കൽപ്പറ്റ: നാടകകൃത്തും നോവലിസ്‌റ്റും സാംസ്കാരിക പ്രവർത്തകനുമായ കെ.ജെ. ബേബി (കനവ് ബേബി– 70) അന്തരിച്ചു. ഇന്ന് രാവിലെ അദ്ദേഹത്തെ നടവയലിലെ വീടിനോടു ചേർന്നുള്ള കളരിയിൽ മരിച്ച നിലയിൽ കണ്ടെത്തുകയായിരുന്നു.
ആദിവാസി കുട്ടികൾക്ക് ബദൽ വിദ്യാഭ്യാസം നൽകുന്നതിനായി വയനാട്ടിലെ ചിങ്ങോട് എന്ന സ്‌ഥലത്ത് കനവ് എന്ന ഗുരുകുലാശ്രമം സ്ഥാപിച്ചതോടെയാണ് അദ്ദേഹം കനവ് ബേബി എന്ന് അറിയപ്പെട്ടുതുടങ്ങിയത്.
ബേബിയുടെ ‘മാവേലിമൻറം’ എന്ന നോവൽ ആദിവാസി ജീവിതത്തിന്റെ നേർ പരിച്ഛേദമാണ്. ഈ നോവലിന് 1994-ലെ കേരള സാഹിത്യ അക്കാദമി അവാർഡും പിന്നീട് മുട്ടത്തുവർക്കി അവാർഡും ലഭിച്ചു. ബേബി രചിച്ച ‘നാടുഗദ്ദിക’ നാടകവും ഏറെ ശ്രദ്ധിക്കപ്പെട്ടു.
