പത്തനംതിട്ട : സിനിമാ സ്റ്റൈലിൽ കഞ്ചാവ് കടത്താൻ ശ്രമിക്കുന്നതിനിടെ കാര്‍ പോലീസ് ജീപ്പില്‍ ഇടിച്ചു. സംഭവത്തിൽ കാര്‍ യാത്രക്കാരായ രണ്ട് പേർ അറസ്റ്റിൽ. പത്തനംതിട്ട വലഞ്ചൂഴി സ്വദേശികളായ ഹാഷിം, അഫ്‌സല്‍ എന്നിവരാണ് പിടിയിലായത്. പിന്നാലെ കാറിൽ നിന്ന് ആറ് കിലോ കഞ്ചാവ് പോലീസ് പിടിച്ചെടുത്തു.
വെള്ളിയാഴ്ച പുലര്‍ച്ചെ പത്തനംതിട്ട വെട്ടിപ്പുറം ഭാഗത്തായിരുന്നു സംഭവം. പിടിയിലായ രണ്ട് പേര്‍ക്കും ലഹരി സംഘങ്ങളുമായി ബന്ധമുണ്ടെന്ന് പോലീസിന് നേരത്തെ വിവരം ലഭിച്ചിരുന്നു.
ഇരുവരും പോലീസിന്റെ നിരീക്ഷണത്തിലായിരുന്നു.വെള്ളിയാഴ്ച പുലര്‍ച്ചെ ഇരുവരും കമ്പത്തു നിന്നു പുനലൂര്‍ വഴി പത്തനംതിട്ടയിലേക്ക് കഞ്ചാവുമായി വരുന്നുണ്ടെന്ന് പോലീസിന് വിവരം ലഭിച്ചു. തുടര്‍ന്ന് കൂടല്‍ പോലീസ് ഇവരുടെ വാഹനത്തിന് കൈ കാണിച്ചെങ്കിലും നിര്‍ത്താതെ പോയി. ഇതോടെ പോലീസ് ജീപ്പില്‍ കാറിനെ പിന്തുടര്‍ന്നു.
പത്തനംതിട്ട വെട്ടിപ്പുറത്ത് മറ്റൊരു റോഡിലേക്ക് തിരിയുന്നതിനിടെ പോലീസ് ജീപ്പ് കാറിനെ ഓവര്‍ടേക്ക് ചെയ്ത് മുന്നില്‍ കയറി. ഇതോടെയാണ് കാര്‍ നിയന്ത്രണംവിട്ട് ജീപ്പില്‍ ഇടിച്ചത്. ഇടിയിൽ ജീപ്പിന്റെ പിന്‍വശത്തെ ചില്ല് തകര്‍ന്നിട്ടുണ്ട്. കാറിന്റെ മുന്‍ഭാഗവും ഭാഗികമായി തകര്‍ന്നു. അപകടത്തിന് പിന്നാലെ ഇരുവരേയും പോലീസ് കൈയോടെ പിടികൂടുകയായിരുന്നു.