മനാമ: 2019 മുതൽ 2023 ഫെബ്രുവരി വരെയുള്ള കാലയളവിൽ ടൂറിസ്റ്റ് വിസയിൽ ബഹ്‌റൈനിലെത്തിയ 84,526 പ്രവാസികൾക്ക് താമസ വിസ ലഭിച്ചു. തൊഴിൽ മന്ത്രിയും ലേബർ മാർക്കറ്റ് റെഗുലേറ്ററി അതോറിറ്റി (എൽഎംആർഎ) ചെയർമാനുമായ ജമീൽ ഹുമൈദാനാണ് പാർലമെന്ററി കമ്മിറ്റിയുടെ ചോദ്യത്തിന് മറുപടിയായി പുതുക്കിയ കണക്കുകൾ പുറത്തുവിട്ടത്. തൊഴിലുടമ ഒരു വിദേശ തൊഴിലാളിയെ നിയമിക്കണമെങ്കിൽ, നിയമത്തിൽ അനുശാസിക്കുന്ന വർക്ക് പെർമിറ്റ് നൽകുന്നതിനുള്ള വ്യവസ്ഥകൾ പാലിക്കുന്ന പെർമിറ്റ് നൽകുന്ന അതോറിറ്റിക്ക് അപേക്ഷ സമർപ്പിക്കണമെന്ന് അദ്ദേഹം വ്യക്തമാക്കി.
വർക്ക് പെർമിറ്റിന്റെ അടിസ്ഥാനത്തിൽ ടൂറിസ്റ്റ് വിസയിൽ നിന്ന് റെസിഡൻസി വിസയിലേക്ക് ഏറ്റവും കൂടുതൽ വിസകൾ മാറ്റുന്നത് 2022 ലാണ്. 46,204 തൊഴിലാളികളാണ് താമസ വിസയിലേക്ക് മാറിയത്. ഈ വർഷം ഫെബ്രുവരി വരെയുള്ള കാലയളവിൽ ടൂറിസ്റ്റ് വിസകളിൽ നിന്ന് വർക്ക് വിസയിലേക്ക് മാറിയ തൊഴിലാളികളുടെ എണ്ണം 7,878 ആണ്. 2019 ൽ കൈമാറ്റം ചെയ്യപ്പെട്ട വിസകളുടെ എണ്ണം 13,078 ഉം 2020 ൽ 7,942 ഉം, 2021 ൽ കൈമാറ്റം ചെയ്യപ്പെട്ട വിസകളുടെ എണ്ണം 9,424 ഉം ആണ്.