മനാമ: പ്രത്യാശയുടേയും ശാന്തിയുടേയും ദൂത് വിളംബരം ചെയ്ത് ബഹ്റൈൻ മാർത്തോമ്മാ ഇടവകയുടെ ഈ വർഷത്തെ ക്രിസ്തുമസ് കരോൾ സർവീസ് ‘ഹോപ് ഈസ് ബോൺ’ ഡിസംബർ 24ാം തീയതി വെള്ളിയാഴ്ച വൈകിട്ട് 5:30ന് സനദിലുള്ള മാർത്തോമ്മാ കോംപ്ലക്സിൽ വെച്ച് ഇടവക വികാരി റവ. ഡേവിഡ് വി. ടൈറ്റസിന്റെ അദ്ധ്യക്ഷതയിൽ നടത്തപ്പെട്ടു.
ക്രിസ്തുമസ് ആരാധനയോടെ ആരംഭിച്ച സമ്മേളനത്തിൽ വീഡിയോ സന്ദേശങ്ങളിലൂടെ മലങ്കര മാർത്തോമ്മാ സുറിയാനി സഭയുടെ പരമാദ്ധ്യക്ഷൻ അഭിവന്ദ്യ ഡോ. തിയഡോഷ്യസ് മാർത്തോമ്മാ മെത്രാപ്പോലീത്താ അനുഗ്രഹ പ്രഭാഷണം നടത്തുകയും കോട്ടയംകൊച്ചി ഭദ്രാസനാധിപൻ റൈറ്റ് റവ. ഡോ. ഏബ്രഹാം മാർ പൗലോസ് എപ്പിസ്ക്കോപ്പാ, സഭാ സെക്രട്ടറി റവ. സി. വി. സൈമൺ എന്നിവർ ക്രിസ്തുമസ് ദൂത് നല്കുകയും ചെയ്തു.
മുഖ്യാതിഥിയായിരുന്ന കേരളാ പോലീസ് മുൻ ഡി.ജി.പി. ഡോ. അലക്സാണ്ടർ ജേക്കബ് ഐ .പി.എസ് സൂം പ്ലാറ്റ്ഫോമിലൂടെ മീറ്റിംഗിൽ പങ്കെടുത്ത് ക്രിസ്തുമസ് സന്ദേശം നൽകി.
വിശിഷ്ടാതിഥിയായി സമ്മേളനത്തിൽ പങ്കെടുത്ത ഇന്ത്യൻ സ്ക്കൂൾ ചെയർമാൻ പ്രിൻസ് നടരാജൻ, ഇടവക സഹവികാരി റവ. വി. പി. ജോൺ എന്നിവർ ആശംസകൾ അർപ്പിച്ച് സംസാരിച്ചു.
ഇടവകയിലെ പോഷക സംഘടനാ പ്രതിനിധികൾ വേദവായനയ്ക്ക് നേതൃത്വം നല്കി. ഇടവക വൈസ് പ്രസിഡന്റ് കുരുവിള വർക്കി പ്രാരംഭ പ്രാർത്ഥനയും സെക്രട്ടറി സൺസി ചെറിയാൻ സ്വാഗതവും പ്രോഗ്രാം കൺവീനർ പ്രതീഷ് തോമസ് കൃതജ്ഞതയും ട്രസ്റ്റി ബിജു കുഞ്ഞച്ചൻ സമാപന പ്രാർത്ഥനയും നടത്തി.
ഇടവക ഗായക സംഘവും സൺഡേ സ്കൂൾ ഗായക സംഘവും ആലപിച്ച കരോൾ ഗാനങ്ങളും ആൻസി എബിന്റെ അവതരണവും പരിപാടിയെ മനോഹരമാക്കി.
