അടൂര്: കെ.പി.റോഡില് ഏഴംകുളം പട്ടാഴിമുക്കില് ബൈക്കും സ്കൂട്ടറും കൂട്ടിയിടിച്ച് ഏഴംകുളം നെടുമണ് കക്കുഴി പുരയിടത്തില് നസീര് അബ്ദുല് ഖാദര് (52) മരിച്ച സംഭവത്തില് വഴിത്തിരിവ്. അബ്ദുള്ഖാദറിന്റെ സ്കൂട്ടറില് ഇടിച്ച ബൈക്ക് മോഷ്ടിച്ചതാണെന്ന് പോലീസ് കണ്ടെത്തി. പരിക്കേറ്റ, ബൈക്ക് യാത്രികരായ പുനലൂര് കരവാളൂര് കലയനാട് പന്നിക്കോണം ചരുവിള പുത്തന്വീട്ടില് പി. മുകേഷ് (32), പത്തനാപുരം പുന്നല ചാച്ചിപുന്ന ഇഞ്ചൂര് തെക്കേക്കര, ലക്ഷംവീട് കോളനിയില് ശ്രീജിത്ത് (20) എന്നിവരെ അറസ്റ്റുചെയ്തു. ഇവര് ചികിത്സയില് കഴിയുന്ന അടൂര് ഏഴംകുളം മൗണ്ട് സിയോണ് മെഡിക്കല് കോളേജ് ആശുപത്രിയിലെത്തിയാണ് പോലീസ് അറസ്റ്റ് രേഖപ്പെടുത്തിയത്. ശ്രീജിത്തിന്റെ സഹോദരിയുടെ ഭര്ത്താവാണ് മുകേഷ്. ഇയാള് പോക്സോകേസിലും 20 മോഷണക്കേസുകളിലും പ്രതിയാണ്. വ്യാഴാഴ്ച കടമ്പനാട് ലക്ഷ്മി നിവാസില് അര്ജ്ജുന്റെ ഗഘ 04 ഡ 5256 നമ്പരിലുള്ള ബൈക്കാണ് മോഷ്ടിച്ചത്. ബൈക്കുമായി പത്തനാപുരം ഭാഗത്തേക്ക് പോകുംവഴി വ്യാഴാഴ്ച വൈകീട്ട് 6.10-നാണ് പട്ടാഴിമുക്കില്വെച്ച് അബ്ദുല്ഖാദറിന്റെ സ്കൂട്ടറില് ഇടിച്ചത്.
അടൂര് ഫെഡറല്ബാങ്കിന് സമീപം പി.എസ്.സി. പരീക്ഷയ്ക്കുള്ള പരിശീലനക്ലാസിന് എത്തിയതായിരുന്നു ബൈക്ക് ഉടമയായ അര്ജ്ജുന്. ബൈക്ക് പാര്ക്ക് ചെയ്തശേഷം ക്ലാസില് കയറി. രാത്രി ഏഴിന് ക്ലാസ് കഴിഞ്ഞ് ഇറങ്ങുമ്പോള് ബൈക്ക് കണ്ടില്ല. സമീപമുള്ള വ്യാപാരസ്ഥാപനത്തിലെ സി.സി.ടി.വി. ദൃശ്യം പരിശോധിച്ചപ്പോള് 6.57-ന് രണ്ട് യുവാക്കള് ബൈക്കുമായി പോകുന്നത് കണ്ടു. അര്ജ്ജുന് വിവരം അടൂര് പോലീസില് അറിയിച്ചു. ബൈക്ക് മോഷണംപോയ വിവരം സാമൂഹികമാധ്യമങ്ങളിലൂടെയും പ്രചരിപ്പിച്ചു. തുടര്ന്നാണ്, മോഷ്ടിച്ച ബൈക്കാണ് അപകടത്തിനിടയാക്കിയതെന്ന് പോലീസ് കണ്ടെത്തിയത്. ഒന്നാംപ്രതി മുകേഷിന് ഗുരുതരമായ പരിക്കുള്ളതിനാല്, മജിസ്ട്രേറ്റ് ആശുപത്രിയിലെത്തി തുടര്നടപടികള് സ്വീകരിച്ചു. അടൂര് എസ്.എച്ച്.ഒ. ശ്രീകുമാറിന്റെ നേതൃത്വത്തിലാണ് കേസ് അന്വേഷണം. അപകടത്തില് മരിച്ച നസീറിന്റെ മൃതദേഹം വെള്ളിയാഴ്ച ഖബറടക്കി.