ഇഡിയെ രാഷ്ട്രീയമായും നിയമപരമായും നേരിടുമെന്ന് പിബി അംഗം ബി.വി. രാഘവലു വ്യക്തമാക്കി. എന്നാൽ ഇഡി വിഷയം വിപുലീകൃത സംസ്ഥാന കമ്മിറ്റിയുടെ ചർച്ചയിൽ ഉൾപ്പെടുന്നില്ലെന്നും യോഗം പാർട്ടിക്ക് ഗുണകരമാകുമെന്നും അദ്ദേഹം പറഞ്ഞു. ഇഡി വിഷയത്തിൽ പാർട്ടി നേരത്തേ നിലപാട് വ്യക്തമാക്കിയിട്ടുണ്ടെന്നും പ്രതിരോധം തുടരുമെന്നും യു. വാസുകിയും പ്രതികരിച്ചു.

തളിപ്പറമ്പിലെ തോൽവി ഒഴിവാക്കിയതിൽ വിമർശനം

തിരുത്തൽ രേഖയിൽ തളിപ്പറമ്പിലെ തെരഞ്ഞെടുപ്പ് പരാജയം പരാമർശിക്കാത്തതിൽ പ്രതിനിധികൾ അതൃപ്തി പ്രകടിപ്പിച്ചു. പയ്യന്നൂരിലെ മധുസൂദനന്റെ തോൽവി രേഖയിൽ ഉൾപ്പെടുത്തിയപ്പോൾ തളിപ്പറമ്പിനെ ഒഴിവാക്കിയതായിരുന്നു വിമർശനത്തിന് കാരണം.

എന്നാൽ ഇരുമണ്ഡലങ്ങളിലെയും സാഹചര്യങ്ങൾ വ്യത്യസ്തമാണെന്നാണ് നേതൃത്വത്തിന്റെ വിശദീകരണം. തളിപ്പറമ്പിൽ പി.കെ. ശ്യാമളയുടെ സ്ഥാനാർഥിത്വമായിരുന്നില്ല പ്രധാന പ്രശ്‌നമെന്നും മണ്ഡലത്തിൽ പതിനായിരത്തോളം വോട്ടിന്റെ കുറവുണ്ടാകുമെന്ന് പാർട്ടി നേരത്തേ കണക്കാക്കിയിരുന്നുവെന്നും നേതൃത്വം വിശദീകരിച്ചു. തിരിച്ചുപിടിക്കേണ്ട മണ്ഡലങ്ങളുടെ പട്ടികയിലാണ് തളിപ്പറമ്പിനെ ഉൾപ്പെടുത്തിയിരുന്നതെന്നും കണക്കുകൾ പ്രതികൂലമാണെന്ന് കണ്ടപ്പോഴാണ് ടി.കെ. ഗോവിന്ദൻ പാർട്ടി വിട്ടതെന്നും എം.വി. ഗോവിന്ദൻ വിശദീകരിച്ചതായാണ് വിവരം.

നേരത്തേ കേന്ദ്രകമ്മിറ്റി റിപ്പോർട്ടിൽ ഇരുമണ്ഡലങ്ങളിലെയും തിരിച്ചടികൾ വിലയിരുത്തുമ്പോൾ സ്ഥാനാർഥി നിർണയത്തിലെ പാളിച്ചകളും സംഘടനാപരമായ വീഴ്ചകളും ചൂണ്ടിക്കാട്ടിയിരുന്നു. ഈ പശ്ചാത്തലത്തിലാണ് പുതിയ രേഖയിലെ ഒഴിവാക്കൽ ചോദ്യം ചെയ്യപ്പെട്ടത്.

പിഎം ശ്രീ മുതൽ ശബരിമല വരെ വിമർശനം

പിഎം ശ്രീ പദ്ധതിയിൽ ഒപ്പുവെച്ച നടപടിയിലും യോഗത്തിൽ വിമർശനമുയർന്നു. തീരുമാനത്തിന്റെ രാഷ്ട്രീയ സാഹചര്യം ജനങ്ങളെ ബോധ്യപ്പെടുത്താനായില്ലെന്നും സിപിഐയുടെ സമ്മർദവും മുന്നണിയിലെ ഏകോപനക്കുറവും തിരിച്ചടിയായെന്നും പ്രതിനിധികൾ അഭിപ്രായപ്പെട്ടു.

