​തങ്ങളുടെ ആറാം മത്സരത്തിൽ തുടക്കത്തിൽ തന്നെ ഓപ്പണർ ആകാശിനെ നഷ്ടമായെങ്കിലും യാതൊരു സമ്മർദ്ദവുമില്ലാതെയാണ് അസർ ബാറ്റുവീശിയത്. അഖിൻ സത്താർ എറിഞ്ഞ നേരിട്ട രണ്ടാമത്തെ പന്ത് തന്നെ ബൗണ്ടറി കടത്തി തുടങ്ങിയ താരം ആ ഓവറിൽ രണ്ട് ഫോറുകൾ നേടി നയം വ്യക്തമാക്കി. പിന്നീട് ഗ്രീൻഫീൽഡിൽ കണ്ടത് അസറുദ്ദീന്റെ അഴിഞ്ഞാട്ടമായിരുന്നു. വെറും 56 പന്തിൽ സീസണിലെ തന്റെ രണ്ടാം സെഞ്ച്വറി പൂർത്തിയാക്കിയ താരം 60 പന്തിൽ 112 റൺസുമായി പുറത്താകാതെ നിന്നു. പത്ത് കൂറ്റൻ സിക്സറുകളും അഞ്ച് ബൗണ്ടറികളും ഉൾപ്പെടുന്നതായിരുന്നു ആ വെടിക്കെട്ട് ഇന്നിങ്സ്. അവസാന അഞ്ച് ഓവറിൽ മാത്രം 68 റൺസാണ് അസറിന്റെ ചിറകിലേറി ആലപ്പി അടിച്ചുകൂട്ടിയത്.

അവസാന ഓവറിലെ മൂന്നാം പന്തിൽ പടുകൂറ്റൻ സിക്സർ പറത്തി അസർ തന്നെ ആലപ്പിയുടെ വിജയമുറപ്പിക്കുകയും ചെയ്തു. ​സീസണിലെ ആദ്യ മത്സരം മുതൽ അതിശയിപ്പിക്കുന്ന ഫോമിലാണ് ഈ ആലപ്പി ഉപനായകൻ. പവർപ്ലേ ഓവറുകളിൽ ബൗളർമാർക്ക് മേൽ പൂർണ്ണ ആധിപത്യം സ്ഥാപിക്കുന്ന അസറിന്റെ ഭയമില്ലാത്ത ബാറ്റിംഗാണ് എല്ലാ മത്സരങ്ങളിലും ടീമിന് കരുത്തുറ്റ അടിത്തറ നൽകുന്നത്. ആറ് മത്സരങ്ങളിൽ നിന്നായി മൂന്ന് അർദ്ധസെഞ്ച്വറിയും രണ്ട് സെഞ്ച്വറിയും ഉൾപ്പെടെ 419 റൺസാണ് താരം ഇതിനോടകം അടിച്ചുകൂട്ടിയത്. വെറും 208 പന്തുകളിൽ നിന്നാണ് അസർ ഇത്രയും റൺസ് നേടിയത് എന്നതും ശ്രദ്ധേയമാണ്. 34 സിക്സറുകളും 25 ഫോറുകളുമാണ് ഇതുവരെ താരത്തിന്റെ ബാറ്റിൽ നിന്ന് പിറന്നത്. നേരത്തെ കൊല്ലത്തിനെതിരെയാണ് താരം തന്റെ ആദ്യ സെ‍ഞ്ച്വറി നേടിയത്. സ്ഥിരതയോടെ ബാറ്റുവീശുന്ന അസറിന്റെ ഈ മിന്നും ഫോമിന്റെ കരുത്തിലാണ് ആറ് മത്സരങ്ങളിൽ നിന്ന് എട്ട് പോയിന്റുമായി ആലപ്പി റിപ്പിൾസ് ഒന്നാം സ്ഥാനത്ത് തലയെടുപ്പോടെ നിൽക്കുന്നത്.

The post KCL സീസൺ 3| അസറുദ്ദീൻ്റെ വെടിക്കെട്ടിൽ കാലിക്കറ്റിനെ തകർത്ത് ആലപ്പി appeared first on Starvision News Malayalam.

അതിവേഗത്തിൽ സഞ്ചരിക്കുന്നതിനിടെ അജിത്തിന്റെ കാറിന്റെ നിയന്ത്രണം നഷ്ടപ്പെടുകയും ട്രാക്കിലുണ്ടായിരുന്ന മറ്റൊരു വാഹനവുമായി കൂട്ടിയിടിക്കുകയുമായിരുന്നുവെന്നാണ് ‘ഫിലിമിബീറ്റ് തമിഴ്’ റിപ്പോർട്ട് ചെയ്തത്. കൂട്ടിയിടിയിൽ കാറിന് കാര്യമായ കേടുപാടുകൾ സംഭവിച്ചു.

അപകടത്തിനു പിന്നാലെ അജിത് സുരക്ഷിതമായി കാറിൽനിന്ന് പുറത്തിറങ്ങി. അദ്ദേഹത്തിന് പരിക്കില്ലെന്ന വിവരം പുറത്തുവന്നതോടെ ആശങ്കയിലായിരുന്ന ആരാധകർക്കും മോട്ടോർസ്പോർട് പ്രേമികൾക്കും ആശ്വാസമായി.

