ഇറാനിൽ കുടുങ്ങിയ ബഹറിൻ പൗരന്മാരുടെ രണ്ടാം സംഘം എത്തി

മനാമ: കോവിഡ് -19 വൈറസ് സ്‌ഥിരീകരിച്ച ശേഷം  ഇറാനിൽ കുടുങ്ങിയ ബഹറിൻ പൗരന്മാരുടെ രണ്ടാമത്തെ സംഘം ബഹ്‌റൈനിലെത്തി. അന്താരാഷ്ട്ര കോവിഡ് -19 റീപ്പാട്രിയേഷൻ പ്രോഗ്രാമിന്റെ ഭാഗമായി ആരോഗ്യ മന്ത്രാലയം ക്രമീകരിച്ച ചാർട്ടേഡ് വിമാനത്തിൽ 60 ലധികം പേരാണ് മഷാദിൽ നിന്ന് ബഹ്‌റൈൻ അന്താരാഷ്ട്ര വിമാനത്താവളത്തിൽ എത്തിയത്. കൊറോണ വൈറസിന്റെ വ്യാപനം പരിമിതപ്പെടുത്തുന്നതിനുള്ള പ്രതിരോധ നടപടികളുടെ ഭാഗമായി ബഹ്‌റൈൻ യാത്രാ നിയന്ത്രണങ്ങൾ ഏർപ്പെടുത്തിയതിനെത്തുടർന്നാണ് ഇവർ ഇറാനിൽ കുടുങ്ങിയത്. പ്രാദേശിക മത ടൂർ ഏജന്റുമാർ നടത്തുന്ന ഗ്രൂപ്പുകളുടെ ഭാഗമായിട്ടാണ്  ഫെബ്രുവരി ആദ്യം അവർ ഇറാനിലേക്ക് പോയത്. ഒരു പ്രത്യേക മെഡിക്കൽ സ്റ്റാഫിന്റെ മേൽനോട്ടത്തിലാണ് ലബോറട്ടറി പരിശോധനയ്ക്കു ഇവരെ എത്തിച്ചത്. വിമാനത്താവളത്തിൽ പരിശോധന നടത്തിയ ശേഷം ഇവരെ വിവിധ കോവിഡ് -19 കേന്ദ്രങ്ങളിലേക്ക് മാറ്റി.  പരിശോധന ഫലത്തിന്റെ അടിസ്‌ഥാനത്തിൽ ലോകാരോഗ്യ സംഘടന അംഗീകരിച്ച നിർദ്ദേശങ്ങളും മാനദണ്ഡങ്ങളും അനുസരിച്ച് യാത്രക്കാരെ പ്രത്യേക ഐസൊലേഷൻ സെന്ററുകളിലേക്കോ നിരീക്ഷണ കേന്ദ്രങ്ങളിലേക്കോ മാറ്റും.  പുരുഷന്മാരും സ്ത്രീകളും കുട്ടികളും അടങ്ങുന്ന 160 ബഹ്‌റൈനികളുടെ ആദ്യ ബാച്ച് മാർച്ച് 10 ന് മടങ്ങിഎത്തിയിരുന്നു. അതിനു ശേഷം  ഷെഡ്യൂൾ ചെയ്ത രണ്ട് വിമാനങ്ങൾ ലോജിസ്റ്റിക് കാരണങ്ങളാൽ മാറ്റിവച്ചിരുന്നു. 1300 ഓളം ബഹ്‌റൈനികളാണ് ഇറാനിൽ കുടുങ്ങിക്കിടക്കുന്നത്.