മനാമ: ബഹ്റൈനിൽ മധ്യാഹ്ന വിശ്രമ നിയമം ഇന്ന് മുതൽ പ്രാബല്യത്തിൽ വന്നു. കടുത്ത ചൂട് ആരംഭിച്ചതോടെ പ്രഖ്യാപ്പിച്ച മധ്യാഹ്ന വിശ്രമ നിയമം തുറസ്സായ സ്ഥലങ്ങളിലും സൂര്യാതപം നേരിട്ട് ഏൽക്കുന്ന സ്ഥലങ്ങളിൽ ജോലി ചെയ്യുന്നവർക്കാണ് ബാധകമാവുക. ഇത് പ്രകാരം സൂര്യാഘാതം നേരിട്ടേൽക്കുന്ന ജോലി ചെയ്യുന്നവർ ഈ രണ്ടു മാസക്കാലം, ഉച്ചക്ക് 12 മണി മുതൽ വൈകിട്ട് നാലുമണി വരെ ജോലിയിൽ നിന്ന് വിട്ടുനിൽക്കണം. ജൂലൈ ഒന്നു മുതൽ ആഗസ്റ്റ് 31 വരെയാണ് നിയന്ത്രണം നടപ്പിലാക്കുന്നതെന്ന് തൊഴിൽ മന്ത്രി ജമീൽ ബിൻമുഹമ്മദ് അലി ഹുമൈദാൻ അറിയിച്ചു.
ഈ നേരത്ത് തൊഴിലാളികളെക്കൊണ്ട് ജോലി ചെയ്യിക്കാൻ പാടില്ലെന്നതാണ് മന്ത്രാലയത്തിന്റെ ഉത്തരവ്. തൊഴിൽ നിരോധനം ഏർപ്പെടുത്തിയിട്ടുള്ള സമയങ്ങളിൽ ജോലി ചെയ്യുന്നതായി പരിശോധനകളിൽ കണ്ടെത്തിയാൽ ഒരു തൊഴിലാളിക്ക് 500 ദീനാർ മുതൽ 1,000 ദീനാർ വരെ പിഴ ചുമത്തും. കൂടാതെ തൊഴിൽ ദാതാവിന് മൂന്ന് മാസം വരെയുള്ള ജയിൽ ശിക്ഷയും നൽകും.
സൂര്യാഘാതം, സമ്മർദ്ദം, വിവിധ വേനൽക്കാല രോഗങ്ങൾ എന്നിവയിൽ നിന്ന് തൊഴിലാളികളെ സംരക്ഷിക്കുകയും സുരക്ഷ ഉറപ്പാക്കുകയും തൊഴിൽ അപകടങ്ങൾ കുറയ്ക്കുകയും ചെയ്യുക എന്നതാണ് ഇതുകൊണ്ടു ലക്ഷ്യമിടുന്നത്. 2013 മുതൽ നടപ്പിലാക്കി തുടങ്ങിയ നിയന്ത്രണത്തിന് ശേഷം സൂര്യാഘാതം മൂലമുള്ള അപകടങ്ങൾ ഏറെ കുറഞ്ഞതായി മന്ത്രാലയം അധികൃതർ വ്യക്തമാക്കി.
തൊഴിലാളികളുടെ സുരക്ഷയും ആരോഗ്യവും കാത്തുസൂക്ഷിക്കുന്നതിനും അവരുടെ ജോലിയുടെ പുരോഗതിയെ ബാധിക്കാത്ത വിധത്തിൽ തൊഴിൽ സമയം പുനഃക്രമീകരിക്കുന്നതുൾപ്പെടെയുള്ള എല്ലാ സംഘടനാ നടപടികളും കൈക്കൊള്ളാനും മന്ത്രി തൊഴിലുടമകളോട് ആവശ്യപ്പെട്ടു.