മനാമ: സേവന കാലാവധി പൂർത്തിയാക്കിയ ശേഷം ഇന്ത്യൻ സ്ഥാനപതി പിയൂഷ് ശ്രീവാസ്തവ കുടുംബത്തോടൊപ്പം ബഹ്‌റൈനിൽ നിന്ന് ഇന്ത്യയിലേക്ക് പുറപ്പെട്ടു. തന്റെ സേവന കാലയളവിൽ സഹകരിച്ചവർക്ക് നന്ദി രേഖപ്പെടുത്തിയ സ്ഥാനപതി, ബഹ്റൈൻ ജീവിതം ഏറെ അവിസ്മരണീയമായ അനുഭവമാണെന്ന് സമ്മാനിച്ചതെന്ന് പറഞ്ഞു. ഇന്ത്യ – ബഹ്റൈൻ ബന്ധങ്ങൾ പുതിയ ഉയരങ്ങൾ കീഴടക്കുന്നത് തുടരുമെന്ന ആത്മവിശ്വാസമുണ്ടെന്നും അദ്ദേഹം പറഞ്ഞു. ഇന്ത്യൻ എംബസി ഉദ്യോഗസ്ഥർ സ്ഥാനമൊഴിയുന്ന അംബാസഡർക്ക് യാത്രയയപ്പ് നൽകുകയും അദ്ദേഹത്തിന്റെ ഭാവി ശ്രമങ്ങൾക്ക് ആശംസകൾ നേരുകയും ചെയ്തു. ജൂലൈ അവസാന വാരത്തോടെയാണ് പുതിയ സ്ഥാനപതിയായ വിനോദ് കെ ജേക്കബ് സ്ഥാനമേറ്റെടുക്കുന്നത്.