മൂന്നുവയസ്സുകാരനെ നായക്കൂട്ടം ആക്രമിച്ചു

കണ്ണൂർ : മൂന്നുവയസ്സുകാരന് തെരുവുനായ്ക്കളുടെ ആക്രമണത്തിൽ ദേഹമാസകലം കടിയേറ്റു. പാനൂർ നഗരസഭയിലെ ഏഴാം വാർഡായ പാലത്തായിലാണ് സംഭവം.

നൊച്ചിക്കാട്ട് വാടകവീട്ടിൽ താമസിക്കുന്ന കൊൽക്കത്ത സ്വദേശികളായ താഹിറിന്റെയും ഹലീമയുടെയും മകൻ താലിബിനെയാണ് നായ്ക്കൾ കൂട്ടത്തോടെ അക്രമിച്ചത്‌. കുട്ടിയെ തലശ്ശേരിയിലെ ആസ്പത്രിയിൽ പ്രവേശിപ്പിച്ചു. അടുത്ത വീട്ടിൽ ജോലിക്ക് പോയ പിതാവിനെ അന്വേഷിച്ചിറങ്ങിയ കുട്ടിയെ മറ്റൊരു വീട്ടുപറമ്പിൽവെച്ചാണ് തെരുവുനായകൾ അക്രമിച്ചത്.