ആഗോള അയ്യപ്പ സംഗമം സമയോചിതമായിരുന്നില്ലെന്നും ശബരിമലയുമായി ബന്ധപ്പെട്ട അഴിമതി വിവാദങ്ങൾ രാഷ്ട്രീയമായി ദോഷം ചെയ്തെന്നും വിമർശനമുണ്ടായി. വിഷയങ്ങളിൽ പാർട്ടിയും സർക്കാരും തമ്മിൽ ആവശ്യമായ ഏകോപനം ഉണ്ടായില്ലെന്നും അംഗങ്ങൾ ചൂണ്ടിക്കാട്ടി.

വെള്ളാപ്പള്ളി നടേശന്റെ പരാമർശങ്ങൾക്കെതിരെ നിലപാടെടുക്കാതിരുന്നത് തിരിച്ചടിയായെന്നും ന്യൂനപക്ഷങ്ങളുടെ ആശങ്ക പരിഹരിക്കാനായില്ലെന്നും പ്രതിനിധികൾ വിമർശിച്ചു. ശബരിമല സ്വർണക്കൊള്ളക്കേസുമായി ബന്ധപ്പെട്ട് പാർട്ടി നേതാക്കൾക്കെതിരെ സമയബന്ധിത നടപടി ഉണ്ടായില്ലെന്ന ആരോപണവും യോഗത്തിലുയർന്നു.

നേതാക്കളുടെ സ്വത്തുവിവരങ്ങളിൽ സുതാര്യത വേണം

സ്ഥാനാർഥി നിർണയത്തിലും നേതൃപദവികളിലും സ്വജനപക്ഷപാതമുണ്ടായെന്നും നേതാക്കളിൽ പാർലമെന്ററി സ്ഥാനങ്ങളോടുള്ള അമിതതാൽപര്യം വളർന്നെന്നും പ്രതിനിധികൾ കുറ്റപ്പെടുത്തി. സഹകരണ ബാങ്കുകളുടെ പ്രവർത്തനത്തിൽ സുതാര്യത ഉറപ്പാക്കാത്തതും തിരിച്ചടിയായതായി അവർ അഭിപ്രായപ്പെട്ടു.

നേതാക്കളുടെ സ്വത്തുവിവരങ്ങൾ സുതാര്യമാക്കുക, ധൂർത്ത് ഒഴിവാക്കി സാമ്പത്തിക അച്ചടക്കം പാലിക്കുക, പാർട്ടി അംഗങ്ങളുടെ പരാതികളിൽ കാലതാമസമില്ലാതെ നടപടിയെടുക്കുക തുടങ്ങിയ നിർദേശങ്ങളും ചർച്ചയിൽ ഉയർന്നു.

പ്രാദേശിക രാഷ്ട്രീയ പ്രശ്‌നങ്ങളിൽ സംസ്ഥാന നേതൃത്വം കൂടുതൽ ശ്രദ്ധ ചെലുത്തണമെന്നും ജനങ്ങളുമായുള്ള ബന്ധം ശക്തിപ്പെടുത്തണമെന്നും അംഗങ്ങൾ ആവശ്യപ്പെട്ടു. സൗഹാർദപരമായ ഭാഷയും സമീപനവും സ്വീകരിക്കുക, വർഗബഹുജന സംഘടനകളുടെ വിഷയങ്ങൾ പരിഗണിക്കുക, ജനസേവനത്തിന് മുൻഗണന നൽകുക എന്നിവ തിരുത്തൽ നടപടികളുടെ ഭാഗമാക്കണമെന്നുമാണ് പ്രതിനിധികളുടെ നിർദേശം.

The post ഇഡിക്കെതിരെ പ്രത്യേക പ്രമേയം വേണ്ടെന്ന് കേന്ദ്രനേതൃത്വം; സിപിഎം യോഗത്തിൽ തോൽവികളും ഭരണവീഴ്ചകളും ചർച്ചയിൽ appeared first on Starvision News Malayalam.

