മനാമ: ഇന്ത്യൻ എംബസ്സിയുടെ കീഴിൽ പ്രവർത്തിക്കുന്ന ഇന്ത്യൻ കമ്മ്യൂണിറ്റി റിലീഫ് ഫണ്ട് (“ICRF”), 2022 ഡിസംബറിൽ ‘ഫേബർ കാസ്റ്റൽ സ്പെക്ട്ര 2022’ എന്ന പേരിൽ ഈ വർഷത്തെ ആർട്ട് കാർണിവൽ സംഘടിപ്പിക്കുന്നു. യുവാക്കൾക്കിടയിൽ കലാപരമായ കഴിവുകൾ പ്രോത്സാഹിപ്പിക്കുന്നതിനും ആദരിക്കുന്നതിനും ലക്ഷ്യമിട്ടുള്ള ആർട്ട് കാർണിവൽ ബഹ്‌റൈനിലെ സ്കൂൾ വിദ്യാർത്ഥികൾക്കുള്ള ഏറ്റവും വലിയ കലാമത്സരമാണ്. ‘സ്പെക്ട്ര 2022’ കാർണിവൽ ഡിസംബർ 9 വെള്ളിയാഴ്ച ഇന്ത്യൻ സ്കൂൾ – ഇസ ടൗൺ പരിസരത്ത് നടക്കും. ബഹ്‌റൈനിലെ വാർഷിക ആർട്ട് കാർണിവലായ സ്പെക്ട്രയുടെ 14-ാം വർഷമാണിത്.
കോവിഡ് പകർച്ചവ്യാധി കാരണം കഴിഞ്ഞ 2 വർഷമായി ഓൺലൈൻ പ്ലാറ്റ്‌ഫോമിൽ നടത്തിയ ശേഷം, പഴയ സന്തോഷകരമായ നിമിഷങ്ങൾ തിരികെ കൊണ്ടുവരുന്നതിൽ എല്ലാവരും ആവേശത്തിലാണ്. രാജ്യത്തെ വിവിധ സ്കൂളുകളിൽ നിന്നുള്ള കുട്ടികൾ അതത് സ്കൂളുകളിൽ സംഘടിപ്പിക്കുന്ന പ്രാഥമിക റൗണ്ടിൽ തിരഞ്ഞെടുക്കപ്പെട്ട ശേഷമാണ് മത്സരത്തിൽ പങ്കെടുക്കുന്നത്. ഈ വാർഷിക പരിപാടി യുവ കലാപ്രതിഭകളെ കണ്ടെത്തുന്നതിനും സാമൂഹിക മാറ്റത്തിന് ഉത്തേജനം നൽകുന്ന ഒരു ഭാവി തലമുറയെ സൃഷ്ടിക്കുന്നതിനും ലക്ഷ്യമിടുന്നു.
തയ്യാറെടുപ്പിന്റെ ഭാഗമായി, ഇന്ത്യൻ എംബസിയിലെ സെക്കൻഡ് സെക്രട്ടറി രവിശങ്കർ ശുക്ലയുടെ സാന്നിധ്യത്തിൽ, ഐസിആർഎഫ് സ്പെക്ട്ര ടീം എംബസി കോൺസുലർ ഹാളിൽ സ്കൂൾ കോർഡിനേറ്റർമാരുമായി ഒരു മീറ്റിംഗ് നടത്തി. ഏകദേശം 25 സ്കൂളുകളിൽ നിന്നായി ഏകദേശം 40 കോ-ഓർഡിനേറ്റർമാർ ആദ്യ മീറ്റിംഗിൽ ചേർന്നു. ഈ വർഷത്തെ സ്പെക്ട്ര ഇവന്റ് നേരിൽ സംഘടിപ്പിക്കാൻ എല്ലാവരും തികഞ്ഞ ആവേശത്തിലാണ്.
പതിവുപോലെ പങ്കെടുക്കുന്നവരെ നാല് പ്രായ ഗ്രൂപ്പുകളായി തിരിച്ചിരിക്കുന്നു – അഞ്ച് മുതൽ എട്ട് വയസ്സ് വരെ, എട്ട് മുതൽ പതിനൊന്ന് വയസ്സ് വരെ, പതിനൊന്ന് മുതൽ പതിനാല് വയസ്സ് വരെ, പതിനാല് മുതൽ പതിനെട്ട് വയസ്സ് വരെ. സ്കൂളുകൾ/സ്ഥാപനങ്ങൾ വഴി മാത്രമേ പങ്കാളിത്തം അനുവദിക്കൂ. ബഹ്‌റൈനിൽ പങ്കെടുക്കുന്ന എല്ലാവർക്കും ഡ്രോയിംഗ് പേപ്പറും മെറ്റീരിയലുകളും സൗജന്യമായി നൽകും.
ഓരോ വിഭാഗത്തിലെയും ആദ്യ മൂന്ന് വിജയികൾക്ക് വ്യക്തിഗത ട്രോഫികളും സർട്ടിഫിക്കറ്റുകളും ലഭിക്കും. കൂടാതെ എല്ലാ പങ്കാളികൾക്കും പങ്കാളിത്ത സർട്ടിഫിക്കറ്റ് ലഭിക്കും. 2023-ലേക്ക് രൂപകൽപ്പന ചെയ്‌ത വാൾ കലണ്ടറുകളിലും ഡെസ്‌ക്-ടോപ്പ് കലണ്ടറുകളിലും കുട്ടികളുടെ വിജയിക്കുന്ന എൻട്രികളും മറ്റ് മികച്ച സൃഷ്ടികളും ഉൾപ്പെടും. ഈ കലണ്ടറുകൾ 2022 ഡിസംബർ 30-ന് നടക്കുന്ന ചടങ്ങിൽ ലോഞ്ച് ചെയ്യും. ഇവയിൽ നല്ലൊരു പങ്ക് എല്ലാ സ്പോൺസർമാർക്കും കോർപ്പറേറ്റുകൾക്കും ബാങ്കുകൾക്കും ഇൻഷുറൻസ് കമ്പനികൾക്കും വിദ്യാഭ്യാസ സ്ഥാപനങ്ങൾക്കും ക്ലബ്ബുകൾക്കും അസോസിയേഷനുകൾക്കും ബിസിനസുകൾക്കും ലഭ്യമാക്കും.
