തിരുവനന്തപുരം: കൊറോണ വ്യാപനത്തിന്റെ പശ്ചാത്തലത്തില് സംസ്ഥാനത്ത് ഓണത്തിരക്ക് നിയന്ത്രിക്കുന്നതിന് കര്ശനനടപടികള് സ്വീകരിക്കാന് നിര്ദ്ദേശം നല്കിയതായി സംസ്ഥാന പോലീസ് മേധാവി ലോക് നാഥ് ബെഹ്റ. എല്ലാവിധ സുരക്ഷാമാനദണ്ഡങ്ങളും പാലിച്ച് കടകള് രാവിലെ ഏഴു മുതല് വൈകിട്ട് ഒന്പത് വരെ തുറക്കാവുന്നതാണ്. കടയുടെ വലിപ്പം അനുസരിച്ചുവേണം ഉപഭോക്താക്കളെ ഉള്ളില് പ്രവേശിപ്പിക്കേണ്ടത്. കടകളില് എല്ലാത്തരം സാമൂഹിക സുരക്ഷാ മാനദണ്ഡങ്ങളും പാലിക്കണം. പോലീസ് ഇക്കാര്യം ഉറപ്പാക്കും. മാളുകള്, ഹൈപ്പര് മാര്ക്കറ്റുകള് എന്നിവ തുറക്കുന്നതിന് അനുമതി ഉണ്ടെങ്കിലും അവര് ഹോം ഡെലിവറി സംവിധാനം പ്രോത്സാഹിപ്പിക്കുന്നതാണ് ഉചിതമെന്ന് ഡിജിപി അറിയിച്ചു.
പൊതുസ്ഥലങ്ങളില് ഓണാഘോഷം അനുവദിക്കുന്നതല്ല. ഓണസദ്യയുടേയും മറ്റും പേരില് കൂട്ടം കൂടാനോ പൊതുപരിപാടികള് നടത്താനോ അനുവദിക്കില്ല. പായസം, മത്സ്യം എന്നിവ വില്ക്കുന്ന സ്ഥാപനങ്ങള് ആരോഗ്യ സുരക്ഷാ പ്രോട്ടോക്കോള് നിര്ബന്ധമായും പാലിക്കണം. അത്യാവശ്യമില്ലാത്ത യാത്രകള് ഓണക്കാലത്ത് ഒഴിവാക്കണം. കണ്ടെയ്ന്മെന്റ് മേഖലയിലെ നിയന്ത്രണങ്ങള് തുടരുമെന്നും സംസ്ഥാന പോലീസ് മേധാവി അറിയിച്ചു.