മനാമ: ഇന്ത്യൻ റിപ്പബ്ലിക് ദിനത്തോടനുബന്ധിച്ച് ലുലു ഹൈപ്പർ മാർക്കറ്റിൽ ഇന്ന് മുതൽ ഇന്ത്യൻ ഭക്ഷണ മേള ആരംഭിക്കുന്നു. ജനുവരി 27 മുതൽ 29 വരെയാണ് ഇന്ത്യൻ ഭക്ഷണ മേള നടക്കുന്നത്. ഈ ദിവസങ്ങളിൽ വൈകുന്നേരം 6 മുതൽ 10 വരെ, മെയിൻറോഡിനോട് ചേർന്നുള്ള ദാനാ മാളിന്റെ വിശാലമായ പാർക്കിംഗ് ഏരിയയിൽ ആണ് ഇന്ത്യൻ ഭക്ഷണ മേള സംഘടിപ്പിക്കുന്നത്. പതിനാല് ഇന്ത്യൻ റെസ്റ്റോറന്റുകൾ മേളയുടെ ഭാഗമാകും.
ഇന്ത്യയുടെ നാടൻ വിഭവങ്ങൾ, ദക്ഷിണേന്ത്യൻ വിഭവങ്ങൾ, ഇന്ത്യയിലെ ടിബറ്റൻ സമൂഹം ജനപ്രിയമാക്കിയ മോമോസ്, കേരളത്തിൽ നിന്നും പഞ്ചാബിൽ നിന്നുമുള്ള വിഭവങ്ങൾ, മുംബൈയുടെ തനതായ സ്ട്രീറ്റ് ഫൂഡ്സ്, ബംഗാളിൽ നിന്നുള്ള മധുരപലഹാരങ്ങൾ എന്നിവയുടെ രുചിഭേദങ്ങൾ മേളയിൽ ആസ്വദിക്കാം.
കോവിഡ് മാനദണ്ഡങ്ങളും സുരക്ഷയും ഉറപ്പ് വരുത്തിക്കൊണ്ട്, ജനങ്ങൾക്ക് നാല് ചുവരുകൾക്ക് വെളിയിൽ ഭക്ഷണം ആസ്വദിക്കാൻ കഴിയുന്ന ഒരു അവസരമാണ് തങ്ങൾ ഒരുക്കിയിരിക്കുന്നതെന്ന് ലുലുവിന്റെ വക്താവ് അറിയിച്ചു. ഇന്ത്യൻ ഭക്ഷ്യമേളയും വിലക്കിഴിവോടെ ഒരുക്കുന്ന ഇന്ത്യാ ഫെസ്റ്റും ഉപഭോക്താക്കളുടെ മനം കവരുമെന്ന് കരുതുന്നതായി ലുലു ഗ്രൂപ്പ് ഡയറക്ടർ ജുസർ രൂപാവാല പറഞ്ഞു. ആകർഷകമായ വിലക്കിഴിവോടെ ഇന്ത്യൻ ഉത്പന്നങ്ങളുടെ വിപണന മേളയായ ‘ഇന്ത്യ ഫെസ്റ്റ്’ ഫെബ്രുവരി 6 വരെ നീണ്ടു നിൽക്കും.