വർഷങ്ങളായി മോട്ടോർസ്പോർട് രംഗത്ത് സജീവമായ അജിത് ‘അജിത് കുമാർ റേസിങ്’ എന്ന പേരിൽ സ്വന്തം ടീം രൂപീകരിച്ചിട്ടുണ്ട്. ഏഷ്യൻ ലെ മാൻസ് സീരീസ്, മിഷെലിൻ ലെ മാൻസ് കപ്പ് എന്നിവയുൾപ്പെടെയുള്ള അന്താരാഷ്ട്ര എൻഡുറൻസ് റേസിങ് മത്സരങ്ങളിൽ ടീം പങ്കെടുക്കുന്നുണ്ട്.

റേസിങ് ട്രാക്കിൽ അജിത് അപകടത്തിൽപ്പെടുന്നത് ഇതാദ്യമല്ല. മുൻപും മത്സരങ്ങൾക്കും പരിശീലനത്തിനുമിടെ അദ്ദേഹത്തിന്റെ വാഹനങ്ങൾ അപകടത്തിൽപ്പെട്ടിട്ടുണ്ട്. അപകടസാധ്യതകൾക്കിടയിലും മോട്ടോർസ്പോർട്ടിനോടുള്ള അഭിനിവേശം കൈവിടാതെ അന്താരാഷ്ട്ര മത്സരങ്ങളിൽ അദ്ദേഹം സജീവമായി തുടരുകയാണ്.

The post യൂറോപ്പിലെ എൻഡുറൻസ് റേസിനിടെ നടൻ അജിത് കുമാറിന്റെ കാർ അപകടത്തിൽപ്പെട്ടു; താരം സുരക്ഷിതൻ appeared first on Starvision News Malayalam.

കൃഷിവകുപ്പ് ഇതുസംബന്ധിച്ച് G.O. No. 61/2026/AGRI പ്രകാരം ഉത്തരവിറക്കി. 2008ലെ കേരള നെൽവയൽ-തണ്ണീർത്തട സംരക്ഷണ നിയമത്തിലെ വകുപ്പ് 10(2) പ്രകാരമാണ് ഭൂമി തരംമാറ്റത്തിന് അനുമതി നൽകിയിരിക്കുന്നത്.

അന്താരാഷ്ട്ര ക്രിക്കറ്റ് സ്റ്റേഡിയം ‘പൊതു ആവശ്യം’

കേരള സ്പോർട്സ് നയം 2023, കേരള സ്പോർട്സ് ആക്ട് 2025, കേരള സ്പോർട്സ് ഇൻഫ്രാസ്ട്രക്ചർ ഡെവലപ്മെന്റ് സ്കീം 2025 എന്നിവയുടെ അടിസ്ഥാനത്തിലാണ് എറണാകുളം ക്രിക്കറ്റ് സ്റ്റേഡിയം പദ്ധതി ‘പൊതു ആവശ്യം’ എന്ന നിലയിൽ സർക്കാർ പരിഗണിച്ചത്.

അതേസമയം, പദ്ധതിയുടെ ഭാഗമായി പരിസ്ഥിതി സംരക്ഷണവും ജലസംരക്ഷണവും ഉറപ്പാക്കുന്നതിനുള്ള നിർബന്ധിത വ്യവസ്ഥകളും സർക്കാർ മുന്നോട്ടുവച്ചിട്ടുണ്ട്.

കെ.സി.എയുടെ അപേക്ഷയ്ക്ക് വീണ്ടും അംഗീകാരം

കേരള ക്രിക്കറ്റ് അസോസിയേഷൻ (കെ.സി.എ) മുൻ സർക്കാരിന്റെ കാലത്ത് സമർപ്പിച്ച അപേക്ഷ സംസ്ഥാനതല സമിതി വിശദമായി പരിശോധിച്ച് ഭൂമി തരംമാറ്റത്തിന് ശുപാർശ ചെയ്തിരുന്നു. എന്നാൽ നിയമപരമായ ചില സാങ്കേതിക തടസ്സങ്ങൾ കാരണം അന്ന് പദ്ധതിക്ക് അന്തിമ അനുമതി ലഭിച്ചിരുന്നില്ല.

തുടർന്ന് മുൻ മുഖ്യമന്ത്രി പിണറായി വിജയൻ, റവന്യൂ മന്ത്രി കെ. രാജൻ, കായിക വകുപ്പ് മന്ത്രി വി. അബ്ദുറഹ്മാൻ, കൃഷി മന്ത്രി പി. പ്രസാദ് എന്നിവരുടെ നേതൃത്വത്തിൽ പദ്ധതിക്കായി ആവശ്യമായ നിയമഭേദഗതികൾ കൊണ്ടുവന്നു. എൽ.ഡി.എഫ് സർക്കാരിന്റെ അവസാന മന്ത്രിസഭാ യോഗത്തിൽ പദ്ധതിയെ ‘പൊതു ആവശ്യം’ ആയി പ്രഖ്യാപിക്കുകയും കെ.സി.എയ്ക്ക് ഭൂപരിഷ്കരണ നിയമത്തിൽ ഇളവ് അനുവദിക്കുകയും ചെയ്തിരുന്നു.

