മനാമ: ഫോർമുല വൺ ബഹ്റൈൻ ഗ്രാൻഡ് പ്രീ മത്സരത്തിനെത്തുന്ന സന്ദർശകരെ സ്വീകരിക്കുന്നതിനുള്ള ഒരുക്കങ്ങൾ പൂർത്തിയായതായി ബഹ്റൈൻ ഇന്റർനാഷനൽ എയർപോർട്ടിന്റെ നടത്തിപ്പുകാരായ ബഹ്റൈൻ എയർപോർട്ട് കമ്പനി (ബി.എ.സി) അറിയിച്ചു. ആഭ്യന്തര മന്ത്രാലയത്തിന്റെ കീഴിലുള്ള നാഷനാലിറ്റി, പാസ്‌പോർട്ട് ആൻഡ് റസിഡൻസ് അഫയേഴ്സ്, കസ്റ്റംസ് അഫയേഴ്സ് ആൻഡ് എയർപോർട്ട് പൊലീസ്, ഗൾഫ് എയർ, മറ്റ് എയർലൈനുകൾ, ഹല ബഹ്റൈൻ, ബഹ്റൈൻ എയർപോർട്ട് സർവിസസ് എന്നിവയുടെ പ്രതിനിധികളും ബി.എ.സിയും തമ്മിൽ നടന്ന യോഗത്തിൽ എല്ലാ തയാറെടുപ്പുകളും അവലോകനം ചെയ്തു. റേസിൽ പങ്കെടുക്കുന്ന ടീമുകളെ സ്വീകരിക്കുന്നതിനും മാർച്ച് മൂന്ന്-അഞ്ച് തീയതികളിൽ ബഹ്റൈൻ ഇന്റർനാഷനൽ സർക്യൂട്ടിൽ നടക്കുന്ന മത്സരത്തിനായി ടീമുകൾ അയച്ച നൂറുകണക്കിന് ടൺ ഉപകരണങ്ങളും മറ്റ് സമാഗ്രികളും കൈകാര്യം ചെയ്യുന്നതിനും വിമാനത്താവളത്തിൽ ഒരുക്കങ്ങൾ പൂർത്തിയാക്കി. ആഗോളതലത്തിൽ മോട്ടോർസ്‌പോർട്ടിന്റെ വർധിച്ചുവരുന്ന ജനപ്രീതിയും കഴിഞ്ഞ വർഷത്തെ മത്സരത്തിലെ അസാമാന്യമായ ജനപങ്കാളിത്തവും ഈ വർഷം കൂടുതൽ സന്ദർശകരെ പ്രതീക്ഷിക്കുന്നതിനുള്ള കാരണങ്ങളാണ്.