ആലപ്പുഴ: വാര്‍ധക്യത്തിന്റെ ഒറ്റപ്പെടലില്‍ മനംനൊന്ത് ആറ് മക്കളുള്ള ദമ്പതികള്‍ ആത്മഹത്യ ചെയ്തു. രോഗിയായ ഭാര്യക്കു വിഷം കൊടുത്തശേഷം ഭര്‍ത്താവ് വീട്ടുമുറ്റത്തെ മാവില്‍ തൂങ്ങിമരിക്കുകയായിരുന്നു. പിന്നീട് ഭാര്യയും മരിച്ചു. കൈനകരി പഞ്ചായത്ത് 10-ാം വാര്‍ഡ് തോട്ടുവാത്തല നടുവിലേക്കളം വീട്ടില്‍ പി.ടി. ജോസ് (അപ്പച്ചന്‍-80) ആണ് ഭാര്യ ലീലാമ്മയ്ക്കു (75) വിഷം കൊടുത്തശേഷം തൂങ്ങിമരിച്ചത്. ആറു മക്കളുണ്ടെങ്കിലും ഇടയ്ക്കുവന്നു പോകുന്നതല്ലാതെ ഇവരുമായി അധികം അടുപ്പമുണ്ടായിരുന്നില്ലെന്ന് നാട്ടുകാര്‍ പറയുന്നു.
അയല്‍വാസികളാണ് ജോസ് തൂങ്ങിനില്‍ക്കുന്നതു കണ്ടത്. വീടിനകത്തു പരിശോധിച്ചപ്പോള്‍ മരിച്ചനിലയില്‍ ലീലാമ്മയെയും കണ്ടെത്തി. ലീലാമ്മ ദീര്‍ഘനാളായി കിടപ്പുരോഗിയാണ്. ജോസും ചികിത്സയിലാണ്. ആരോഗ്യമില്ലാത്തതിനാല്‍ നാട്ടുകാരുമായി ഇവരധികം സമ്പര്‍ക്കം പുലര്‍ത്തിയിരുന്നില്ല. വീട്ടില്‍നിന്ന് ആത്മഹത്യാക്കുറിപ്പ് കണ്ടെത്തി. വാര്‍ധക്യത്തിന്റെ ഒറ്റപ്പെടലാണ് ജീവനൊടുക്കാന്‍ കാരണമെന്ന് അതില്‍ പറയുന്നുമുണ്ട്. സാമ്പത്തിക ബുദ്ധിമുട്ടുകളുമുണ്ടായിരുന്നു. മൃതദേഹങ്ങള്‍ പോസ്റ്റ്മോര്‍ട്ടത്തിനായി ആലപ്പുഴ മെഡിക്കല്‍ കോളേജ് ആശുപത്രിയിലേക്കു മാറ്റി.
