മനാമ: ശ്രീനാരായണ കൾച്ചറൽ സൊസൈറ്റി (എസ്.എൻ.സി.എസ്) 52-ാമത് ബഹ്റൈൻ ദേശീയ ദിനം ആദാരി പാർക്കിൽ നൂതനമായി ആഘോഷിച്ചു. മുഖ്യ അതിഥിയായ സാമൂഹിക വികസന മന്ത്രാലയത്തിലെ സർക്കാരിതര ഓർഗനൈസേഷൻസ് ഡയറക്ടർ അമീന അൽ ജാസിം കേക്ക് മുറിച്ച് ദേശീയ ദിനാഘോഷങ്ങൾ ഉദ്ഘാടനം ചെയ്തു. സാമൂഹിക വികസന മന്ത്രാലയത്തിലെ മുതിർന്ന നിയമ ഗവേഷകൻ ഹൈതം ജാബിർ വിശിഷ്ടാതിഥിയായിരുന്നു. ചടങ്ങിൽ ഒരു കിലോമീറ്റർ ദൈർഘ്യമുള്ള ദേശീയ പതാക ആയിരത്തിലധികം പേർ കൈകളിൽ ഏന്തിയത് ശ്രദ്ധേയമായി.
എസ്. എൻ. സി. എസ്സി-ന്റെ ഹൃദ്യമായ സ്നേഹവായ്പ്പിനും ദേശസ്നേഹത്തിനും അമീന അൽ ജാസിം സൊസൈറ്റി അംഗങ്ങൾക്കും പങ്കെടുത്ത മറ്റെല്ലാർക്കും നന്ദി അറിയിക്കുകയും, “സമാധാനത്തിനും സമൃദ്ധിക്കും സന്തോഷത്തിനും വേണ്ടി, സംസ്കാരങ്ങളുടെ സമന്വയം മാനവികതയുടെ ഉന്നമനത്തിന്” എന്ന ആശയത്തിൽ ഊന്നി, ബഹ്റൈനോടുള്ള ആദരസൂചകമായി എസ്.എൻ.സി.എസ്-ന്റെ നേതൃത്വത്തിൽ കഴിഞ്ഞ സെപ്റ്റംബറിൽ ശ്രീനാരായണീയ സമൂഹം നടത്തിയ പരിപാടികൾക്ക് സാമൂഹിക വികസന മന്ത്രാലയത്തിന്റെ അഭിനന്ദനം അറിയിക്കുന്നതായും ഉദ്ഘാടക എടുത്തു പറഞ്ഞു.
“ഒരു കിലോമീറ്റർ നീളമുള്ള പതാക” വഹിച്ച് ബഹ്റൈൻ ദേശീയ ദിനം ആഘോഷിക്കുവാൻ ലഭിച്ച ഈ അതുല്യമായ അവസരം എന്നും ഓർമ്മയിൽ സൂക്ഷിക്കുമെന്നും, ഈ ദിനത്തെ ഞങ്ങൾ നെഞ്ചേറ്റുന്നതായും എസ്.എൻ.സി.എസ് ചെയർമാൻ സുനീഷ് സുശീലൻ തന്റെ അധ്യക്ഷ പ്രസംഗത്തിൽ പറഞ്ഞു.
ഇത് വളരെ സവിശേഷമായ ബഹുമതിയാണെന്നും, ബഹറിൻ രാജകുടുംബാംഗങ്ങൾ, സാമൂഹിക വികസന മന്ത്രാലയം, ആഭ്യന്തര മന്ത്രാലയം, ടൂറിസം മന്ത്രാലയം, ബഹറിനിലെ ജനങ്ങൾ തുടങ്ങിയവരുടെയെല്ലാം ദയാപൂർവ്വമായ പിന്തുണക്ക് നന്ദി അറിയിക്കുന്നതായും ചെയർമാൻ ഊന്നിപ്പറഞ്ഞു.
ഏഷ്യൻ സ്കൂൾ ബാൻഡും ബഹ്റൈൻ മോട്ടോർ സൈക്കിൾ കമ്പനിയും (ബൈക്കേഴ്സ് ഗ്രൂപ്പ്) പരിപാടിയുടെ മാറ്റ് കൂട്ടി. ദേശീയ പതാകയുടെ നിറങ്ങൾ അണിഞ്ഞ എസ്.എൻ.സി.എസ് അംഗങ്ങളും, സാമൂഹ്യ സംഘടന അംഗങ്ങളും, അഭ്യുദയകാംക്ഷികളും, ബഹ്റൈൻ ദേശീയ വേഷം ധരിച്ച കുട്ടികളുടെ പാട്ടും ദേശീയനൃത്തവും പരിപാടികൾക്ക് ചാരുതയേകി.
എസ്.എൻ.സി.എസ് മുൻ ഭരണസമിതി അംഗം പ്രശാന്ത് കെ. കെ-യുടെ നേതൃത്വത്തിലുള്ള കമ്മിറ്റിയുടെ അശ്രാന്ത പരിശ്രമത്താലാണ് ശ്രമകരമായ ഈ നൂതന ആശയം വൻ വിജയപ്രദമായത് എന്ന് സംഘാടകർ എടുത്തുപറഞ്ഞു.
വൈകിട്ട് 4.00-ന് ആരംഭിച്ച ദേശീയ ദിനാഘോഷ പരിപാടികൾ 6.30-ഓടെയാണ് സമാപിച്ചത്.