നേരത്തേ ഉയർന്നുവന്നതും പിന്നീട് ഒത്തുതീർപ്പാക്കിയതുമായ പരാതികളാണ് പാർട്ടിയുമായി അകന്നുനിൽക്കുന്ന ഒരു വിഭാഗം നിക്ഷേപകർ വീണ്ടും മാധ്യമങ്ങൾക്കു മുന്നിൽ ഉന്നയിച്ചത്. ഇരിട്ടിയിലെ സിപിഎം, ഡിവൈഎഫ്ഐ നേതാക്കൾ ഭാരവാഹികളായി 2015-ലാണ് ചാരിറ്റബിൾ സൊസൈറ്റി പ്രവർത്തനം ആരംഭിച്ചത്. കണ്ണൂർ ജില്ലാ പഞ്ചായത്ത് വൈസ് പ്രസിഡന്റ് ബിനോയ് കുര്യനാണ് സൊസൈറ്റിയുടെ പ്രസിഡന്റ്.

പ്രദേശത്ത് പുതിയ ഉന്നതവിദ്യാഭ്യാസ സ്ഥാപനം ആരംഭിക്കുമെന്ന് അറിയിച്ചാണ് 1,000 രൂപ മുതൽ ഒരു ലക്ഷം രൂപവരെയുള്ള ഓഹരികളായി നിക്ഷേപകരിൽനിന്ന് പണം സമാഹരിച്ചത്. എന്നാൽ വർഷങ്ങൾ കഴിഞ്ഞിട്ടും കോളേജ് ആരംഭിച്ചിട്ടില്ലെന്നും പിരിച്ചെടുത്ത തുകയുടെ വിനിയോഗം സംബന്ധിച്ച കണക്കുകൾ ബോധ്യപ്പെടുത്തിയിട്ടില്ലെന്നുമാണ് നിക്ഷേപകരുടെ പരാതി.

സാമ്പത്തിക കണക്കുകൾ അവതരിപ്പിക്കാനോ നിക്ഷേപകരുടെ ആശങ്കകൾ പരിഹരിക്കാനോ ഭരണസമിതി ഇതുവരെ ജനറൽ ബോഡി യോഗം വിളിച്ചുചേർത്തിട്ടില്ലെന്നും പരാതിക്കാർ ആരോപിച്ചു.

അതേസമയം, സൊസൈറ്റിക്കെതിരെ ഉയർന്ന സാമ്പത്തിക ആരോപണങ്ങൾ അടിസ്ഥാനരഹിതമാണെന്ന് പ്രസിഡന്റ് ബിനോയ് കുര്യൻ പ്രതികരിച്ചു. കോളേജ് നിർമാണത്തിനായി ഇരിട്ടി നഗരത്തിനുസമീപം 38 സെന്റ് ഭൂമി സൊസൈറ്റിയുടെ പേരിൽ വാങ്ങിയിട്ടുണ്ട്. പദ്ധതി ഉപേക്ഷിച്ചിട്ടില്ലെന്നും നിലവിലുള്ള തടസ്സങ്ങൾ പരിഹരിച്ച് നിർമാണവുമായി മുന്നോട്ടുപോകുമെന്നും അദ്ദേഹം വ്യക്തമാക്കി.

ഭൂമി വാങ്ങിയതല്ലാതെ മറ്റ് നിർമാണപ്രവർത്തനങ്ങൾ ആരംഭിക്കാത്ത സാഹചര്യത്തിൽ വരുംദിവസങ്ങളിൽ വിഷയം കൂടുതൽ വിവാദമാകാനാണ് സാധ്യത.

The post കോളേജ് നിർമാണത്തിന്റെ പേരിൽ പണപ്പിരിവ്; ഇരിട്ടിയിലെ സിപിഎം നിയന്ത്രണത്തിലുള്ള സൊസൈറ്റിക്കെതിരെ സാമ്പത്തിക ക്രമക്കേട് ആരോപണം appeared first on Starvision News Malayalam.

തിരുവനന്തപുരം: കെഎസ്ആര്‍ടിസിയിലെ സ്ത്രീകളുടെ സൗജന്യയാത്ര സിപിഎം എംഎല്‍എമാര്‍ ബഹിഷ്‌കരിക്കും. ഈ പരിപാടിയില്‍ സഹകരിക്കേണ്ടെന്ന് സിപിഎം തീരുമാനിച്ചു. പരിപാടിയില്‍ നിന്നും വിട്ടു നില്‍ക്കാന്‍ പാര്‍ട്ടി എംഎല്‍എമാര്‍ക്ക് നിര്‍ദേശം നല്‍കിയിട്ടുണ്ട്. യുഡിഎഫ് സര്‍ക്കാരിന്റെ പ്രിയദര്‍ശിനി പദ്ധതി പറ്റിക്കല്‍ പരിപാടിയാണെന്നും സിപിഎം സംസ്ഥാന സെക്രട്ടറി എംവി ഗോവിന്ദന്‍ മാധ്യമങ്ങളോട് പറഞ്ഞു.

