മനാമ: ബഹ്റൈൻ ഒളിമ്പിക് കമ്മിറ്റി (ബിഒസി) സംഘടിപ്പിക്കുന്ന മൂന്നാമത് ബഹ്റൈൻ ബേബി ഗെയിംസ് ജൂൺ 1 മുതൽ 4 വരെ ഇസ ടൗൺ സ്‌പോർട്‌സ് സിറ്റിയിലെ ഈസ ബിൻ റാഷിദ് ഹാളിൽ നടത്താനുള്ള ഒരുക്കങ്ങൾ പുരോഗമിക്കുന്നു. സുപ്രീം കൗൺസിൽ ഫോർ യൂത്ത് ആൻഡ് സ്‌പോർട്‌സിന്റെ (SCYS) ആദ്യ ഡെപ്യൂട്ടി ചെയർമാനും ജനറൽ സ്‌പോർട്‌സ് അതോറിറ്റി ചെയർമാനുമായ ഷെയ്ഖ് ഖാലിദ് ബിൻ ഹമദ് അൽ ഖലീഫ മിനി ഒളിമ്പ്യാഡിന്റെ രക്ഷാകർതൃത്വം വഹിക്കും. മൂന്നിനും അഞ്ചിനും ഇടയിൽ പ്രായമുള്ള 600 ലധികം കുട്ടികൾ പങ്കെടുക്കും.
ബേബി ഗെയിംസിൽ ക്രാളിംഗ്, വോക്കറുകളുമായുള്ള ഓട്ടം, ഫുട്‌ബോൾ ഫ്രീ കിക്ക് മത്സരങ്ങൾ, ബാസ്‌ക്കറ്റ് ബോൾ ഫ്രീ ത്രോയിലൂടെ ബാസ്‌ക്കറ്റിലേക്ക്, സ്‌പ്രിന്റ് റണ്ണോടുകൂടിയ അത്‌ലറ്റിക്‌സ്, ഹർഡിൽസ് ആൻഡ് കിഡ്‌സ് റിലേ, ഫ്രീ സ്‌റ്റൈൽ സ്വിമ്മിംഗ്, ജിംനാസ്റ്റിക്‌സ്, സാങ്കേതികതയ്ക്ക് ഊന്നൽ നൽകിയുള്ള ഭാരോദ്വഹനം എന്നിങ്ങനെ നിരവധി ഗെയിമുകൾ അവതരിപ്പിക്കുന്നു.
ബഹ്റൈൻ അത്‌ലറ്റിക്‌സ് അസോസിയേഷൻ, ബഹ്റൈൻ ഫുട്‌ബോൾ അസോസിയേഷൻ, ബഹ്റൈൻ ജിംനാസ്റ്റിക്‌സ് അസോസിയേഷൻ, ബഹ്റൈൻ ബാസ്‌ക്കറ്റ്‌ബോൾ അസോസിയേഷൻ എന്നിവയുടെ സഹകരണത്തോടെയാണ് ബിഒസി നാല് ദിവസത്തെ മിനി ഒളിമ്പ്യാഡ് സംഘടിപ്പിക്കുന്നത്.