തിരുവനന്തപുരം: കഴക്കൂട്ടത്ത് കോടികൾ വിലമതിക്കുന്ന ഒരേക്കറോളം വരുന്ന സർക്കാർ ഭൂമി തട്ടിയെടുക്കാൻ സ്വകാര്യ വ്യക്തികളും ഒരു വിഭാഗം സർക്കാർ ഉദ്യോഗസ്ഥരും ഗൂഡാലോചന നടത്തിയതായി കഴക്കൂട്ടം എംഎൽഎ കടകംപള്ളി സുരേന്ദ്രൻ ആരോപിച്ചു. പോത്തൻകോട് ബ്ലോക്ക് പഞ്ചായത്ത് സ്ഥിതി ചെയ്യുന്ന ഒരേക്കർ ഭൂമി തട്ടിയെടുക്കാൻ ആണ് ശ്രമം നടന്നതെന്നും ഇതിനായി വിവരാവകാശ നിയമം ദുരുപയോഗം ചെയ്യുകയായിരുന്നു എന്നും എംഎൽഎ പറഞ്ഞു.
പോത്തൻകോട് ബ്ലോക്ക് പഞ്ചായത്ത് സ്ഥിതി ചെയ്യുന്ന കോമ്പൗണ്ടിൽ സിവിൽ സ്റ്റേഷൻ നിർമാണ പ്രവർത്തനം ആരംഭിക്കുവാൻ പോകവെയാണ് ഈ ഭൂമിയിന്മേൽ അവകാശവാദം ഉന്നയിച്ചു കൊണ്ട് ഒരാൾ കോടതിയെ സമീപിക്കുകയും ഈ ഭൂമിയിൽ നിർമാണ പ്രവർത്തനങ്ങൾക്ക് സ്റ്റേ വാങ്ങിയിട്ടുള്ളതായും അറിയുന്നത്. തുടർന്ന് എംഎൽഎയും ഉദ്യോഗസ്ഥരും നടത്തിയ അന്വേഷണത്തിലാണ് ഗൂഡാലോചന വെളിപ്പെട്ടത്.
വിവരാവകാശ നിയമം ദുരുപയോഗം ചെയ്തു വ്യാജ രേഖ ചമച്ചാണ് കോടതിയെ തെറ്റിദ്ധരിപ്പിച്ച് ചില സ്വകാര്യ വ്യക്തികൾ സ്റ്റേ നേടിയെടുത്തത്. വിവരാവകാശ നിയമപ്രകാരം ചോദ്യങ്ങൾ ചോദിച്ചും ചോദിപ്പിച്ചും ഈ സ്ഥലം തട്ടിയെടുക്കലിന് സഹായകരമായ രീതിയിൽ മറുപടി നൽകിയുമാണ് സർക്കാർ ഉദ്യോഗസ്ഥർ ഉൾപ്പെടുന്ന ഈ ലോബി പ്രവർത്തിച്ചത്. ഈ ഭൂമി ഒരു സ്വകാര്യ വ്യക്തി ദാനം നൽകിയതാണ് എന്ന് സർക്കാർ രേഖകളിൽ ഒന്നും തന്നെയിലല്ലെങ്കിലും വിവരം കേട്ട് കേൾവിയുണ്ടെന്ന് മറുപടി നൽകിയാണ് തട്ടിപ്പ് നടത്തിയത്. എന്നാൽ വില്ലേജ് റവന്യൂ രേഖകൾ അടക്കം സർക്കാർ രേഖകളിൽ ഇത് പുറമ്പോക്ക് ഭൂമിയാണ് എന്നുള്ള വിവരങ്ങൾ മനഃപൂർവം മറച്ചു പിടിക്കുകയും ചെയ്തു ബിഡിഒ ഉൾപ്പെടുന്ന ഉദ്യോഗസ്ഥ ലോബി.
കേരളത്തിൻറെ ഐടി തലസ്ഥാനമായ കഴക്കൂട്ടം കേന്ദ്രമാക്കി ഒരു സിവിൽ സ്റ്റേഷനായി തന്റെ പരിശ്രമത്തെ തുടർന്ന് സർക്കാർ 38.50 കോടി രൂപ മുഖ്യമന്ത്രി അതിന്റെ ശിലാസ്ഥാപനം നിര്വഹിച്ചതുമാണെന്നും ഈ തട്ടിപ്പ് സംഘം ഇല്ലായിരുന്നുവെങ്കിൽ 4 നിലയെങ്കിലും ഇതിനോടകം പൂര്തിയാകുമായിരുന്നുവെന്നും എംഎൽഎ പറഞ്ഞു. കഴക്കൂട്ടത്ത് വിവിധ ഭാഗങ്ങളിലായി വാടക കെട്ടിടങ്ങളിൽ ചിതറി കിടക്കുന്ന സർക്കാർ ഓഫീസുകൾ കഴക്കൂട്ടം സിവിൽ സ്റ്റേഷൻ യാഥാർഥ്യമാകുന്നതോടെ ഒരു കുടക്കീഴിലാകുമായിരുന്നു എന്നും നിലവിൽ പോത്തൻകോട് ബ്ലോക്ക് പഞ്ചായത്ത് ഓഫീസ് സ്ഥിതി ചെയ്യുന്ന ഒരേക്കറോളം വരുന്ന ഈ സ്ഥലത്തെ പഴയ കെട്ടിടങ്ങളെല്ലാം പൊളിച്ചു മാറ്റിയതിനു ശേഷമാണ് അത്യാധുനിക സൗകര്യങ്ങളോടെയാണ് സിവില് സ്റ്റേഷന് നിർമിക്കുന്നത്. 10 നിലകളിലായി നിർമിക്കുന്ന സിവില് സ്റ്റേഷനില് ബ്ലോക്ക് ഓഫീസ്, സബ് ട്രഷറി ഓഫീസ്, എംപ്ലോയ്മെന്റ് എക്സ്ചേഞ്ച്, വില്ലേജ് ഓഫീസ്, രജിസ്ട്രാര് ഓഫീസ് തുടങ്ങി പതിനഞ്ചോളം സര്ക്കാര് ഓഫീസുകള്ക്ക് പുറമെ ഭാവിയിൽ കഴക്കൂട്ടത്തിന് താലൂക്കും കോടതിയും അനുവദിക്കുകയാണെങ്കിൽ അവ പ്രവർത്തിക്കുന്നതിനുള്ള സൗകര്യവും ഈ കെട്ടിടത്തിൽ ഒരുക്കിയിട്ടുണ്ട് എന്നും എംഎൽഎ വ്യക്തമാക്കി.
കാര്യങ്ങൾ കോടതിയെ ബോധ്യപ്പെടുത്തി സ്റ്റേ നീക്കം ചെയ്ത് നിർമാണ പ്രവർത്തനം ഉടൻ തന്നെ ആരംഭിക്കുവാനുള്ള ശ്രമത്തിലാണ് സർക്കാർ എന്നും സർക്കാർ ഭൂമി തട്ടിയെടുക്കാൻ ഒത്താശ ചെയ്ത ഉദ്യോഗസ്ഥർക്കെതിരെ കർശന നടപടി സ്വീകരിക്കുവാൻ വിജിലൻസ് അന്വേഷണം ആവശ്യപ്പെടുമെന്നും കടകംപള്ളി സുരേന്ദ്രൻ എംഎൽഎ വ്യക്തമാക്കി.