റിച്ച് പാലിന്റെ വിലവർദ്ധന പിൻവലിച്ചു. പാൽവില വർദ്ധന തീരുമാനത്തിൽ മാറ്റവുമായി മിൽമ

തിരുവനന്തപുരം: സർക്കാരിനെ അറിയിക്കാതെ പാൽ വിലവർദ്ധിപ്പിച്ചതിന് പിന്നാലെ ചെറിയ മാറ്റങ്ങളുമായി മിൽമ. കൊഴുപ്പേറിയ മിൽമ റിച്ച്(പച്ച കവർ) പാലിന്റെ വിലവർദ്ധനവ് പിൻവലിച്ചു. രണ്ട് രൂപയായിരുന്നു റിച്ച് ലിറ്ററിന് വർദ്ധന വരുത്തിയത്. ഇത് പിൻവലിച്ചു. എന്നാൽ കൊഴുപ്പ് കുറഞ്ഞ മിൽമ സ്‌മാർട്ട് പാലിന്റെ അരലിറ്റർ ഒരുകവർ പാലിന് 29ൽ നിന്ന് 30 രൂപയായി വർദ്ധിപ്പിച്ചത് തുടരും.അതേസമയം സ്‌മാർട്ട് ഡബിൾ ടോൺഡ് (മഞ്ഞ കവർ‌) അരലിറ്റർ പാക്ക് 24 രൂപയിൽ നിന്ന് 25 രൂപയായി കൂട്ടി. എന്നാൽ നീല കവർ പാലുകളുടെ രണ്ടിനത്തിനും വിലവർദ്ധന നടപ്പാക്കിയിട്ടില്ല. വിലവർദ്ധനയുടെ 83 ശതമാനവും ക്ഷീരക‌ർഷകർക്ക് നൽകുമെന്നാണ് മിൽമ അറിയിച്ചിരിക്കുന്നത്. കഴിഞ്ഞദിവസം മിൽമ ചെയർമാൻ കെ.എസ് മണിയോട് പാൽവില‌വർദ്ധനയെക്കുറിച്ച് ചോദിച്ചപ്പോൾ ഇല്ലെന്ന് മറുപടി നൽകി. പിറ്റേന്നാണ് വിലകൂട്ടിയത്. ഇതിൽ നിന്നും ഒരിനത്തിനാണ് ഇപ്പോൾ വില കുറയ്‌ക്കുന്നത്. മൃഗസംരക്ഷണമന്ത്രി അറിയാതെയായിരുന്നു വിലവർദ്ധന എന്ന് വിവരം പുറത്തുവന്നതോടെയാണ് ഒരിനത്തിന് വില കുറച്ചത്.