തുടർനടപടികൾ വേഗത്തിലാക്കുന്നതിനായി മുഖ്യമന്ത്രി വി.ഡി. സതീശൻ നേരിട്ട് ഇടപെട്ടതായും കെ.സി.എ അറിയിച്ചു. കൃഷിവകുപ്പ് മന്ത്രി ടി. സിദ്ദിഖും കായിക വകുപ്പ് മന്ത്രി ഒ.കെ. ജനീഷും ആവശ്യമായ നിർദേശങ്ങൾ നൽകിയതിനെ തുടർന്ന് കെ.സി.എ സമർപ്പിച്ച അപേക്ഷ സംസ്ഥാനതല സമിതി വീണ്ടും പരിഗണിച്ചു.

അന്താരാഷ്ട്ര ക്രിക്കറ്റ് സ്റ്റേഡിയം പദ്ധതിക്കായി ഭൂമി തരംമാറ്റുന്നതിന് സമിതി ശുപാർശ നൽകുകയും സംസ്ഥാന സർക്കാർ ശുപാർശ പൂർണമായി അംഗീകരിക്കുകയും ചെയ്തു.

കായിക ടൂറിസത്തിനും സമ്പദ്‌വ്യവസ്ഥയ്ക്കും നേട്ടമാകും

കേരളത്തിലെ കായിക അടിസ്ഥാനസൗകര്യ വികസനത്തിൽ നാഴികക്കല്ലായ തീരുമാനമാണിതെന്ന് കെ.സി.എ പ്രസിഡന്റ് അഡ്വ. ശ്രീജിത്ത് വി. നായർ പറഞ്ഞു.

നിർദിഷ്ട അന്താരാഷ്ട്ര ക്രിക്കറ്റ് സ്റ്റേഡിയം താരങ്ങൾക്കും ആരാധകർക്കും ലോകോത്തര നിലവാരത്തിലുള്ള സൗകര്യങ്ങൾ ഒരുക്കുമെന്ന് അദ്ദേഹം പറഞ്ഞു. ദേശീയ, അന്തർദേശീയ ക്രിക്കറ്റ് മത്സരങ്ങൾക്ക് വേദിയാകുന്നതിലൂടെ കേരളത്തിലെ കായിക ടൂറിസത്തിനും സംസ്ഥാന സമ്പദ്‌വ്യവസ്ഥയ്ക്കും പദ്ധതിയിലൂടെ വലിയ നേട്ടമുണ്ടാകുമെന്നും അദ്ദേഹം വ്യക്തമാക്കി.

പദ്ധതിക്ക് ബി.സി.സി.ഐയുടെ അനുമതി നേടിയെടുക്കുന്നതിലും വിവിധ സർക്കാരുകളുമായി ഫലപ്രദമായി ഏകോപനം നടത്തുന്നതിലും നിർണായക പങ്കുവഹിച്ച മുൻ കെ.സി.എ പ്രസിഡന്റ് കൂടിയായ നിലവിലെ ഡബ്ല്യു.പി.എൽ ചെയർമാൻ ജയേഷ് ജോർജിനും കെ.സി.എ പ്രത്യേക നന്ദി രേഖപ്പെടുത്തി.

The post എറണാകുളത്ത് അന്താരാഷ്ട്ര ക്രിക്കറ്റ് സ്റ്റേഡിയത്തിന് സർക്കാർ അനുമതി; ചെങ്ങമനാട്ടിൽ 10.13 ഹെക്ടർ ഭൂമി തരംമാറ്റും appeared first on Starvision News Malayalam.

മനാമ: ഇന്ത്യൻ ക്ലബ് അംഗങ്ങൾക്കായി സംഘടിപ്പിച്ച പ്രതിമാസ ബാഡ്മിന്റൺ ടൂർണമെന്റ് വിജയകരമായി സമാപിച്ചു. ഇന്ത്യൻ ക്ലബ് ബഹ്റൈനിൽ അഞ്ചുദിവസമായി നടന്ന ആവേശകരമായ മത്സരങ്ങൾക്ക് ജൂലൈ 24 വെള്ളിയാഴ്ചയാണ് സമാപനമായത്.

ജൂലൈ 20 തിങ്കളാഴ്ച ആരംഭിച്ച ടൂർണമെന്റിൽ വിവിധ പ്രായവിഭാഗങ്ങളിലും നൈപുണ്യ വിഭാഗങ്ങളിലുമായി നിരവധി അംഗങ്ങൾ മത്സരിച്ചു. ക്ലബ് അംഗങ്ങളും കുടുംബാംഗങ്ങളും സുഹൃത്തുക്കളും നൽകിയ പിന്തുണ മത്സരവേദിയിൽ സജീവമായ കായികാന്തരീക്ഷം സൃഷ്ടിച്ചു.

