മനാമ: ബഹ്‌റൈനിൽ ജനുവരി 2 ന് നടത്തിയ 20,511 കോവിഡ് ടെസ്റ്റുകളിൽ 667 പുതിയ കേസുകൾ സ്‌ഥിരീകരിച്ചു. ഇവരിൽ 190 പേർ പ്രവാസി തൊഴിലാളികളാണ്. 380 പുതിയ കേസുകൾ സമ്പർക്കം മൂലവും 97 എണ്ണം യാത്രയുമായി ബന്ധപ്പെട്ടുമാണ് രോഗബാധിതരായത്. 3.25% ആണ് ടെസ്റ്റ് പോസിറ്റിവിറ്റി നിരക്ക്.
കോവിഡ്-19ൽ നിന്ന് 179 പേർ പുതുതായി രോഗമുക്തരായി. ഇതോടെ രാജ്യത്ത് ഇതുവരെ ആകെ രോഗം ഭേദമായവർ 2,77,680 ആയി വർദ്ധിച്ചു. ഇന്ന് ഒരു മരണം കൂടി റിപ്പോർട്ട് ചെയ്തതോടെ രാജ്യത്തെ ആകെ മരണം 1,395 ആയി.
നിലവിൽ രാജ്യത്തിന്റെ വിവിധ ഭാഗങ്ങളിൽ ചികിത്സയിൽ കഴിയുന്നവർ 4,269 പേരാണ്. ഇതിൽ ആരുടെയും നില ഗുരുതരമല്ല. എല്ലാവരുടെയും നില തൃപ്തികരമാണ്.
ബഹ്‌റൈനിൽ ഇതുവരെ 80,69,956 പേരാണ് പരിശോധനയ്ക്ക് വിധേയരായിട്ടുള്ളത്. ഇതുവരെയുള്ള കണക്ക് പ്രകാരം 12,03,782 പേർ ഓരോ ഡോസും 11,78,914 പേർ രണ്ട് ഡോസും 8,51,737 പേർ ബൂസ്റ്റർ ഡോസും വാക്സിൻ സ്വീകരിച്ചിട്ടുണ്ട്.
