മനാമ: ഭൂകമ്പത്തിൽ നാശം വിതച്ച തുർക്കിക്കും സിറിയയ്ക്കും പിന്തുണയുമായി ബഹ്‌റൈൻ സംഭാവന കാമ്പയിൻ ആരംഭിച്ചു. രാജാവ് ഹമദ് ബിൻ ഈസ അൽ ഖലീഫയുടെ നിർദേശത്തെ തുടർന്നാണ് സംഭാവനകൾ നൽകുന്നതെന്ന് മാനുഷിക പ്രവർത്തനത്തിനും യുവജനകാര്യത്തിനുമുള്ള രാജാവിന്റെ പ്രതിനിധിയും റോയൽ ഹ്യൂമാനിറ്റേറിയൻ ഫൗണ്ടേഷൻ (ആർഎച്ച്എഫ്) ബോർഡ് ഓഫ് ട്രസ്റ്റീസ് ചെയർമാനുമായ ഷെയ്ഖ് നാസർ ബിൻ ഹമദ് അൽ ഖലീഫ പറഞ്ഞു. ആയിരക്കണക്കിന് ആളുകൾ മരിക്കുകയും വൻ നാശം വിതയ്ക്കുകയും ചെയ്ത വിനാശകരമായ ഭൂകമ്പത്തെത്തുടർന്ന് തുർക്കിക്കും സിറിയയ്ക്കും അടിയന്തര മാനുഷിക ദുരിതാശ്വാസ സഹായം നൽകാൻ രാജാവ് നിർദ്ദേശം നൽകിയിരുന്നു. കാമ്പെയ്‌നിന്റെ മേൽനോട്ടം വഹിക്കുന്നതിന് റോയൽ ഹ്യൂമാനിറ്റേറിയൻ ഫൗണ്ടേഷൻ സെക്രട്ടറി ജനറൽ ഡോ. മുസ്തഫ അൽ സയ്യിദിനെ എക്‌സിക്യൂട്ടീവ് ചീഫ് ആയി നിയമിച്ചു. ഭൂകമ്പത്തിൽ നാശനഷ്ടം സംഭവിച്ച ആളുകൾക്ക് പിന്തുണ നൽകാൻ അദ്ദേഹം സ്വകാര്യ മേഖലാ കമ്പനികളോടും ആളുകളോടും അഭ്യർത്ഥിച്ചു.
