കൊച്ചി: കരുവന്നൂര്‍ ബാങ്കുമായി ബന്ധപ്പെട്ട വായ്പാ തട്ടിപ്പുകേസില്‍ വ്യവസായി ഗോകുലം ഗോപാലനെ എന്‍ഫോഴ്‌സ്‌മെന്റ് ഡയറക്ടറേറ്റ് (ഇ.ഡി) ചോദ്യം ചെയ്തു. നാലുകോടി രൂപയുടെ ഇടപാടുമായി ബന്ധപ്പെട്ടാണ് ചോദ്യം ചെയ്യല്‍ നടന്നത്. രാവിലെയും ഉച്ചയ്ക്ക് ശേഷവും ചോദ്യം ചെയ്യല്‍ തുടര്‍ന്നു. കരുവന്നൂര്‍ ബാങ്കുമായി തനിക്ക് യാതൊരു ബന്ധവുമില്ലെന്ന് ഗോകുലം ഗോപാലന്‍ മാധ്യമങ്ങളോട് പറഞ്ഞു. ‘അനില്‍ കുമാര്‍ എന്ന വ്യക്തിയുമായി ബന്ധപ്പെട്ടാണ് ഇ.ഡിയ്ക്ക് മുന്നില്‍ ഹാജരായത്. അനില്‍ കുമാര്‍ എന്റെ കസ്റ്റമറാണ്. അദ്ദേഹമൊരു തെറ്റുചെയ്തു.
അതുമായി ബന്ധപ്പെട്ട കാര്യത്തിനാണ് ഇപ്പോള്‍ ഇ.ഡിയ്ക്ക് മുന്നില്‍ ഹാജരായത്. അനില്‍കുമാറിന്റെ ഡോക്യുമെന്റ് എന്റെ കൈയ്യിലുണ്ട്. അതുകൊണ്ടാണ് വന്നത്. വിശദീകരണം ചോദിക്കാന്‍ മാത്രമാണ് വിളിപ്പിച്ചത്’- ഗോകുലം ഗോപാലന്‍ പറഞ്ഞു. അനില്‍കുമാര്‍ കരുവന്നൂര്‍ ബാങ്കില്‍നിന്ന് കോടിക്കണക്കിന് രൂപ വായ്പയെടുത്ത് തട്ടിപ്പുനടത്തി എന്നാണ് ഇ.ഡി. കണ്ടെത്തിയിട്ടുള്ളത്. ഇയാളെ ഇ.ഡി ഇതിനോടകം ചോദ്യം ചെയ്തിട്ടുണ്ട്. നേരത്തേ ചില രേഖകള്‍ ഹാജരാക്കാനായി ഗോപാലനോട് ഇ.ഡി. നേരത്തേ ആവശ്യപ്പെട്ടിരുന്നു. ഇത് ഹാജരാക്കാതെ വന്നതോടെ സമന്‍സ് അയയ്ക്കുകയായിരുന്നു. കേസുമായി ബന്ധപ്പെട്ട് കൂടുതല്‍പ്പേരെ വരും ദിവസങ്ങളില്‍ ചോദ്യം ചെയ്‌തേക്കും.
