽകിയ നിര്‍ദേശം അനുസരിച്ച് പൊതുവിദ്യാഭ്യാസ ഡയറക്ടര്‍ ഇന്ന് ഉത്തരവിറക്കുകയായിരുന്നു. കഴിഞ്ഞ ദിവസമാണ് എസ് ജവാദിനെ സർവീസിൽ നിന്ന് സസ്‌പെന്‍ഡ് ചെയ്തത്. വിഷയത്തില്‍ മുഖ്യമന്ത്രിയോ ഓഫീസോ പരാതി നല്‍കിയിരുന്നില്ല. പുറമേ നിന്നുളള പരാതിയുടെ അടിസ്ഥാനത്തിലായിരുന്നു സസ്‌പെന്‍ഷന്‍. വിരമിക്കാന്‍ ദിവസങ്ങൾ മാത്രം ശേഷിക്കെ അധ്യാപകനെതിരെ ഉണ്ടായ വകുപ്പ് തല നടപടി മാനുഷിക പരിഗണനയിൽ പിൻവലിക്കുകയാണെന്നാണ് പുതിയ ഉത്തരവിൽ പറയുന്നത്.

The post വിവാദ FB പോസ്റ്റ് സസ്പെൻഷൻ; മുഖ്യമന്ത്രിയുടെ നിർദ്ദേശത്തെത്തുടർന്ന് ഉത്തരവ് പിൻവലിച്ചു appeared first on Starvision News Malayalam.