മനാമ: ഉഭയകക്ഷി ചർച്ചകൾക്കുള്ള സംവിധാനങ്ങളും നടപടിക്രമങ്ങളും സജ്ജമാക്കാൻ ബഹ്‌റൈനും ഖത്തറും കൂടിക്കാഴ്ച നടത്തി. ബഹ്‌റൈനിൽ നിന്നും ഖത്തറിൽ നിന്നുമുള്ള രണ്ട് പ്രതിനിധികൾ തമ്മിൽ ഗൾഫ് അറബ് രാജ്യങ്ങൾക്കായുള്ള സഹകരണ കൗൺസിലിന്റെ ജനറൽ സെക്രട്ടേറിയറ്റ് ആസ്ഥാനത്താണ് കൂടിക്കാഴ്ച നടത്തിയത്. വിദേശകാര്യ മന്ത്രി ഡോ. അബ്ദുല്ലത്തീഫ് ബിൻ റാഷിദ് അൽ സയാനിയുടെ നേതൃത്വത്തിലാണ് ബഹ്‌റൈൻ പ്രതിനിധി സംഘം എത്തിയത്. ഉപപ്രധാനമന്ത്രിയും വിദേശകാര്യ മന്ത്രിയുമായ ശൈഖ് മുഹമ്മദ് ബിൻ അബ്ദുൾറഹ്മാൻ അൽതാനിയുടെ നേതൃത്വത്തിലാണ് ഖത്തർ പ്രതിനിധി സംഘം എത്തിയത്. സൗദി അറേബ്യയിൽ നടന്ന അൽ-ഉല ഉച്ചകോടിയിൽ പുറപ്പെടുവിച്ച അൽ-ഉല പ്രഖ്യാപനത്തിന് അനുസൃതമായി, ഉഭയകക്ഷി സമിതികളുടെ തലത്തിൽ ചർച്ചകൾ ആരംഭിക്കുന്നതിന് ആവശ്യമായ സംവിധാനങ്ങളും നടപടിക്രമങ്ങളും സജ്ജമാക്കുന്നത് യോഗം പരിശോധിച്ചു. ഇരു രാജ്യങ്ങളും തമ്മിലുള്ള അടുത്ത സഹകരണത്തിന്റെ പ്രാധാന്യവും ഇരുപക്ഷവും ആവർത്തിച്ച് ഉറപ്പിച്ചു.