കെഎസ്ആര്‍ടിസിയില്‍ എല്ലാ സ്ത്രീകള്‍ക്കും സൗജന്യമായി യാത്ര ചെയ്യാം, ഏതു ഭാഗത്തേക്കും പോകാം, ടൂറിസം പോലെ ഉപയോഗിക്കാം തുടങ്ങി എന്തൊക്കെയാണ് അവര്‍ പറഞ്ഞത്. എന്നിട്ട് ഇപ്പോള്‍ ഏറ്റവുമൊടുവില്‍ ഏതാണ്ട് ആയിരം ബസുകളില്‍ മാത്രം സ്ത്രീകള്‍ക്ക് സൗജന്യയാത്ര അനുവദിക്കുന്ന സ്ഥിതിയാണ് ഉണ്ടായിട്ടുള്ളത്. മലബാറില്‍ തീരേ ഓര്‍ഡിനറി ബസുകളില്ല. പിന്നെയും കൂടുതലായി കെഎസ്ആര്‍ടിസിയുടെ ഓര്‍ഡിനറി ബസുള്ളത് തിരുവനന്തപുരത്താണ്. എംവി ഗോവിന്ദന്‍ പറഞ്ഞു.

ഇത്രത്തോളം സൗജന്യം കൊടുത്തതിനെ എതിര്‍ക്കേണ്ട കാര്യമില്ല. എന്നാല്‍ യുഡിഎഫ് പറഞ്ഞതില്‍ നിന്ന് പിന്നോട്ടേക്ക് പോയി എന്ന് വിമര്‍ശനാത്മകമായി ചൂണ്ടിക്കാട്ടുകയാണ്. 21,000 രൂപ ആശാ വര്‍ക്കര്‍മാര്‍ക്ക് കൊടുക്കുമെന്ന് പറഞ്ഞിട്ട്, ചുരുങ്ങിയ പണം നല്‍കി അവസാനിപ്പിക്കുകയാണ് ചെയ്തത്. യുഡിഎഫ് പറയുന്നതല്ല ചെയ്യുന്നതെന്ന് വിമര്‍ശനാത്മകമായി ചൂണ്ടിക്കാട്ടുകയാണ്. സൗജന്യയാത്ര ആളെപ്പറ്റിക്കല്‍ സമീപനത്തിന്റെ ഭാഗമായതിനാല്‍, പാര്‍ട്ടി പങ്കെടുക്കില്ലെന്നും എം വി ഗോവിന്ദന്‍ വ്യക്തമാക്കി.

The post ‘പ്രിയദര്‍ശിനി സൗജന്യയാത്ര’ ആളെപ്പറ്റിക്കല്‍; സിപിഎം പങ്കെടുക്കില്ലെന്ന് എംവി ഗോവിന്ദന്‍ appeared first on Starvision News Malayalam.

തിരുവനന്തപുരം: ശബരിമല സ്വർണക്കൊള്ള കേസിൽ പ്രതിയായ മുൻ എംഎൽഎയും സിപിഎം ജില്ലാ കമ്മിറ്റി അംഗവുമായ എ. പത്മകുമാറിനെതിരെ പാർട്ടി നടപടി സ്വീകരിക്കുന്നതിലേക്ക് നീങ്ങുന്നു. വിഷയത്തിൽ തുടർനടപടി എന്താകണമെന്നത് തീരുമാനിക്കാനുള്ള ചുമതല സിപിഎം പത്തനംതിട്ട ജില്ലാ കമ്മിറ്റിക്ക് സംസ്ഥാന നേതൃത്വം കൈമാറി.

ഇതിനായി ജൂൺ 15ന് ജില്ലാ കമ്മിറ്റി യോഗം ചേരും. പത്മകുമാറിനെതിരെ സ്വീകരിക്കേണ്ട നടപടികളുടെ സ്വഭാവവും വ്യാപ്തിയും യോഗത്തിൽ വിശദമായി ചർച്ച ചെയ്യുമെന്നാണ് സൂചന.

