ലണ്ടന്: പ്രമുഖരുടെ ട്വിറ്റര് അക്കൗണ്ടുകള് ഹാക്ക് ചെയ്ത് വന് ബിറ്റ്കൊയിന് തട്ടിപ്പ്. ബ്രിട്ടണ് കേന്ദ്രീകരിച്ചു നടന്ന തട്ടിപ്പില് കോടീശ്വരന്മാരായ ബില് ഗേറ്റ്സ്, എലോണ് മസ്ക്, മുന് അമേരിക്കന് പ്രസിഡന്റ് ബരാക് ഒബാമ, പ്രസിഡന്റ് സ്ഥാനാര്ത്ഥി ജോ ബെയ്ഡന് എന്നിവ രടക്കം നിരവധി പേര് ഇരയായെന്നാണ് റിപ്പോര്ട്ട്.
ക്രിപ്റ്റോകറന്സിയിലൂടെയുള്ള സംഭാവനകള് ബരാക് ഒബാമ, ജോ ബെയ്ഡന്,കെയിന് വെസ്റ്റ് എന്നിവര് ആവശ്യപ്പെട്ടതായി ലക്ഷക്കണക്കിന് ഫോളോവേഴ്സിനാണ് സന്ദേശം ലഭിച്ചത്. ആയിരം ഡോളര് അയച്ചുതന്നാല് 2000 ഡോളര് തിരികെ നല്കാമെന്ന നിരവധി സന്ദേശം തന്റെ പേരിലും വന്നതായി ബില് ഗേറ്റ്സും പരാതിപ്പെട്ടിരിക്കുകയാണ്.
തട്ടിപ്പു നടന്നതായി സമ്മതിച്ച ട്വിറ്റര് വിവിധ സാധ്യതകളാണ് ഇതുമായി ബന്ധപ്പെട്ട് സംശയിക്കുന്നത്. ‘ട്വിറ്ററിനെ സംബന്ധിച്ച് ഏറ്റവും മോശം ദിവസങ്ങളിലൊന്നായിരുന്നു ഇന്നലെ. സംഭവിച്ചതിനെ ഏറെ ഞെട്ടലോടെയാണ് കാണുന്നത്.’ ട്വിറ്റര് മേധാവി ജാക് ഡോര്സേ അറിയിച്ചു.