ഇന്ത്യൻ ക്ലബ് എക്സിക്യൂട്ടീവ് കമ്മിറ്റി, ബാഡ്മിന്റൺ കമ്മിറ്റി, ടൂർണമെന്റ് ഉദ്യോഗസ്ഥർ, സംഘാടകസംഘം എന്നിവരുടെ സാന്നിധ്യത്തിൽ ഫൈനൽ മത്സരങ്ങളും സമ്മാനദാനച്ചടങ്ങും നടന്നു. ഓരോ വിഭാഗത്തിലെയും വിജയികൾക്കും രണ്ടാം സ്ഥാനക്കാർക്കും ട്രോഫികളും സമ്മാനങ്ങളും വിതരണം ചെയ്തു.

ടൂർണമെന്റ് വിജയകരമായി സംഘടിപ്പിക്കുന്നതിന് പിന്തുണ നൽകിയ സ്പോൺസർമാർ, ടൂർണമെന്റ് ഉദ്യോഗസ്ഥർ, സന്നദ്ധപ്രവർത്തകർ, മത്സരാർഥികൾ എന്നിവർക്കു ഇന്ത്യൻ ക്ലബ് എക്സിക്യൂട്ടീവ് കമ്മിറ്റി നന്ദി അറിയിച്ചു. കളിക്കാരെ പ്രോത്സാഹിപ്പിച്ച കാണികൾക്കും അഭ്യുദയകാംക്ഷികൾക്കും ക്ലബ് നന്ദി രേഖപ്പെടുത്തി.

The post ഇന്ത്യൻ ക്ലബ് പ്രതിമാസ അംഗ ബാഡ്മിന്റൺ ടൂർണമെന്റ് വിജയകരമായി സമാപിച്ചു appeared first on Starvision News Malayalam.

ഡാളസ്: സ്പെയിൻ–ഫ്രാൻസ് ലോകകപ്പ് സെമി ഫൈനൽ പോരാട്ടം നേരിട്ട് കാണാൻ നടൻ മോഹൻലാൽ ഭാര്യ സുചിത്രയ്ക്കൊപ്പം ഡാളസ് സ്റ്റേഡിയത്തിലെത്തി. ആവേശകരമായ മത്സരത്തിൽ ഫ്രാൻസിനെ മറികടന്ന് സ്പെയിൻ ഫൈനലിലേക്ക് മുന്നേറുന്നതിന് ഇരുവരും ഗാലറിയിൽ നിന്ന് സാക്ഷിയായി.

70,000-ത്തിലധികം കാണികൾ നിറഞ്ഞ സ്റ്റേഡിയത്തിൽ മോഹൻലാലിന്റെയും സുചിത്രയുടെയും സാന്നിധ്യം മലയാളി ആരാധകരുടെ ശ്രദ്ധ നേടി. സ്പെയിനിന്റെ യുവതാരനിരയും ഫ്രാൻസിന്റെ ആക്രമണശൈലിയും നേർക്കുനേർ വന്ന മത്സരത്തിലെ ഓരോ നിമിഷവും മോഹൻലാൽ ആസ്വദിക്കുന്ന ചിത്രങ്ങളും വീഡിയോകളും സാമൂഹിക മാധ്യമങ്ങളിൽ വൈറലായി.

ഈ ലോകകപ്പിൽ മോഹൻലാൽ ഗാലറിയിലെത്തുന്നത് ഇതാദ്യമല്ല. കൻസാസ് സിറ്റിയിൽ നടന്ന അർജന്റീന–സ്വിറ്റ്സർലാൻഡ് ക്വാർട്ടർ ഫൈനൽ മത്സരവും അദ്ദേഹം നേരിട്ട് കണ്ടിരുന്നു.

അർജന്റീനയുടെ എവേ ജേഴ്സി ധരിച്ച് കറുത്ത കണ്ണടയും കൊമ്പൻ മീശയുമായി സ്റ്റേഡിയത്തിൽ ഇരിക്കുന്ന മോഹൻലാലിന്റെ ചിത്രങ്ങൾ അന്നും ആരാധകർ ഏറ്റെടുത്തിരുന്നു. മെസിയും സംഘവും വാം-അപ്പ് ചെയ്യുന്ന ദൃശ്യങ്ങൾ മൊബൈലിൽ പകർത്തുന്ന അദ്ദേഹത്തിന്റെ വീഡിയോകളും വലിയ ശ്രദ്ധ നേടിയിരുന്നു.

The post സ്പെയിൻ–ഫ്രാൻസ് ലോകകപ്പ് സെമി കാണാൻ സുചിത്രയ്ക്കൊപ്പം മോഹൻലാൽ ഡാളസ് സ്റ്റേഡിയത്തിൽ appeared first on Starvision News Malayalam.