ശബരിമല സ്വർണക്കൊള്ള കേസ് സംബന്ധിച്ച വിവാദം പാർട്ടിയുടെ തിരഞ്ഞെടുപ്പ് അവലോകന റിപ്പോർട്ടിൽ പരാമർശിച്ചിരുന്നെങ്കിലും, വിഷയത്തെ മയപ്പെടുത്തിയ സമീപനമാണ് സംസ്ഥാന നേതൃത്വം ആദ്യം സ്വീകരിച്ചതെന്നാണ് വിലയിരുത്തൽ. എന്നാൽ ഗുരുതരമായ ആരോപണങ്ങൾ ഉയർന്ന സാഹചര്യത്തിൽ നടപടിയില്ലാതെ മുന്നോട്ട് പോകാനാകില്ലെന്ന നിലപാടാണ് പിന്നീട് സംസ്ഥാന കമ്മിറ്റി സ്വീകരിച്ചത്. ഇതോടെയാണ് വിഷയത്തിൽ കർശന നിലപാടിലേക്ക് പാർട്ടി നീങ്ങിയത്.

2017-18 കാലഘട്ടത്തിൽ ദിവസം ബോർഡ് പ്രസിഡന്റായിരുന്ന എ. പത്മകുമാർ ശബരിമല സ്വർണക്കൊള്ള കേസിൽ അറസ്റ്റിലായി ജയിൽവാസം അനുഭവിച്ചിരുന്നു. തുടർന്ന് സ്വാഭാവിക ജാമ്യം ലഭിച്ചതിനെ തുടർന്ന് അദ്ദേഹം ജയിലിൽ നിന്ന് പുറത്തിറങ്ങുകയായിരുന്നു.

ആരോപണങ്ങൾ ഉയർന്നതിന് പിന്നാലെ പത്മകുമാറിനെ പാർട്ടി പരിപാടികളിൽ നിന്ന് മാറ്റിനിർത്താൻ മാത്രമാണ് സിപിഎം ഇതുവരെ തീരുമാനിച്ചിരുന്നത്. എന്നാൽ അദ്ദേഹത്തിനെതിരെ സംഘടനാപരമായ നടപടികൾ ആവശ്യപ്പെട്ട് പാർട്ടിക്കുള്ളിൽ തന്നെ ശക്തമായ അഭിപ്രായങ്ങൾ ഉയർന്നിരുന്നു.

സിപിഎം ജില്ലാ നേതൃത്വവുമായി അകൽച്ച നിലനിന്നിരുന്ന പത്മകുമാർ കഴിഞ്ഞ ആഴ്ചയാണ് പാർട്ടി അംഗത്വം പുതുക്കിയത്. ഇതിനിടെയാണ് അദ്ദേഹത്തിനെതിരായ നടപടിയെക്കുറിച്ചുള്ള നിർണായക ചർച്ചകൾക്കായി ജില്ലാ കമ്മിറ്റിക്ക് ചുമതല നൽകിയത്. പാർട്ടിയുടെ അന്തിമ തീരുമാനം രാഷ്ട്രീയ വൃത്തങ്ങളിൽ ശ്രദ്ധേയമായ ചർച്ചകൾക്ക് വഴിവെച്ചിരിക്കുകയാണ്.

The post ശബരിമല സ്വർണക്കൊള്ള കേസ്: എ. പത്മകുമാറിനെതിരെ നടപടിക്ക് സിപിഎം; തീരുമാനം ജില്ലാ കമ്മിറ്റിക്ക് appeared first on Starvision News Malayalam.

