തിരുവനന്തപുരം: സംസ്ഥാനത്ത് ഇന്ന് നാല് കൊവിഡ് മരണം റിപ്പോര്ട്ട് ചെയ്തു. മലപ്പുറം,എറണാകുളം, കണ്ണൂര്, കോഴിക്കോട് സ്വദേശികളാണ് ഇന്ന് മരണപ്പെട്ടത്. ഇവരുടെ മരണം കൊവിഡ് മൂലമാണെന്ന് ഔദ്യോഗികമായി സ്ഥിരീകരിച്ചിട്ടില്ല. കണ്ണൂര് കൂത്തുപറമ്പ് സ്വദേശി സി.സി.രാഘവനാണ് കൊവിഡ് ബാധിച്ചു മരിച്ചവരില് ഒരാള്. 71 വയസായിരുന്നു. വൃക്ക സംബന്ധമായ അസുഖത്തെ തുടര്ന്ന് പരിയാരത്ത് ചികിത്സയിലിരിക്കെയാണ് കൊവിഡ് ബാധിച്ച് മരിച്ചത്. ഇദ്ദേഹത്തിന്റെ ഭാര്യക്കും മകനും നേരത്തെ കൊവിഡ് സ്ഥിരീകരിച്ചിരുന്നു.
മലപ്പുറം പള്ളിക്കല് സ്വദേശിനി നഫീസയാണ് (52 ) രണ്ടാമത്തെയാള്. ഇന്ന് രാവിലെയാണ് മരണം സംഭവിച്ചത്. മഞ്ചേരി മെഡിക്കല് കോളേജില് വച്ചാണ് ഇവര് മരണപ്പെട്ടത്. കോഴിക്കോട് ജില്ലയിലും ഇന്നൊരു കൊവിഡ് മരണം റിപ്പോര്ട്ട് ചെയ്തു. കൊയിലാണ്ടി സ്വദേശി അബൂബക്കാറാണ് മരിച്ചത്.
എറണാകുളം കളമശ്ശേരി മെഡിക്കല് കോളേജില് ചികിത്സയിലിരിക്കെയാണ് മറ്റൊരു കൊവിഡ് രോഗിയും ഇന്ന് മരണപ്പെട്ടത്.പള്ളുരുത്തി വെളി ചെറുപറമ്പ് സ്വദേശി ഗോപിയാണ് മരിച്ചത്. കൊവിഡ് പൊസീറ്റീവായി ചികിത്സയിലായിരുന്നു ഇവര്. കോവിഡ് മൂലമാണെന്ന് സ്ഥിരീകരിക്കുന്നതിനായി സ്രവം ആലപ്പുഴയിലെ എന്ഐവി ലാബിലേക്ക് അയച്ചിട്ടുണ്ട്. ഇദ്ദേഹത്തിന് നേരത്തെ കരള്, വൃക്ക രോഗങ്ങള് കൂടിയുണ്ടായിരുന്നുവെന്നാണ് വിവരം.