മനാമ: സെന്റ് പോൾസ് മാർത്തോമാ യുവജന സഖ്യത്തിന്റെ ആഭിമുഖ്യത്തിൽ ഫിഫ ലോകകപ്പിന്റെ ആവേശം ഉൾക്കൊണ്ടുകൊണ്ട് “ഫ്രണ്ട്ലി ഫുട്ബോൾ മാച്ച് – സീസൺ 1” ജൂലൈ 3-ന് വൈകുന്നേരം 6.00 മണിക്ക് അൽബുർഹാമയിലെ യുവന്റസ് അരീനയിൽ സംഘടിപ്പിച്ചു.ബഹ്റൈൻ മലയാളി സി.എസ്.ഐ. ഇടവക വികാരി റവ. മാത്യൂസ് ഡേവിഡ് ഉദ്ഘാടനം നിർവഹിച്ചു. ഇടവക വൈസ് പ്രസിഡന്റ് സുധിൻ എബ്രഹാം അധ്യക്ഷത വഹിച്ചു. മത്സരത്തിൽ പങ്കെടുത്ത ഫുട്ബോൾ പ്രേമികളെ കൺവീനർ ജോയൽ ഈപ്പൻ ജോസ് സ്വാഗതം ചെയ്തു. ആവേശകരമായ മത്സരങ്ങൾക്കൊടുവിൽ സിബിൻ സജു തോമസ് ക്യാപ്റ്റനായ Phantom Saints United ജേതാക്കളായി. ഏമ്പൽ.കെ. സണ്ണി ക്യാപ്റ്റനായ Sapphire Titans FC റണ്ണേഴ്സ്-അപ്പായി. വിജയികളായ ഇരു ടീമുകൾക്കും ട്രോഫികളും മെഡലുകളും സമ്മാനിച്ചു.

ചടങ്ങിൽ ഇടവക ഭാരവാഹികളും യുവജന സഖ്യം ഭാരവാഹികളും ഇടവകാംഗങ്ങളും സന്നിഹിതരായിരുന്നു. പരിപാടിയിൽ പങ്കെടുത്ത എല്ലാവർക്കുംസഖ്യം വൈസ് പ്രസിഡൻ്റ് ബിജിൻ എബ്രഹാം നന്ദി രേഖപ്പെടുത്തി.
പരിപാടിയുടെ കൺവീനർമാരായി മിഷേൽ ബിജി, അജീഷ് മാത്യു, ജോയൽ ഈപ്പൻ ജോസ് എന്നിവർ പ്രവർത്തിച്ചു. ഫിഫ ലോകകപ്പിന്റെ ആവേശം പ്രവാസി മലയാളികൾക്കിടയിൽ കൂടുതൽ ഉണർത്തുന്നതിനും യുവജനങ്ങൾക്കിടയിൽ കായിക സൗഹൃദവും ഐക്യവും വളർത്തുന്നതിനും ഈ ഫുട്ബോൾ മത്സരം വേദിയായി.

The post ഫിഫ ലോകകപ്പ് ആവേശത്തിൽ ഫ്രണ്ട്ലി ഫുട്ബോൾ മാച്ച് സംഘടിപ്പിച്ചു appeared first on Starvision News Malayalam.

മനാമ: ക്രിസ്റ്റ്യാനോ റൊണാൾഡോയുടെ അവസാന ഫിഫ ലോകകപ്പ് യാത്ര ഹൃദയഭേദകമായി അവസാനിച്ചു. റൗണ്ട് ഓഫ് 16 മത്സരത്തിൽ പോർച്ചുഗൽ സ്പെയിനോട് അവസാന നിമിഷം 1-0 ന് തോറ്റതോടെയാണ് ഫുട്ബോൾ ലോകത്തെ ഇതിഹാസ താരത്തിന്റെ ലോകകപ്പ് സ്വപ്നം അവസാനിച്ചത്.

41-ാം വയസ്സിൽ കളത്തിലിറങ്ങിയ റൊണാൾഡോ, ഇത് തന്റെ അവസാന ലോകകപ്പായിരിക്കുമെന്ന് നേരത്തെ തന്നെ പ്രഖ്യാപിച്ചിരുന്നു. ആറു ലോകകപ്പുകളിൽ ഗോൾ നേടുന്ന ആദ്യ താരമെന്ന ചരിത്ര നേട്ടം കൈവരിച്ചെങ്കിലും, സ്പെയിനിനെതിരായ നിർണായക മത്സരത്തിൽ പോർച്ചുഗലിന് വിജയത്തിലേക്ക് എത്താനായില്ല.

സ്റ്റോപ്പേജ് ടൈമിൽ മികേൽ മെറിനോ നേടിയ ഗോൾ സ്പെയിനിന് ക്വാർട്ടർ ഫൈനൽ പ്രവേശനം ഉറപ്പിച്ചു. പരാജയത്തിനു പിന്നാലെ കണ്ണീരോടെ മൈതാനം വിട്ട റൊണാൾഡോയുടെ ചിത്രം ഫുട്ബോൾ ആരാധകർക്ക് വികാരഭരിത നിമിഷമായി.

ലോക ഫുട്ബോളിലെ ഏറ്റവും വലിയ താരങ്ങളിൽ ഒരാളായ റൊണാൾഡോയുടെ ലോകകപ്പ് യാത്ര ഇതോടെ അവസാനിക്കുമ്പോൾ, അദ്ദേഹത്തിന്റെ നേട്ടങ്ങളും പോരാട്ടങ്ങളും ഫുട്ബോൾ ചരിത്രത്തിൽ എന്നും ഓർമ്മിക്കപ്പെടും.

