കണ്ണൂര് തലശേരി മലബാര് കാന്സര് സെന്ററിനെ പോസ്റ്റ് ഗ്രാജ്വേറ്റ് ഇൻസ്റ്റിറ്റ്യൂട്ട് ഓഫ് ഓങ്കോളജി സയന്സ് & റിസര്ച്ച് ആയി വികസിപ്പിക്കാനുള്ള വിവിധ പദ്ധതികളുടെ ഉദ്ഘാടനം സെപ്റ്റംബര് 14-ാം തീയതി രാവിലെ 11.30ന് വീഡിയോ കോണ്ഫറന്സിലൂടെ മുഖ്യമന്ത്രി പിണറായി വിജയന് നിര്വഹിക്കുന്നു. ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് അധ്യക്ഷത വഹിക്കും. എ.എന്. ഷംസീര് എം.എല്.എ., കെ. മുരളീധരന് എം.പി. എന്നിവര് മുഖ്യാതിഥികളായിരിക്കും.
11.39 കോടി രൂപയുടെ പീഡിയാട്രിക് ഹെമറ്റോളജി & ഓങ്കോളജി ബ്ലോക്ക്, 9 കോടിയുടെ ന്യൂക്ലിയര് മെഡിസിന് & റേഡിയോളജി എക്സ്റ്റന്ഷന് ബ്ലോക്ക്, 9.5 കോടിയുടെ ക്ലിനിക്കല് ലാബ് സര്വീസസ് & ട്രാന്സ്ലേഷണല് റിസര്ച്ച് ബ്ലോക്ക് , 9.5കോടിയുടെ ഇന്റര്വെന്ഷനല് റേഡിയോളോജി വിഭാഗം, 95 ലക്ഷത്തിന്റെ കാന്റീന് വിപുലീകരണം, 6 കോടിയുടെ 64 സ്ലൈസ് ഫ്ളൂറോ സിടി സ്കാന്, 4 കോടിയുടെ സ്പെക്റ്റ് സി.ടി. സ്കാനര് തുടങ്ങിയ പൂര്ത്തീകരിച്ച പദ്ധതികളുടെ ഉദ്ഘാടനമാണ് നടക്കുന്നത്. 81.69 കോടിയുടെ റേഡിയോതെറാപ്പി ബ്ലോക്കിന്റെ വിപുലീകരണം, ഒ.പി ബ്ലോക്ക് നവീകരണം, 32 കോടിയുടെ സ്റ്റുഡന്സ് ഹോസ്റ്റല് എന്നീ പുതിയ പദ്ധതികളുടെ ശിലാസ്ഥാപനവും ഇതോടൊപ്പം നടക്കും.
ആര്.സി.സി.യെ മാത്രം ആശ്രയിച്ചിരുന്ന മലബാര് മേഖലയിലെ കാന്സര് രോഗികള്ക്ക് ഏറെ ആശ്വാസം പകരുന്ന കേന്ദ്രമായി മലബാര് കാന്സര് സെന്ററിനെ മാറ്റാന് കഴിഞ്ഞതായി മന്ത്രി കെ.കെ. ശൈലജ ടീച്ചര് പറഞ്ഞു. 2008ല് 1040 ഓളം പുതിയ രോഗികള് എം. സി.സിയെ ആശ്രയിച്ചിരുന്നുവെങ്കില് 2019ല് പുതിയ രോഗികളുടെ എണ്ണം 6500 ഓളമായി. തുടര്ചികിത്സക്കായി എത്തിയവരുടെ എണ്ണം 77477 ആയി വര്ദ്ധിക്കുകയും, 4600 പേരെ കിടത്തി ചികിത്സിക്കും വിധേയമായിട്ടുണ്ട്. കോവിഡ് കാലമായിട്ടു പോലും 2020ല് പ്രതിമാസം 6000ത്തിലധികം രോഗികള് ഇവിടെ എത്തുന്നുണ്ട്. കുട്ടികളിലെ മജ്ജ മാറ്റിവെക്കല് ശസ്ത്രക്രിയ സര്ക്കാര് മേഖലയില് ചെയ്യുന്ന ഏക സ്ഥാപനമാണ് മലബാര് കാന്സര് സെന്ററെന്നും മന്ത്രി വ്യക്തമാക്കി.