മനാമ: ബഹ്റൈനിൽ പാർലമെന്റ്, മുനിസിപ്പൽ കൗൺസിൽ തെരഞ്ഞെടുപ്പ് നടന്നു. ഇതുവരെയുള്ള ഏറ്റവും വലിയ പാർലമെന്റ് തിരഞ്ഞെടുപ്പിനാണ് ബഹ്റൈൻ പൗരന്മാർ സാക്ഷ്യം വഹിച്ചത്. 40 പാർലമെന്റ് മണ്ഡലങ്ങളിലേക്കും നാല് മുനിസിപ്പൽ കൗൺസിലുകളിലേക്കുമാണ് തെരഞ്ഞെടുപ്പ് നടന്നത്. മുൻ കാലങ്ങളിൽനിന്ന് വ്യത്യസ്തമായി എല്ലാ സ്ഥാനാർഥികളും വ്യക്തിപരമായാണ് മത്സരിച്ചത്. വൻ ജനപങ്കാളിത്തത്തോടെ നടന്ന തിരഞ്ഞെടുപ്പിൽ വനിതകളുടെ വർദ്ധിച്ച സാന്നിധ്യവും ഇത്തവണ പ്രകടമായിരുന്നു. 561 സ്ഥാനാർത്ഥികളിൽ 107 പേരും വനിതകളാണ്. രാജകുടുംബാംഗങ്ങളും മന്ത്രിമാരും ഉന്നത ഉദ്യോഗസ്ഥന്മാരുമെല്ലാം വിവിധ പോളിംഗ് ബൂത്തുകളിലെത്തി വോട്ട് ചെയ്തു.
കോവിഡ് ബാധിതരായവർക്ക് വോട്ട് രേഖപ്പെടുത്താൻ എക്സിബിഷൻ സെന്ററിൽ പ്രത്യേക സൗകര്യം ഒരുക്കിയിരുന്നു. ഇത്തവണ 73 ശതമാനം പോളിംഗ് രേഖപ്പെടുത്തി. 2002ലെ ആദ്യ തിരഞ്ഞെടുപ്പിന് ശേഷമുള്ള ഏറ്റവും ഉയർന്ന നിരക്കാണിതെന്ന് നീതിന്യായ, ഇസ്ലാമിക് കാര്യ, എൻഡോവ്മെന്റ് മന്ത്രി നവാഫ് അൽ മൗദ പറഞ്ഞു. തിരഞ്ഞെടുപ്പ് ചട്ടങ്ങൾ അനുസരിച്ച്, ഒരു സ്ഥാനാർത്ഥി തിരഞ്ഞെടുക്കപ്പെടാൻ ഒരു മണ്ഡലത്തിൽ പകുതിയിലധികം വോട്ടുകൾ നേടിയിരിക്കണം. ഒരു സ്ഥാനാർത്ഥിയും പകുതിയിൽ കൂടുതൽ വോട്ടുകൾ നേടിയില്ലെങ്കിൽ, ഏറ്റവും കൂടുതൽ വോട്ടുകൾ നേടിയ രണ്ട് സ്ഥാനാർത്ഥികൾ നവംബർ 19 ന് നടക്കുന്ന രണ്ടാം തെരഞ്ഞെടുപ്പിൽ നേർക്കുനേർ വരും.