The post റൊണാൾഡോയുടെ അവസാന ലോകകപ്പ് യാത്ര കണ്ണീരോടെ അവസാനിച്ചു appeared first on Starvision News Malayalam.

ഡാലസ്: ലോകകപ്പ് രണ്ടാം റൗണ്ട് പോരാട്ടത്തിൽ ഓസ്ട്രേലിയയെ പെനാൽറ്റി ഷൂട്ടൗട്ടിൽ 4-2ന് തോൽപ്പിച്ച് ഈജിപ്ത് പ്രീക്വാർട്ടറിൽ പ്രവേശിച്ചു. ലോകകപ്പ് ചരിത്രത്തിൽ ആദ്യമായാണ് ഈജിപ്ത് പ്രീക്വാർട്ടറിൽ ഇടം നേടുന്നത്.

നിശ്ചിത സമയത്തും അധിക സമയത്തും ഇരു ടീമുകളും ഓരോ ഗോൾ വീതം നേടി സമനില പാലിച്ചതോടെയാണ് മത്സരം ഷൂട്ടൗട്ടിലേക്ക് നീങ്ങിയത്. ഷൂട്ടൗട്ടിൽ കൂടുതൽ കൃത്യതയോടെ കിക്കുകൾ പൂർത്തിയാക്കിയ ഈജിപ്ത് ചരിത്ര നേട്ടം സ്വന്തമാക്കി.

മത്സരത്തിന്റെ 13-ാം മിനിറ്റിൽ ഇമാം അഷൗറിലൂടെയാണ് ഈജിപ്ത് ലീഡ് നേടിയത്. ഈ ലോകകപ്പിലെ ആദ്യ മത്സരത്തിൽ ബെൽജിയത്തിനെതിരെയും ഈജിപ്തിനായി ആദ്യം ഗോൾ നേടിയതും ഇമാം അഷൗറായിരുന്നു.

രണ്ടാം പകുതിയിൽ ഓസ്ട്രേലിയ തിരിച്ചടിച്ചു. 55-ാം മിനിറ്റിൽ ഈജിപ്ഷ്യൻ ഡിഫൻഡർ മുഹമ്മദ് ഹാനിയുടെ സെൽഫ് ഗോളിലൂടെയാണ് ഓസീസ് സമനില പിടിച്ചത്.

ഹൈബാൾ തടയാനുള്ള ശ്രമത്തിനിടെ ഹാനിയുടെ തലയിൽ തട്ടി പന്ത് വലയിലെത്തുകയായിരുന്നു. ബെൽജിയത്തിനെതിരെയും ഹാനി സെൽഫ് ഗോൾ വഴങ്ങിയിരുന്നു.

ആവേശകരമായ പോരാട്ടത്തിനൊടുവിൽ ഷൂട്ടൗട്ടിൽ ഓസ്ട്രേലിയയെ മറികടന്ന ഈജിപ്ത് ലോകകപ്പ് വേദിയിൽ പുതിയ ചരിത്രം കുറിച്ചു.

The post ചരിത്രം കുറിച്ച് ഈജിപ്ത്; പെനാൽറ്റി ഷൂട്ടൗട്ടിൽ ഓസ്ട്രേലിയയെ വീഴ്ത്തി പ്രീക്വാർട്ടറിൽ appeared first on Starvision News Malayalam.

ഹൂസ്റ്റൺ : ഹൂസ്റ്റൺ സ്റ്റേഡിയത്തിലെ പുൽമൈതാനത്ത് ആവേശത്തിന്റെ അലയൊലികൾ തീർത്ത മത്സരത്തിൽ ഏഷ്യൻ കരുത്തരായ ജപ്പാനെതിരെ ബ്രസീലിന് ‘അതിജീവന’ ജയം. ഓഫ്-വൈറ്റ് ജഴ്സി അണിഞ്ഞെത്തിയ ജാപ്പനീസ് പടയെ ഒന്നിനെതിരെ രണ്ടു ഗോളുകൾക്ക് മറികടന്ന് ബ്രസീൽ ലോകകപ്പിന്റെ ക്വാർട്ടർ ഫൈനലിലേക്ക് ടിക്കറ്റെടുത്തു.

ജപ്പാൻ താരം കൈഷു സാനോയിലൂടെ 29-ാം മിനിറ്റിൽ പിറന്ന ഗോളാണ് ബ്രസീലിനെ ഞെട്ടിച്ചത്. ജപ്പാൻ താരങ്ങളുടെ അക്രോബാറ്റിക് ഡൈവിംഗ് ടാക്കിളുകൾ നിറഞ്ഞ പ്രതിരോധം ഭേദിക്കാൻ ബ്രസീൽ മഞ്ഞപ്പടയ്ക്ക് 56-ാം മിനിറ്റ് വരെ കാത്തിരിക്കേണ്ടി വന്നു. ഒടുവിൽ കാസെമിറോയുടെ തകർപ്പൻ ഹെഡ്ഡറിലൂടെ ബ്രസീൽ മത്സരത്തിലേക്ക് തിരിച്ചുവന്നു.