തിരുവനന്തപുരം: സിഎംആർഎൽ – എക്‌സാലോജിക് കരാറുമായി ബന്ധപ്പെട്ട കേസിൽ പ്രതിപക്ഷ നേതാവ് പിണറായി വിജയന്റെ തിരുവനന്തപുരത്തെയും കണ്ണൂരിലെയും വസതികളിലും മുൻ മന്ത്രി പിഎ മുഹമ്മദ് റിയാസിന്റെ കോഴിക്കോട്ടെ വീട്ടിലും എൻഫോഴ്‌സ്‌മെന്റ് ഡയറക്ടറേറ്റ് ഒരേസമയം റെയ്ഡ് നടത്തുന്നതിനെതിരെ സംസ്ഥാനവ്യാപകമായി തെരുവിൽ ജനകീയ പ്രതിരോധം തീർക്കാൻ സിപിഎം ആഹ്വാനം ചെയ്തു. തിരുവനന്തപുരത്ത് ചേർന്ന പാർട്ടിയുടെ അടിയന്തിര സംസ്ഥാന സെക്രട്ടറിയേറ്റ് യോഗത്തിന് ശേഷമാണ് സംസ്ഥാന സെക്രട്ടറി എംവി ഗോവിന്ദൻ മാധ്യമങ്ങളോട് ഇക്കാര്യം ഒഫീഷ്യലായി പ്രഖ്യാപിച്ചത്. സംസ്ഥാനത്തെ എല്ലാ ജില്ലാ കേന്ദ്രങ്ങളിലും ഏരിയ, ലോക്കൽ മേഖലകളിലും വൻ ജനകീയ പ്രതിഷേധങ്ങൾ സംഘടിപ്പിക്കുന്നതിനൊപ്പം കേരളത്തിലെ മുഴുവൻ പാർട്ടി ബ്രാഞ്ചുകളിലും ഇന്ന് വൈകുന്നേരം പന്തംകൊളുത്തി പ്രകടനങ്ങൾ നടത്താനും സെക്രട്ടറിയേറ്റ് യോഗം തീരുമാനിച്ചിട്ടുണ്ട്.

തികച്ചും രാഷ്ട്രീയ പകപോക്കലിന്റെ ഭാഗമായാണ് കേന്ദ്ര ഏജൻസി ഇപ്പോൾ ഈ റെയ്ഡ് പ്ലാൻ ചെയ്തിരിക്കുന്നതെന്ന് എംവി ഗോവിന്ദൻ കുറ്റപ്പെടുത്തി. വീണാ വിജയൻ മകളായിപ്പോയി എന്ന ഒറ്റക്കാരണത്താൽ അച്ഛന്റെ പേരിൽ കള്ളക്കേസെടുക്കാൻ ഇഡിക്ക് നിയമപരമായി ഒട്ടും കഴിയില്ല. കേസ് കൃത്യമായി അന്വേഷിക്കാനാണ് ഹൈക്കോടതി ഉത്തരവിട്ടിട്ടുള്ളത്, എന്നാൽ അതിന്റെ മറവിൽ കടന്നാക്രമണം നടത്താനാണ് ഇഡി ശ്രമിക്കുന്നത്. വലിയ സഹനങ്ങളും നിരന്തരമായ വേട്ടയാടലുകളും അതിജീവിച്ചാണ് പിണറായി വിജയൻ മുഖ്യമന്ത്രി പദം വരെ എത്തിയത്. ഈ നീക്കത്തെ പിണറായിക്കെതിരെയുള്ള വ്യക്തിപരമായ കേസായല്ല പാർട്ടി കാണുന്നത്, മറിച്ച് സിപിഎമ്മിനെ തകർക്കാൻ കേന്ദ്ര ഭരണകൂടം പ്രയോഗിക്കുന്ന ഏറ്റവും ഒടുവിലത്തെ രാഷ്ട്രീയ ആയുധമാണിത്. പാർട്ടിയെ ഇല്ലാതാക്കണമെങ്കിൽ പിണറായി വിജയനെ തകർക്കണമെന്ന് അവർ കരുതുന്നു. അത്തരം ആക്രമണങ്ങളിലൂടെ പിണറായിയെയോ സിപിഎമ്മിനെയോ ദുർബലപ്പെടുത്താമെന്ന് ആരെങ്കിലും മോഹിച്ചാൽ അവർക്ക് തെറ്റിയെന്നും ജനങ്ങളെ അണിനിരത്തി ഇതിനെ രാഷ്ട്രീയമായും നിയമപരമായും പ്രതിരോധിക്കുമെന്നും അദ്ദേഹം വ്യക്തമാക്കി.

The post ‘വീണ വിജയൻ മകളായി എന്നതിന്റെ പേരിൽ അച്ഛനെതിരെ കേസെടുക്കാനാകില്ല’; സംസ്ഥാനവ്യാപകമായി തെരുവിൽ ഇറങ്ങാൻ സിപിഎം ആഹ്വാനം appeared first on Starvision News Malayalam.