നേപ്പാൾ സന്ദർശന വർഷ പ്രചാരണത്തിനു ബഹ്‌റൈനിൽ തുടക്കമായി

മനാമ: ലോകമെമ്പാടുമുള്ള വിനോദ സഞ്ചാരികളിൽ  നേപ്പാളിലെ ടൂറിസം മേഖലയെക്കുറിച്ച് അവബോധം സൃഷ്ടിക്കുകയെന്ന ലക്ഷ്യത്തോടെ   വിസിറ്റ് നേപ്പാൾ 2020 പ്രചാരണത്തിന് ബഹ്‌റൈനിൽ തുടക്കമായി.  നേപ്പാളും ബഹറൈനും തമ്മിൽ നയതന്ത്രബന്ധം സ്ഥാപിച്ച് 43-ാം വാർഷികം ആഘോഷിക്കുന്നതിനായി സംഘടിപ്പിച്ച പരിപാടിയിയിലാണ്  നേപ്പാൾ സന്ദർശന കാമ്പയിൻ   നേപ്പാൾ അംബാസഡർ  പദം സുൻദാസ് ഉദ്ഘാടനം ചെയ്തത്.

https://youtu.be/ovJ4u2NcjQs

1977 ജനുവരി 13 ന് നയതന്ത്ര ബന്ധം സ്ഥാപിച്ചതുമുതൽ  നേപ്പാളും ബഹ്‌റൈനും  തമ്മിലുള്ള ബന്ധം വളരെ  സൗഹാർദ്ദപരവും സ്വാഗതാർഹവുമായിരുന്നു. അതിനുശേഷം, ഐക്യരാഷ്ട്രസഭ, ചേരിചേരാ  പ്രസ്ഥാനം  ജി -77 തുടങ്ങിയ തലങ്ങളിൽ  നേപ്പാളും ബഹ്‌റൈനും തമ്മിലുള്ള സഹകരണം വളരെ ശക്തമായി നടക്കുന്നു .അന്താരാഷ്ട്ര സമാധാനം, സുരക്ഷ, കൂട്ടായ പുരോഗതി, സമൃദ്ധി, ആഗോള പൗരന്മാരുടെ ക്ഷേമം എന്നിവയ്ക്കായി  ഇരു രാജ്യങ്ങളും കൈകോർത്ത് പ്രവർത്തിക്കുന്നുണ്ടെന്നും അദ്ദേഹം പറഞ്ഞു.

സഹിഷ്ണുത, സമാധാനപരമായ സഹവർത്തിത്വം, മതസ്വാതന്ത്ര്യം എന്നിവ പ്രോത്സാഹിപ്പിക്കുന്നതിനൊപ്പം സാമ്പത്തിക അഭിവൃദ്ധിയുടെയും സാങ്കേതിക മുന്നേറ്റത്തിന്റെയും ഒരു കാലഘട്ടം  തുറന്നുകൊടുത്ത  ബഹ്‌റൈൻ ഭരണാധികാരികൾക്ക്    പദം സുൻദാസ് നന്ദി പറഞ്ഞു .വെറും 147,181 ചതുരശ്ര കിലോമീറ്റർ വിസ്തൃതിയുള്ള ദക്ഷിണേഷ്യൻ രാജ്യമാണ് നേപ്പാൾ. ഈ അതിർത്തിക്കുള്ളിൽ, സമുദ്രനിരപ്പിൽ നിന്ന് എണ്ണായിരം  മീറ്ററിന് മുകളിലുള്ള മഞ്ഞുമൂടിയ 14 പർവതങ്ങളിൽ 8 എണ്ണം നമുക്കുണ്ട്. ഏറ്റവും ഉയരമുള്ള കൊടുമുടിയായ എവറസ്റ്റ് പർവതം  മാതൃരാജ്യത്തിൽ നിന്നുള്ള അതിമനോഹരമായ സൗന്ദര്യത്താൽ നമ്മെ ആകർഷിക്കുകയും ചെയ്യുന്നു. 10 ലോക പൈതൃക സൈറ്റുകളുടെ കേന്ദ്രമാണ് നേപ്പാൾ. മാത്രമല്ല, ജയന്റ്-ഹോൺബിൽ, ആനകൾ, ഒറ്റക്കൊമ്പുള്ള കാണ്ടാമൃഗം, ബംഗാൾ കടുവകൾ എന്നിങ്ങനെ സംരക്ഷിക്കപ്പെട്ടിട്ടുള്ളതോ വംശനാശഭീഷണി നേരിടുന്നതോ ആയ നിരവധി മൃഗങ്ങൾക്കും പക്ഷികൾക്കും  ഒരു സുരക്ഷിത താവളവുമാണ്.

അപൂർവ പക്ഷിയായ സ്പൈനി ബാബ്ലർ നേപ്പാളിൽ മാത്രമേ കാണപ്പെടുന്നുള്ളൂ എന്നത് ശ്രദ്ധേയമാണ്. വേൾഡ് വൈൽഡ്‌ലൈഫ് ഫണ്ടിന്റെ കണക്കനുസരിച്ച് കഴിഞ്ഞ പത്ത് വർഷത്തിനിടെ കടുവകളുടെ എണ്ണം 121 ൽ നിന്ന് 235 ആയി ഉയർന്ന രാജ്യമാണ് നേപ്പാൾ.   12 ദേശീയ പാർക്കുകൾ, 6 സംരക്ഷണ മേഖലകൾ, 1 വന്യജീവി സംരക്ഷണ കേന്ദ്രം എന്നിവ ഉള്ളതിനാൽ ഈ ജീവജാലങ്ങളുടെ സംരക്ഷണം സാധ്യമാവുന്നു.  നിരവധി കുന്നുകൾ, തടാകങ്ങൾ,  അതിവേഗം ഒഴുകുന്ന നദികൾ എന്നിവ നേപ്പാളിനെ സാഹസിക വിനോദസഞ്ചാരത്തിന്റെ  കേന്ദ്രമാക്കി മാറ്റുന്നു.   ബുദ്ധൻ ജനിച്ച ദേശം   പാരമ്പര്യങ്ങൾക്കും   ആതിഥ്യമര്യാദയ്ക്കും ഒരുപോലെ പ്രസിദ്ധമാണ്.

ഈ വർഷം മനാമയ്ക്ക്  അറബ് ടൂറിസത്തിന്റെ തലസ്ഥാന പദവി  ലഭിച്ചത് സന്തോഷകരമാണ്.   നേപ്പാൾ ടൂറിസം ബോർഡും ബഹ്‌റൈൻ ടൂറിസവും എക്‌സിബിഷൻ അതോറിറ്റിയും തമ്മിലുള്ള അടുത്ത ബന്ധം ശക്തമായി തുടരുമെന്ന്  നേപ്പാൾ അംബാസഡർ പറഞ്ഞു.