സി.ബി.എസ്.ഇ പത്താം ക്ലാസ് പരീക്ഷയില്‍ ഇന്ത്യന്‍ സ്കൂളിനു നൂറു ശതമാനം വിജയം

മനാമ: ഇന്ത്യൻ സ്കൂൾ ബഹ്‌റൈൻ (ഐ‌എസ്‌ബി) വിദ്യാർത്ഥികൾ ഇക്കഴിഞ്ഞ മാർച്ചിൽ നടന്ന സി.ബി.എസ്.ഇ പത്താം ക്ലാസ് പരീക്ഷയിൽ മാതൃകാപരമായ പ്രകടനം കാഴ്ചവച്ചു.   സെൻട്രൽ ബോർഡ് ഓഫ് സെക്കൻഡറി എജ്യുക്കേഷൻ (സിബിഎസ്ഇ) ബുധനാഴ്ച ഫലം പ്രഖ്യാപിച്ചപ്പോള്‍ ഇന്ത്യന്‍ സ്കൂൾ 100% ശതമാനം വിജയം നേടി. പരീക്ഷക്കിരുന്ന 776 വിദ്യാർത്ഥികളിൽ കൃത്യം നൂറു വിദ്യാര്‍ഥികള്‍ ‘എ’ ഗ്രേഡ് നേടി. 172 കുട്ടികൾ 90 ശതമാനത്തിലധികം മാര്‍ക്ക് കരസ്ഥമാക്കി.

98.6 ശതമാനം സ്‌കോർ നേടിയ നന്ദന ശുഭ വിനുകുമാർ 500 ൽ 493 മാര്‍ക്കോടെ സ്കൂള്‍ ടോപ്പറായി.  ഇന്ത്യന്‍ സ്കൂളിന്റെ ചരിത്രത്തിൽ ഒരു പത്താം ക്ലാസ് വിദ്യാർത്ഥി നേടുന്ന ഏറ്റവും ഉയർന്ന മാര്‍ക്കാണിത്. 489 മാര്‍ക്ക് നേടിയ നയനാ  ചന്ദ്രന്‍ പുറവങ്കര  97.8 ശതമാനവുമായി രണ്ടാം സ്ഥാനത്തും 488 മാര്‍ക്കു  നേടിയ ഗൌതം  അനൈമല്ലൂർ ജനാർദ്ദനൻ 97.6 ശതമാനവുമായി മൂന്നാം സ്ഥാനവും കരസ്ഥമാക്കി.

ഇന്ത്യന്‍ സ്കൂള്‍ ചെയർമാൻ പ്രിൻസ് എസ് നടരാജൻ, സെക്രട്ടറി സജി ആന്റണി,  മെമ്പര്‍  അക്കാദമിക്സ് മുഹമ്മദ് ഖുർഷീദ് ആലം, എക്സിക്യൂട്ടീവ് കമ്മിറ്റി അംഗങ്ങൾ, പ്രിൻസിപ്പൽ വി ആർ പളനിസ്വമി എന്നിവര്‍   മികച്ച വിജയം നേടിയ വിദ്യാർത്ഥികളെയും പിന്തുണയേകിയ അധ്യാപകരെയും രക്ഷിതാക്കളെയും അഭിനന്ദിച്ചു.

കോവിഡ് മഹാമാരിയുടെ  ഈ പ്രയാസകരമായ സമയത്ത്  അക്കാദമിക് ടീമിന്റെ സംയുക്ത പരിശ്രമത്തിന്റെയും മാതാപിതാക്കളുടെയും അധ്യാപകരുടെയും പൂർണ്ണ സഹകരണത്തിന്റെയും  ഫലമായി  ഇന്ത്യൻ സ്കൂളിനു  മികച്ച വിജയം  കൈവരിക്കാനായെന്നു     പ്രിന്‍സ് നടരാജന്‍ പറഞ്ഞു.

വെല്ലുവിളികളെ അതിജീവിച്ചു   ഇന്ത്യൻ സ്‌കൂൾ വിദ്യാർത്ഥികൾ തങ്ങളുടെ മിടുക്ക് തെളിയിച്ചിരിക്കുകയാണെന്ന് സജി ആന്റണി പറഞ്ഞു.

അക്കാദമിക  ചുമതലയുള്ള അംഗം  മുഹമ്മദ് ഖുർഷീദ് ആലം   വിദ്യാർത്ഥികളുടെ   ഭാവി പരിശ്രമങ്ങളിൽ വിജയവും സന്തോഷവും നേര്‍ന്നു.

ഇന്ത്യന്‍ സ്കൂള്‍  മികവിന്റെ കേന്ദ്രമായി ഉയർന്നുവന്നിട്ടുണ്ടെന്നും അതിനു അക്കാദമിക നേതൃത്വത്തിന്റെ കൃത്യമായ ആസൂത്രണം, അധ്യാപകരുടെ പ്രതിബദ്ധത,  രക്ഷിതാക്കളുടെ പിന്തുണ എന്നിവ മികച്ച വിജയം നേടാന്‍ സഹായകരമായെന്നു   പ്രിൻസിപ്പൽ വി ആർ പളനിസ്വാമി പറഞ്ഞു.

  ഇന്ത്യന്‍ സ്കൂള്‍ പത്താം ക്ലാസ് പരീക്ഷ ഫലത്തിന്റെ പ്രത്യേകതകള്‍ ഇവയാണ് :

• സ്കൂളിലെ ഏറ്റവും ഉയർന്ന സ്കോര്‍: 500 ൽ 493 (98.6%)
• നാല്  വിദ്യാർത്ഥികൾ ഗണിതശാസ്ത്രത്തിൽ 100 ഉം 19 പേര്‍ 99 ഉം നേടി.
• നാല്  വിദ്യാർത്ഥികൾ സോഷ്യൽ സയൻസിൽ 100 ഉം 4 പേര്‍ 99 ഉം നേടി.
• രണ്ടു  വിദ്യാർത്ഥികൾ ഫ്രഞ്ച് ഭാഷയിൽ 100 ഉം 6 പേര്‍ 99 ഉം നേടി.
• ഒരു വിദ്യാർത്ഥി സയൻസിൽ 100 നേടി
• പത്തു  വിദ്യാർത്ഥികൾ മലയാളത്തില്‍  99 നേടി
• രണ്ടു  വിദ്യാർത്ഥികൾ സംസ്‌കൃതത്തിൽ 99 നേടി
• ഒരു വിദ്യാർത്ഥി ഇംഗ്ലീഷിൽ 99 നേടി
• 84.1% വിദ്യാർത്ഥികൾക്ക് ഫസ്റ്റ് ക്ലാസ് ലഭിച്ചു
• 58.9% പേർക്ക് ഡിസ്റ്റിങ്ങ്ഷന്‍  ലഭിച്ചു
• 172 വിദ്യാർത്ഥികൾക്ക് 90% ഉം അതിനു മുകളിലും മാര്‍ക്ക് ലഭിച്ചു
• നൂറു വിദ്യാർത്ഥികൾക്ക് എല്ലാ വിഷയങ്ങളിലും എ ഗ്രേഡ് ലഭിച്ചു
• 28 വിദ്യാർത്ഥികൾക്ക് എല്ലാ വിഷയങ്ങളിലും എ വണ്‍ ഗ്രേഡ് ലഭിച്ചു