കൊച്ചി: ഇന്ത്യന്‍ നാഷണല്‍ കോണ്‍ഗ്രസിന്റെ പോഷക സംഘടനയായ ഇന്ത്യന്‍ ലോയേഴ്സ് കോണ്‍ഗ്രസില്‍ (ഐ.എല്‍.സി) ഭാരവാഹികളെ തെരഞ്ഞെടുക്കുന്നതിനായി തെരഞ്ഞെടുപ്പ് നാളെ നടക്കും. ഹൈക്കോടതി വളപ്പില്‍ സജ്ജമാക്കുന്ന പോളിംഗ് കേന്ദ്രത്തില്‍ രഹസ്യ ബാലറ്റിലൂടെയാകും വോട്ടെടുപ്പ്. ഇത് ആദ്യമായാണ് ഐ.എല്‍.സിയില്‍ രഹസ്യ ബാലറ്റിലൂടെ തെരഞ്ഞെടുപ്പ് നടക്കുന്നത്.
സംസ്ഥാനത്തെ 87 കോര്‍ട്ട് സെന്ററുകളിലും ശക്തമായ യൂണിറ്റുള്ള ഏറ്റവും കൂടുതല്‍ അംഗബലമുള്ള അഭിഭാഷക സംഘടനയാണ് ഇന്ത്യന്‍ ലോയേഴ്സ് കോണ്‍ഗ്രസ്. അഡ്വ. മരിയാപുരം ശ്രീകുമാറാണ് ലോയേഴ്സ് കോണ്‍ഗ്രസിന്റെ ചുമതലയുള്ള കെ.പി.സി.സി ജനറല്‍ സെക്രട്ടറി. സജീവമായി പ്രാക്ടീസുള്ള ക്രിമിനല്‍ അഭിഭാഷകനെന്ന നിലയില്‍ അദ്ദേഹം ചുമതല ഏറ്റെടുത്ത ശേഷം സംഘടന നേരിടുന്ന പ്രശ്‌നങ്ങളെ കുറിച്ച് പഠനം നടത്തുകയും വിശദ റിപ്പോര്‍ട്ട് കെ.പി.സി.സിക്കു കൈമാറുകയും ചെയ്തു. വര്‍ഷങ്ങളായി തിരഞ്ഞെടുപ്പ് നടക്കാതെ സംഘടനയില്‍ സംസ്ഥാന ഘടകത്തിലുള്ള 20 അംഗങ്ങളില്‍ 16 പേരും ഹൈക്കോടതിയില്‍ നിന്നും മാത്രമായി തുടരുകയായിരുന്നു. ഇതടക്കമുള്ള കാര്യങ്ങള്‍ ചൂണ്ടിക്കാട്ടിയുള്ള റിപ്പോര്‍ട്ട് കെ.പി.സി.സി പ്രസിഡന്റ് കെ.സുധാകരന്റെ നേതൃത്വത്തിലുള്ള സമിതി വിശദമായി ചര്‍ച്ച ചെയ്തു. തുടര്‍ന്നാണ് ലോയേഴ്സ് കോണ്‍ഗ്രസ് പുനഃസംഘടിപ്പിക്കാന്‍ തീരുമാനിച്ചത്. ഇതിന്റെ അടിസ്ഥാനത്തില്‍ ഐ.എല്‍.സി സംസ്ഥാന കമ്മിറ്റി പിരിച്ചു വിടാനും ബൈലോ അനുസരിച്ച് പുനഃസംഘടന നടത്താനും അഡ്വ മര്യാപുരം ശ്രീകുമാര്‍, കെ.പി.സി.സി ലീഗല്‍ എയ്ഡ് കമ്മിറ്റി ചെയര്‍മാന്‍ അഡ്വ വി എസ് ചന്ദ്രശേഖരന്‍ എന്നിവരെ കെ.പി.സി.സി പ്രസിഡന്റ് ചുമതലപ്പെടുത്തി.
സംസ്ഥാന വരണാധികാരിയായി ഹൈക്കോടതിയിലെ സീനിയര്‍ അഭിഭാഷകനായ അഡ്വ വത്സലനെ നിയമിച്ചിരിക്കുന്നത്. അദ്ദേഹം ഹൈക്കോടതി ഉള്‍പ്പടെ 15 ജില്ലാതല വരണാധികാരികളെ നിയമിക്കുകയും ഇലക്ഷന്‍ നടപടികളുമായി ധൃതഗതിയില്‍ മുന്നോട്ട് പോകുകയും ചെയ്തു. ബൈലോ അബുസരിച്ചു അംഗങ്ങളുടെ 10% സംസ്ഥാന കമ്മറ്റിയിലേക്കും 20% ജില്ലാ കമ്മറ്റികളിലേക്കും തിരഞ്ഞെടുത്ത് അയക്കേണ്ടത്. സംസ്ഥാന ജില്ലാ കൗണ്‍സില്‍ അംഗങ്ങളാകുന്നവരില്‍ നിന്നാണ് സംസ്ഥാനത്തെയും ജില്ലകളിലെയും ഭാരവാഹികളെ തിരഞ്ഞെടുക്കുന്നത്. അംഗത്വവിതരണം പൂര്‍ത്തിയാകാതെയുള്ള സ്ഥലങ്ങളില്‍ എത്രയുംവേഗം അംഗത്വ വിതരണം പൂര്‍ത്തിയാക്കാന്‍ നിര്‍ദ്ദേശം നല്‍കിയിട്ടുണ്ട്.
കെ.പി.സി.സി വൈസ് പ്രസിഡന്റായിരുന്ന ലാലി വിന്‍സെന്റ് , മുന്‍ ഡി.ജി.പിയും ഐ.എല്‍.സി സംസ്ഥാന പ്രസിഡന്റുമായിരുന്ന അഡ്വ.അസഫലി എന്നിവരുള്‍പ്പെടെയുള്ള പ്രമുഖര്‍ നാമനിര്‍ദ്ദേശ പത്രിക സമര്‍പ്പിച്ചിട്ടുണ്ട്. അഭിഭാഷകാരായ അര്‍ഹതയുള്ള ചെറുപ്പക്കാരും വനിതകളും ഉള്‍പ്പെടെ എല്ലാ വിഭാഗങ്ങളെയും ഉള്‍ക്കൊള്ളുന്ന കമ്മറ്റികള്‍ സംസ്ഥാനം മുഴുവനും നിലവില്‍ വരുന്നത് സംഘടനയ്ക്ക് കൂടുതല്‍ കരുത്തും ഊര്‍ജ്ജവും പകരുമെന്ന് കെ.പി.സി.സി പ്രസിഡന്റ് കെ.സുധാകരന്‍ അഭിപ്രായപ്പെട്ടു. അതോടൊപ്പം ഐ.എല്‍.സി യുടെ സേവനം കേരളത്തിലെ മുഴുവന്‍ കോണ്‍ഗ്രസ് പ്രവര്‍ത്തകര്‍ക്കും നിയമ സഹായം എത്തിക്കുന്നതിനുള്ള വേദിയാക്കി മാറ്റാണ് കെ.പി.സി.സി ലക്ഷ്യമിടുന്നതെന്നും അദ്ദേഹം വ്യക്തമാക്കി.