മനാമ: കഴിഞ്ഞ മാസം ബഹ്‌റൈനിൽ 100,000 പേർക്ക് കൊറോണ വൈറസിന്റെ ഒമൈക്രോൺ വേരിയന്റ് ബാധിച്ചതായി ആരോഗ്യ മന്ത്രാലയം വെളിപ്പെടുത്തി. ഇതിൽ 14 പേർ മരണപ്പെടുകയും ചെയ്തു. മൊത്തം അണുബാധയുടെ 0.01 ശതമാനമാണ് ഇത്. കഴിഞ്ഞ വർഷം ഡെൽറ്റ വേരിയന്റ് ബാധിച്ച 112,572 പേരിൽ 787 പേർ മരണപ്പെട്ടു. ഇത് മൊത്തം കേസുകളുടെ 0.74 ശതമാനമാണ്. ഇതിനർത്ഥം രാജ്യത്ത് ഏറ്റവും കൂടുതൽ കോവിഡ് -19 മരണങ്ങൾ നടന്നത് ഡെൽറ്റയിലാണ്.
ആൽഫ വേരിയന്റ് ബാധിച്ച 78,331 കേസുകളിൽ 264 മരണങ്ങൾ (0.34 ശതമാനം) സംഭവിച്ചപ്പോൾ കോവിഡ് -19 ന്റെ ആദ്യ സ്‌ട്രെയിൻ ബാധിച്ച 87,137 കേസുകളിൽ 341 മരണങ്ങളും (0.39 ശതമാനം) രേഖപ്പെടുത്തി. ഒമിക്‌റോണിൽ നിന്നുള്ള മരണനിരക്കിലെ കുറവ് വാക്സിനേഷൻ കാമ്പെയ്‌നിന്റെ വിജയത്തെയാണ് സൂചിപ്പിക്കുന്നത്. മരണനിരക്ക് കുറയ്ക്കുന്നതിനും ആശുപത്രികളിലെയും തീവ്രപരിചരണ വിഭാഗങ്ങളിലെയും (ഐസിയു) പ്രവേശന നിരക്കുകൾ കുറയ്ക്കുന്നതിനും വാക്സിനുകൾ സഹായിച്ചു.
സ്ഥിതിവിവരക്കണക്കുകൾ പ്രകാരം, ഈ വർഷം ജനുവരി മുതൽ 1,00,687 ഒമൈക്രോൺ വേരിയന്റിന്റെ കേസുകളും 14 മരണങ്ങളും രേഖപ്പെടുത്തിയിട്ടുണ്ട്. രണ്ട് ഡോസ് വാക്സിനും ഒരു ബൂസ്റ്റർ ഷോട്ടും എടുത്ത എല്ലാ പ്രായക്കാർക്കും രോഗപ്രതിരോധ ശേഷി വർദ്ധിപ്പിക്കുന്നതിൽ വാക്സിനേഷന്റെ പങ്കാണ് ഇത് സ്‌ഥിരീകരിക്കുന്നത്.
2020 ഡിസംബർ 17-ന് ബഹ്‌റൈൻ വാക്സിനേഷൻ കാമ്പെയ്‌ൻ ആരംഭിച്ചു. മൂന്ന് വയസ്സിന് മുകളിലുള്ള പൗരന്മാർക്കും താമസക്കാർക്കും സിനോഫാം, ഫൈസർ-ബയോഎൻടെക്, കോവിഷീൽഡ്, സ്പുട്‌നിക് V എന്നീ നാല് വാക്‌സിനുകളാണ് ബഹ്‌റൈൻ സൗജന്യമായി നൽകുന്നത്. ഇത് എല്ലാവർക്കും ബൂസ്റ്റർ ഡോസുകൾ വാഗ്ദാനം ചെയ്യുന്നു. അതേസമയം പ്രായമായവർക്കും മുൻ‌നിര ആരോഗ്യ പ്രവർത്തകർക്കും രണ്ടാമത്തെ ഓപ്ഷണൽ ബൂസ്റ്റർ ഡോസ് പ്രഖ്യാപിച്ചു. ബൂസ്റ്റർ ഡോസ് ലഭിച്ചവരിൽ സങ്കീർണതകൾ കുറവാണ്.
സമൂഹത്തിന്റെ ആരോഗ്യം സംരക്ഷിക്കുന്നതിനായി, ഷെഡ്യൂൾ അനുസരിച്ച് പ്രതിരോധ കുത്തിവയ്പ്പുകളും ബൂസ്റ്റർ ഡോസുകളും എടുക്കുന്നതിന് പുറമേ, മുൻകരുതൽ നടപടികൾ പാലിക്കുന്നത് തുടരാൻ എല്ലാ പൗരന്മാരോടും താമസക്കാരോടും അധികൃതർ ആവശ്യപ്പെട്ടു.