മത്സരം എക്സ്ട്രാ ടൈമിലേക്ക് നീങ്ങുമെന്ന് കരുതിയ ഘട്ടത്തിലാണ് സ്റ്റേഡിയത്തെ ആവേശക്കടലിലാക്കിക്കൊണ്ട് ഗബ്രിയേൽ മാർട്ടിനെല്ലിയുടെ ഗോളെത്തിയത്. 90+6-ാം മിനിറ്റിൽ ജപ്പാൻ ഗോൾവല കുലുക്കി മാർട്ടിനെല്ലി ബ്രസീലിന് വിജയമധുരം സമ്മാനിച്ചു.

ഹൂസ്റ്റൺ സ്റ്റേഡിയം മത്സരത്തിനിടെ ആരാധകരുടെ ആവേശം കൊണ്ട് അക്ഷരാർത്ഥത്തിൽ നിറഞ്ഞുനിന്നു. മഞ്ഞ ജഴ്സി അണിഞ്ഞ ബ്രസീൽ ആരാധകരും ഓഫ്-വൈറ്റ് ജഴ്സിയും നീലയും  അണിഞ്ഞെത്തിയ  ജപ്പാൻ ആരാധകരും സ്റ്റേഡിയത്തെ അവിസ്മരണീയമായൊരു വേദിയാക്കി മാറ്റി.

അവസാന നിമിഷം ഗോൾ പിറന്നപ്പോൾ സ്റ്റേഡിയം ആകെ ആവേശക്കടലായി മാറി. ഹൂസ്റ്റണിലെ ഗാലറിയിൽ നിറഞ്ഞാടിയ മഞ്ഞപ്പടയുടെ ആവേശത്തിരകൾ കളിക്കളത്തിൽ ബ്രസീലിന് പകർന്നു നൽകിയത് വലിയൊരു കരുത്തായിരുന്നു.

ആരാധകരുടെ ആവേശം കൊണ്ട് ഹൂസ്റ്റൺ സ്റ്റേഡിയം അക്ഷരാർത്ഥത്തിൽ ഇളകിമറിയുകയായിരുന്നു. ഗാലറിയിൽ ബ്രസീൽ-ജപ്പാൻ പോരാട്ടത്തിന്റെ ആവേശം വാനോളം ഉയർത്താൻ മലയാളി ആരാധകരും മുന്നിലുണ്ടായിരുന്നു.

ബ്രസീലിന്റെ ഈ മുന്നേറ്റം ലോകകപ്പിൽ ഇനി വരാനിരിക്കുന്ന വലിയ പോരാട്ടങ്ങൾക്ക് വലിയ ആത്മവിശ്വാസമാണ് നൽകുന്നത്. ജൂലൈ 5-ന് നടക്കുന്ന ക്വാർട്ടർ ഫൈനലിൽ ഐവറി കോസ്റ്റ് – നോർവേ മത്സരത്തിലെ വിജയികളെ ബ്രസീൽ നേരിടും.

The post സാംബ താളം ഹൂസ്റ്റണിൽ; ജപ്പാന്റെ പ്രതിരോധം തകർത്ത് ബ്രസീൽ ക്വാർട്ടറിലേക്ക്! appeared first on Starvision News Malayalam.

ബെൽഫാസ്റ്റ്: അയർലൻഡിനെതിരായ ടി20 പരമ്പരയിലെ ആദ്യ മത്സരത്തിൽ ലോക ചാമ്പ്യൻമാരായ ഇന്ത്യക്ക് ഞെട്ടിക്കുന്ന തോൽവി. 183 റൺസ് വിജയലക്ഷ്യം പിന്തുടർന്ന ഇന്ത്യ 18.5 ഓവറിൽ 148 റൺസിന് ഓൾ ഔട്ടായി. ഇതോടെ അയർലൻഡ് 34 റൺസിന്റെ ജയം നേടി പരമ്പരയിൽ മുന്നിലെത്തി.

ഇന്ത്യൻ നിരയിൽ അഭിഷേക് ശർമ്മ മാത്രമാണ് മികച്ച പ്രകടനം കാഴ്ചവെച്ചത്. 20 പന്തിൽ 50 റൺസെടുത്ത അഭിഷേക് ഇന്ത്യയുടെ ടോപ് സ്കോററായി. ശിവം ദുബെ 25 റൺസും തിലക് വർമ്മ 19 റൺസും അക്ഷർ പട്ടേൽ 15 റൺസും നേടി. എന്നാൽ സഞ്ജു സാംസൺ, ക്യാപ്റ്റനായി അരങ്ങേറിയ ശ്രേയസ് അയ്യർ, ഇഷാൻ കിഷൻ എന്നിവർ നിരാശപ്പെടുത്തി.

അയർലൻഡിനായി മാത്യു ഹോളാർഡും മാത്യു ഹംഫ്രീസും മൂന്ന് വിക്കറ്റ് വീതം വീഴ്ത്തി. ഇന്ത്യൻ വംശജനായ ജയ് മൂന്ദ്ര രണ്ട് വിക്കറ്റ് നേടി നിർണായക പ്രകടനം പുറത്തെടുത്തു. ടി20 ക്രിക്കറ്റിൽ അയർലൻഡിനെതിരെ ഇന്ത്യയുടെ ആദ്യ തോൽവിയെന്ന പ്രത്യേകതയും ഈ മത്സരത്തിനുണ്ട്.

