മനാമ: സുപ്രീം കൗണ്‍സില്‍ ഫോര്‍ വിമന്‍ (എസ്.സി.ഡബ്ല്യു) പ്രസിഡന്റും ഹമദ് രാജാവിന്റെ പത്‌നിയുമായ സബീക ബിന്‍ത് ഇബ്രാഹിം അല്‍ ഖലീഫ രാജകുമാരി പുറപ്പെടുവിച്ച തീരുമാനം 2025 (6) അനുസരിച്ച് വുമണ്‍ ഇന്‍ മീഡിയ കമ്മിറ്റി രൂപീകരിച്ചുകൊണ്ട് എസ്.സി.ഡബ്ല്യു. സെക്രട്ടറി ജനറല്‍ ലുല്‍വ അല്‍ അവാധി തീരുമാനം 2025 (24) പുറപ്പെടുവിച്ചു. ബഹ്റൈന്‍ സ്ത്രീകളുടെ വിജയങ്ങളും പരിശ്രമങ്ങളും ഉയര്‍ത്തിക്കാട്ടുകയും രാജ്യത്തിനകത്തും പുറത്തുമുള്ള മാധ്യമങ്ങളില്‍ അവരുടെ ദൃശ്യപരത വര്‍ദ്ധിപ്പിക്കുകയും ചെയ്യുക എന്നതാണ് കമ്മിറ്റിയുടെ ലക്ഷ്യം.
ഹിഷാം അബു അല്‍ഫത്തേയുടെ അധ്യക്ഷതയില്‍ രൂപീകരിക്കുന്ന കമ്മിറ്റിയില്‍ ബഹ്റൈന്‍ ടി.വി, ബഹ്റൈന്‍ റേഡിയോ, നാഷണല്‍ കമ്മ്യൂണിക്കേഷന്‍ സെന്റര്‍ (എന്‍.സി.സി), ബഹ്റൈന്‍ ജേണലിസ്റ്റ് അസോസിയേഷന്‍ (ബി.ജെ.എ), ബഹ്റൈന്‍ പബ്ലിക് റിലേഷന്‍സ് സൊസൈറ്റി, സോഷ്യല്‍ മീഡിയ ഇന്‍ഫ്‌ളുവന്‍സറായ യു.ഒ.ബി. കോളേജ് ഓഫ് മീഡിയ, എസ്.സി.ഡബ്ല്യു. ജനറല്‍ സെക്രട്ടേറിയറ്റ് എന്നീ സ്ഥാപനങ്ങളില്‍നിന്നുള്ള പ്രതിനിധികള്‍ ഉള്‍പ്പെടും.
കമ്മിറ്റിയിലെ അംഗത്വം രണ്ട് വര്‍ഷത്തേക്കായിരിക്കും, ചെയര്‍മാന്റെ അഭ്യര്‍ത്ഥനപ്രകാരം കമ്മിറ്റി ഇടയ്ക്കിടെ യോഗങ്ങള്‍ നടത്തേണ്ടതാണ്.