ദേശീയ തലത്തിലുള്ള ഓൺലൈൻ മത്സരത്തിന് പുറമേ, രണ്ടാമത്തെ ഇന്റർനാഷണൽ ഓൺലൈൻ കോംപറ്റീഷൻ സ്പെക്ട്ര 2022-ഉം നടത്തുന്നു. രണ്ട് മത്സരങ്ങളും വെവ്വേറെ നടത്തുകയും രണ്ട് സെറ്റ് വിജയികളെ പ്രഖ്യാപിക്കുകയും ചെയ്യും. അന്താരാഷ്ട്ര സ്പെക്ട്ര മത്സരം 2022 ഡിസംബർ 11 ഞായറാഴ്ച വെർച്വൽ പ്ലാറ്റ്‌ഫോമിൽ നടക്കും.
സ്പെക്ട്ര 2022 ഇന്റർനാഷണലിൽ പങ്കെടുക്കാനും മികച്ച സമ്മാനങ്ങളും സർട്ടിഫിക്കറ്റുകളും നേടാനും ലോകമെമ്പാടുമുള്ള സ്കൂളുകളിൽ നിന്നുള്ള പങ്കാളികളെ ക്ഷണിക്കുന്നു. കഴിഞ്ഞ വർഷം 17 രാജ്യങ്ങളിലായി വ്യാപിച്ചുകിടക്കുന്ന 80 സ്കൂളുകളിൽ നിന്നുള്ള 550-ലധികം കുട്ടികൾ ഓൺലൈനിൽ നടത്തിയ കലാമത്സരത്തിൽ പങ്കെടുത്തു.
മത്സരത്തിൽ നിന്നുള്ള മൊത്തം വരുമാനം, പ്രതിമാസം 100 ബഹ്‌റൈനി ദിനാറിൽ താഴെ വേതനം ലഭിക്കുന്ന, ബഹറിനിൽ മരണമടഞ്ഞ ഇന്ത്യൻ തൊഴിലാളികളുടെ കുടുംബങ്ങളെ സഹായിക്കുന്നതിനുള്ള ഒരു കുടുംബക്ഷേമ നിധിയിലേക്ക് പോകുന്നു. പദ്ധതി പ്രകാരം, മരിച്ച ഇന്ത്യക്കാരന്റെ ആശ്രിതർക്ക് കുടുംബക്ഷേമ നിധി ₹1,00,000 (ഒരു ലക്ഷം രൂപ) ധനസഹായം നൽകും. നിർഭാഗ്യവശാൽ ഒരേയൊരു തണൽ നഷ്ടപ്പെട്ട നിരവധി കുടുംബങ്ങൾക്ക് ഈ പദ്ധതി വലിയ ആശ്വാസമാണ് നൽകുന്നത് . പദ്ധതി ആരംഭിച്ചത് മുതൽ നൂറുകണക്കിന് കുടുംബങ്ങളെ ഐ സി ആർ എഫ് പിന്തുണച്ചിട്ടുണ്ട്.
സ്പെക്ട്ര 2022-നെ കുറിച്ചുള്ള കൂടുതൽ വിവരങ്ങൾക്ക് സ്പെക്ട്ര കൺവീനർ അനീഷ് ശ്രീധരനെ 39401394 എന്ന നമ്പറിലോ ജോയിന്റ് കൺവീനർ നിഥിനെ 39612819 എന്ന നമ്പരിലോ ജോയിന്റ് കൺവീനർ മുരളീകൃഷ്ണനെ 34117864 എന്ന നമ്പരിലോ – icrfbahrain@gmail.com എന്ന ഇമെയിൽ വിലാസത്തിലോ ബന്ധപ്പെടുക.
ബഹ്‌റൈനിലെ ഇന്ത്യൻ തൊഴിലാളികളുടെ പൊതു ക്ഷേമത്തിനായി ബഹ്‌റൈനിലെ ഇന്ത്യൻ അംബാസഡറുടെ രക്ഷാകർതൃത്വത്തിൽ 1999-ൽ സ്ഥാപിതമായ ഒരു സർക്കാരിതര, ലാഭേച്ഛയില്ലാത്ത സംഘടനയാണ് ഐസിആർഎഫ്. ബഹ്‌റൈനിലെ ഇന്ത്യൻ സമൂഹത്തിലെ സാമ്പത്തികമായി ദുർബലരായ വിഭാഗത്തിന് കൈത്താങ്ങ് നൽകുക എന്നതാണ് ഞങ്ങളുടെ ദൗത്യം. ഇതിൽ നിയമസഹായം, അടിയന്തര സഹായം, കമ്മ്യൂണിറ്റി വെൽഫെയർ സേവനങ്ങൾ, മെഡിക്കൽ സഹായം, കൗൺസിലിംഗ് തുടങ്ങിയവ ഉൾപ്പെടുന്നു. ICRF അതിന്റെ തുടക്കം മുതൽ പതിനായിരക്കണക്കിന് പേർക്ക് സഹായങ്ങൾ നൽകിയിട്ടുണ്ട്. കൂടാതെ തുടർന്നും നൽകി പോരുന്നു.