183 റൺസ് ലക്ഷ്യത്തിലേക്ക് ഇറങ്ങിയ ഇന്ത്യക്ക് ആദ്യ ഓവറിൽ സഞ്ജു സാംസണും അഭിഷേക് ശർമ്മയും ചേർന്ന് 16 റൺസ് നേടി വേഗത്തിലുള്ള തുടക്കം നൽകി. എന്നാൽ രണ്ടാം ഓവറിലെ ആദ്യ പന്തിൽ സഞ്ജു സാംസൺ 5 റൺസിന് പുറത്തായതോടെ ഇന്ത്യക്ക് തിരിച്ചടി തുടങ്ങി. പിന്നാലെ ഇഷാൻ കിഷനും 1 റൺസിന് മടങ്ങി.

അഭിഷേക് ശർമ്മയുടെ ആക്രമണ ബാറ്റിങ്ങിൽ ഇന്ത്യ നാലാം ഓവറിൽ തന്നെ 57 റൺസിലെത്തിയെങ്കിലും, പവർ പ്ലേയുടെ അവസാനത്തിൽ ക്യാപ്റ്റൻ ശ്രേയസ് അയ്യരും പുറത്തായതോടെ ഇന്ത്യ സമ്മർദ്ദത്തിലായി. 15 പന്തിൽ 46 റൺസ് നേടിയ അഭിഷേക് പവർ പ്ലേയിൽ ഇന്ത്യയുടെ പ്രധാന പ്രതീക്ഷയായിരുന്നു.

എട്ടാം ഓവറിൽ അർധസെഞ്ചുറി തികച്ചതിന് പിന്നാലെ അഭിഷേക് ശർമ്മയും പുറത്തായി. 20 പന്തിൽ ഏഴ് ഫോറും രണ്ട് സിക്സും ഉൾപ്പെടെ 50 റൺസെടുത്ത അഭിഷേകിനെ ലിയാം മക്കാർത്തി മടക്കി. തുടർന്ന് തിലക് വർമ്മ ക്രീസിൽ നിലയുറപ്പിക്കാൻ ശ്രമിച്ചെങ്കിലും 21 പന്തിൽ 19 റൺസെടുത്ത് പുറത്തായി.

മധ്യനിരയിൽ വാഷിംഗ്ടൺ സുന്ദറിനും വലിയ സംഭാവന നൽകാനായില്ല. പിന്നീട് അക്ഷർ പട്ടേൽ–ശിവം ദുബെ സഖ്യം ഇന്ത്യയ്ക്ക് പ്രതീക്ഷ നൽകി. എന്നാൽ 16-ാം ഓവറിലെ അവസാന പന്തിൽ ശിവം ദുബെയെ ജയ് മൂന്ദ്ര തകർപ്പൻ റിട്ടേൺ ക്യാച്ചിലൂടെ മടക്കിയതോടെ മത്സരം അയർലൻഡിന്റെ നിയന്ത്രണത്തിലായി. പിന്നാലെ അക്ഷർ പട്ടേലും പുറത്തായതോടെ ഇന്ത്യയുടെ പ്രതീക്ഷകൾ അവസാനിച്ചു.

നേരത്തെ ടോസ് നഷ്ടപ്പെട്ട് ആദ്യം ബാറ്റ് ചെയ്ത അയർലൻഡിന് മികച്ച തുടക്കമല്ല ലഭിച്ചത്. പവർ പ്ലേയിൽ തന്നെ മൂന്ന് മുൻനിര വിക്കറ്റുകൾ നഷ്ടമായി അയർലൻഡ് 36ന് 3 എന്ന നിലയിലേക്ക് വീണു. എന്നാൽ ഡെലാനിയും ടെക്ടറും ചേർന്ന 64 റൺസ് കൂട്ടുകെട്ട് അയർലൻഡിനെ മത്സരത്തിലേക്ക് തിരികെ കൊണ്ടുവന്നു.

ടെക്ടർ പുറത്തായതിന് ശേഷം ഡെലാനിയും ഡോക്രെലും ചേർന്ന് നിർണായക കൂട്ടുകെട്ട് പടുത്തുയർത്തി. അവസാന ഓവറുകളിൽ തുടർച്ചയായി വിക്കറ്റുകൾ നഷ്ടമായെങ്കിലും അയർലൻഡ് 20 ഓവറിൽ 9 വിക്കറ്റ് നഷ്ടത്തിൽ 182 റൺസ് നേടി.

പരമ്പരയിലെ രണ്ടാമത്തെയും അവസാനത്തെയും മത്സരം ഞായറാഴ്ച നടക്കും.

സ്കോർ:
അയർലൻഡ്: 182/9, 20 ഓവർ
ഇന്ത്യ: 148 ഓൾ ഔട്ട്, 18.5 ഓവർ

The post ഐറിഷ് മണ്ണിൽ ഇന്ത്യക്ക് ഞെട്ടൽ; ആദ്യ ടി20യിൽ 34 റൺസിന് അയർലൻഡിന്റെ വിജയം appeared first on Starvision News Malayalam.