തിരുവനന്തപുരം: കേന്ദ്രത്തിന്‍റെയും സംസ്ഥാനത്തിന്‍റെയും സാമ്പത്തിക പ്രശ്നങ്ങളെക്കുറിച്ച് പ്രധാനമന്ത്രിക്ക് നിവേദനം സമർപ്പിക്കാൻ മന്ത്രിസഭായോഗത്തിൻ്റെ തീരുമാനം. ഭരണഘടനാ വ്യവസ്ഥകളിൽ നിന്നുള്ള വ്യതിചലനങ്ങൾ, പ്രധാനപ്പെട്ട കേന്ദ്ര-സംസ്ഥാന സാമ്പത്തിക പ്രശ്നങ്ങൾ എന്നിവയിൽ ശ്രദ്ധ കേന്ദ്രീകരിക്കുന്നതാണ് നിവേദനം. സംസ്ഥാന സര്‍ക്കാരിന്‍റെ കടമെടുപ്പ് പരിധി 2017 ന് മുമ്പുള്ള സ്ഥിതിയിലേക്ക് പുനഃസ്ഥാപിക്കണമെന്ന് ആവശ്യപ്പെടുന്നതിനൊപ്പം സംസ്ഥാനം അഭിമുഖീകരിക്കുന്ന പ്രധാന വിഷയങ്ങളെയും നിവേദനത്തിലൂടെ പ്രധാനമന്ത്രിയുടെ ശ്രദ്ധയിൽ പെടുത്തും.
2017 ൽ സംസ്ഥാനത്തിന്‍റെ കടമെടുക്കൽ പരിധി കണക്കാക്കുമ്പോൾ സംസ്ഥാനത്തിന്‍റെ പൊതുകടത്തിൽ വകയിരുത്തിയ തുക ഉൾപ്പെടുത്താൻ കേന്ദ്ര സർക്കാർ തീരുമാനിച്ചിരുന്നു. ഭരണഘടനയുടെ ആർട്ടിക്കിൾ 293 (3) തെറ്റായി വ്യാഖ്യാനിച്ചാണ് ഇത് ചെയ്തത്. ഇതനുസരിച്ച്, സംസ്ഥാന പൊതുമേഖലാ കമ്പനികൾ-കോർപ്പറേഷനുകൾ, സ്പെഷ്യൽ പർപ്പസ് സ്ഥാപനങ്ങൾ എന്നിവ തിരിച്ചടച്ച വായ്പകൾ സംസ്ഥാന ബജറ്റിലൂടെയോ സംസ്ഥാനത്തിന്‍റെ നികുതി / സെസ് / സംസ്ഥാന വരുമാനം വഴിയോ തിരിച്ചടച്ച വായ്പകൾ ആർട്ടിക്കിൾ 293 (3) പ്രകാരം കടമെടുക്കുന്നതിനുള്ള സമ്മത പത്രം നൽകുമ്പോൾ സംസ്ഥാനം എടുക്കുന്ന കടമായോ കണക്കാക്കണമെന്ന് കേന്ദ്ര സർക്കാർ നിഷ്കർഷിച്ചിട്ടുണ്ട്.
സർക്കാർ ഗ്യാരണ്ടിയുടെ അടിസ്ഥാനത്തിൽ സംസ്ഥാന സർക്കാരിന് കീഴിലുള്ള പൊതുമേഖലാ സ്ഥാപനങ്ങൾ എടുക്കുന്ന വായ്പകൾ സംസ്ഥാന സർക്കാരിൻ്റെ നേരിട്ടുള്ള ബാധ്യതകളല്ല. അവ ഭരണകൂടത്തിന്‍റെ ആകസ്മിക ബാധ്യതയായി മാത്രമേ കണക്കാക്കാനാകൂ. ഫെഡറൽ തത്വങ്ങളുടെ ലംഘനമായ ഈ നടപടി സംസ്ഥാനത്തിന്‍റെ വികസനത്തിനു തടസ്സമാണ്.
ഈ സാഹചര്യത്തിലാണ് സംസ്ഥാന സർക്കാരിൻ്റെ സ്വന്തം വായ്പാ പരിധി നിശ്ചയിക്കുന്നതിനും 2017 ന് മുമ്പ് നിലവിലുണ്ടായിരുന്ന തൽസ്ഥിതി പുനഃസ്ഥാപിക്കുന്നതിനും സംസ്ഥാന സർക്കാരിൻ്റെ നിയന്ത്രണത്തിലുള്ള സ്ഥാപനങ്ങൾ എടുക്കുന്ന എല്ലാ കിഴിവുകളും പൊതു അക്കൗണ്ടുകളിൽ ഉൾപ്പെടുത്താനുമുള്ള തീരുമാനം പുനഃപരിശോധിക്കണമെന്ന് കേന്ദ്ര സർക്കാരിനോട് അഭ്യർത്ഥിക്കുന്നത്.