മനാമ: കോവിഡ് മഹാമാരി കാലത്ത് ബഹ്‌റൈനിൽ സ്ഥാപിതമായ ഐമാക് ബഹ്റൈൻ മീഡിയ സിറ്റിയുടെ വാർഷികവും അവാർഡ് ദാന ചടങ്ങും Online പ്ലാറ്റ്ഫോമിലൂടെ നടന്നു.
ബഹ്റൈൻ ഇലക്ട്രിസിറ്റി ആൻഡ് വാട്ടർ അഫയേഴ്സ് മുൻ മന്ത്രിയും നിലവിൽ Sustainable എനർജി അതോറിറ്റിയുടെ തലവനുമായ ഡോക്ടർ അബ്ദുൽ ഹുസൈൻ ബിൻ അലി മിർസ മുഖ്യാതിഥിയായി പങ്കെടുത്ത ചടങ്ങിൽ വച്ച് മീഡിയ സിറ്റിയുടെ ബിസിനസ് എക്സലൻസ് അവാർഡ് ബഹ്റൈനിലെ പ്രമുഖ വ്യവസായിയും ഈ വർഷത്തെ പ്രവാസി ഭാരതീയ സമ്മാൻ ജേതാവുമായ കെ. ജി. ബാബുരാജിന് സമ്മാനിച്ചു.
കൂടാതെ ഈ വർഷത്തെ ബിഎംസി സോഷ്യൽ സർവീസ് എക്സലൻസ് അവാർഡ് സൽമാനിയ ഹോസ്പിറ്റലിൽ പ്രവാസികൾക്ക് താങ്ങും തണലുമായി നിൽക്കുന്ന ബഹ്റൈൻ സ്വദേശിയായ സാമൂഹിക പ്രവർത്തക ഇമാൻ കാസിം മുഹമ്മദിന് സമ്മാനിച്ചു.
കേരളത്തിൻറെ സഹകരണ വകുപ്പ് മന്ത്രി എം. വി. ഗോവിന്ദൻ മാസ്റ്റർ ഉദ്ഘാടനം ചെയ്ത ചടങ്ങിൽ പ്രശസ്ത നോവലിസ്റ്റ് ജോർജ് ഓണക്കൂർ, കൊച്ചിൻ കലാഭവൻ ജനറൽസെക്രട്ടറി കെ. എസ്. പ്രസാദ്, അമിറ്റി യൂണിവേഴ്സിറ്റി അഡ്വൈസറി ബോർഡ് മെമ്പർ ഡോക്ടർ എ. മാധവൻ, മ്യൂസിക് ഡയറക്ടർ രാജു രാജൻ പിറവം എന്നിവരെ കൂടാതെ സുബൈർ കണ്ണൂർ, മുഹമ്മദ് മൻസൂർ, രാജി ഉണ്ണികൃഷ്ണൻ, ജയശങ്കർ വിശ്വനാഥൻ, ഷെർലി ആൻറണി തുടങ്ങിയവർ സംബന്ധിച്ചു. മീഡിയ സിറ്റി യുടെ ചെയർമാൻ ഫ്രാൻസിസ് കൈതാരത്ത് സ്വാഗതമാശംസിച്ച ചടങ്ങിൽ മീഡിയ ഹെഡ് പ്രവീൺ കൃഷ്ണ നന്ദി പറഞ്ഞു. ആറ് മണിക്കൂർ നീണ്ട പരിപാടിയിൽ മരീന ഫ്രാൻസിസ് അവതാരകയായി. തിരുവാതിര ഓട്ടംതുള്ളൽ ചാക്യാർകൂത്ത് ഗാനമേള തുടങ്ങിയ ധാരാളം കലാപരിപാടികളും അരങ്ങേറി.
