മനാമ: കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫ മുനിസിപ്പാലിറ്റി കാര്യ-കൃഷി മന്ത്രാലയം സന്ദർശിച്ചു. അവിടെയെത്തിയ പ്രധാനമന്ത്രിയെ മുനിസിപ്പാലിറ്റി കാര്യ-കൃഷി മന്ത്രി എംഗ്‌വാൾ ബിൻ നാസർ അൽ മുബാറക് സ്വീകരിച്ചു. ഗവൺമെന്റ് പദ്ധതിയുടെ സംരംഭങ്ങളും പരിപാടികളും നടപ്പിലാക്കുന്നത് കൂട്ടുത്തരവാദിത്വമാണെന്ന് പ്രിൻസ് സൽമാൻ ബിൻ ഹമദ് അൽ ഖലീഫ പറഞ്ഞു.
മനാമ മുനിസിപ്പൽ അഫയേഴ്‌സ് ബിൽഡിംഗിന്റെ പുനരുദ്ധാരണ പദ്ധതികളെക്കുറിച്ചും മറ്റ് തന്ത്രപ്രധാനമായ മുനിസിപ്പൽ പദ്ധതികളെക്കുറിച്ചും മുനിസിപ്പാലിറ്റി കാര്യ-കൃഷി മന്ത്രി വിശദീകരിച്ചു. ഈ വർഷം അവസാനത്തോടെ 310,000 മരങ്ങളും 570,000 കണ്ടൽ തൈകളും നട്ടുപിടിപ്പിക്കാൻ ലക്ഷ്യമിടുന്ന 2022-ൽ ആരംഭിച്ച രാജ്യത്തിന്റെ വനവൽക്കരണ പദ്ധതിയുടെ പുരോഗതിയെകുറിച്ച് അദ്ദേഹം വിവരിച്ചു. കാലാവസ്ഥാ വ്യതിയാനത്തെ ചെറുക്കുന്നതിനും പരിസ്ഥിതി സംരക്ഷിക്കുന്നതിനുമുള്ള ബഹ്‌റൈന്റെ പ്രതിബദ്ധത നിറവേറ്റുന്നതിനാണ് ഈ നീക്കം.
പ്രകൃതിവിഭവങ്ങൾ സംരക്ഷിക്കുന്നതിനും ഹരിത ഇടങ്ങൾ വർദ്ധിപ്പിക്കുന്നതിനും വായുവിന്റെ ഗുണനിലവാരം മെച്ചപ്പെടുത്തുന്നതിനും ലക്ഷ്യമിടുന്ന രാജ്യത്തിന്റെ വനവൽക്കരണ പദ്ധതി വേഗത്തിലാക്കാനുള്ള ശ്രമങ്ങൾക്ക് കിരീടാവകാശി നിർദ്ദേശം നൽകി.
ഉപപ്രധാനമന്ത്രി ശൈഖ് ഖാലിദ് ബിൻ അബ്ദുല്ല അൽ ഖലീഫ, ധനകാര്യ-ദേശീയ സമ്പദ്‌വ്യവസ്ഥ മന്ത്രി ഷെയ്ഖ് സൽമാൻ ബിൻ ഖലീഫ അൽ ഖലീഫ, കൂടാതെ നിരവധി മുതിർന്ന ഉദ്യോഗസ്ഥരും സന്നിഹിതരായിരുന്നു.